Read Samo, Southern Loe 9 Bible Online

Loe 9 - Samo, Southern bible

Loe 9

¹Loe-saalin goledɛnaa a loe. A nə n siɛ da loe li ǹ màn kɔn tɔrɔ wuu li[8]. Davida a loe.

²Dɛnaa Lawa, ma á re barka diɛ n nɛ, ka ma foo tumaa nɛ, ma á re n kaãbaa ǹ siin lɛn tumaa kalɛɛ.

³N din a lɛa nɛ, ma foo á kɔɔ̃nɛ, ma á n nyɛnyɛɛ. Lon a Lawa gole, man loe loe, ma á n din tɔ boe.

⁴Maa zɔ́ɔn lɛn man wusii ka ǹ kio ne, maǹ boe kiɛ n din yɔrɔ-a, bɛ̀ ǹ gã.

⁵A giala, ń giã n kiibaa ǹ dankan kɛ nɛ, kii pepere, ń kiri wɔ ma a lɛa, ń maa sii yɔrɔ bɔ.

⁶Ń yoo tɔrɔn gialaa, min mɛnɛn bɛ́ ǹ ba nyɛ́ɛ biɛ n nɛ wa, ń bɛn dɛ. Ń nə́ ǹ tɔ tuturu duduu ń bɔ kanaa.

⁷Zɔ́ɔ kɛ wɔ nya, a wɔ ziziɛ̃ duduu. Ń ná a kɛbɔlɔ kaa, a sii din papaã, á n bɔ minin yiri ni.

⁸Sɛnɛ, Dɛnaa Lawa n kiibaa la yǎa duduu. Á ná a kii dankan doa kaka, kiri kurii a lɛa.

⁹A n gánan sii yɔrɔ boe ka sonborebaa nɛ, a n min tumaa a kiri we ka peperebaa nɛ.

¹⁰Dɛnaa Lawa, n din die n fuu-yɛle a duru ǹ bǎã baa. Nɔmaa biikoo li, a n duru n din li.

¹¹Min mɛnɛn bɛ́ n tɔ kɛ doɛ̃, bɛn die ǹ nə n foo doa n ganaa. A giala min mɛnɛn bɛ́ giɛ n li, Dɛnaa Lawa, n ba re bɛn toɛ walan wa.

¹²Dɛnaa Lawa mɛn bɛ́ giã-n *Siɔn, ka daa wɔ loe lɔ wɔ a tɔ bɔ nɛ. Ka a nya ǹ dí dadaran kɛn laakalaa tɔrɔn bii.

¹³Dɛnaa Lawa din bɛ́ n gɛ̀ dòo boe, bɛ lɛ n ke, a yiri a boe wa. A yiri a boe ka doobaan lɛ-dɛ-n wa.

¹⁴Makara bɔ ma-a, Dɛnaa Lawa. Maa zɔ́ɔn kɛn nə nɔmaa mɛn da ma mìi ni, n din ga bɛ ganaa. N din ma kanbaa gɛ̀ ganaa,

¹⁵màn mɛn bɛ́ toɛ, ma n tɔ bɔ n zɛnaa ǹ siin kɛn tumaa a lɛa, Zeruzalɛmu minin kɛn kɔn paã ǹ bǎã nɛ. N kirisibaa mɛn kɔ ma la, ma á re n nyɛnyɛɛ bɛa lɛa.

¹⁶Tɔrɔ kɔsɔn nə nyankɔrɔ mɛn fɔ̃, ǹ dinin nə́ bɔ ǹ nə́ kaa a nɛ. Ǹ biɛ mɛn koa, á ǹ dinin kũ.

¹⁷Dɛnaa Lawa nə́ n din nyaa, á kiri kuru. Á min baraa kũ a din a kan nɛ. Ka tùtu wuu gisĩ. *Doa

¹⁸Toa min baraan kɛn tumaa wo geren piɛ, tɔrɔ mɛn tumaa yiri á ke á bɔ ka Lawa nɛ.

¹⁹Lawa yiri a re boe ka doobaa-n duduu wa. Nɔmaa-wɔlen foo a re goɛ̃ biɛ niɛ̃ miɛ̃ duduu wa.

²⁰Yoo, Dɛnaa Lawa! N nyan toa minbuiin nɛ gɔ̀lɔ̀ baa wa! Tɔrɔn tumaa bíi, ǹ da n din yɔrɔ-a, n kiri wɔ ǹ ganaa.

²¹Dɛnaa Lawa, n din nyɛ́ɛ da ǹ ganaa. Toa tɔrɔn lɛn nə dɔ̃, mà ǹsɛn man minbuiin nɛ kooron lɛa.