Read Samo, Southern Loe 90 Bible Online

Loe 90 - Samo, Southern bible

Loe 90

¹Lawa a min Muizu a Lawa nyankɔ n ke. Dɛnaa, n din nə wɔa duru ǹ bǎã lɛa lɛ̀ woo lɛ̀.

²N laan bɛ̀ n kelen da, n laan bɛ̀ n kanaa laanka a gɔ́ɔ̃gɔ́ɔ̃ ǹ mànan da, n din nə Lawa lɛa haalɛ lɛlɛ, n nə n Lawa lɛa yǎa duduu.

³N din nə toɛ minbuiin nɛ á wusii woe tii li. N din nə ń kɛ pɛ: Minbuiinin lɛn, ka wusoo ka wo tii li.

⁴ Taãn nɛ, Lawa yii li, lɛ̀ duu goon nə ka gunun lɛawaa mɛn bɛ́ á kiɛ̃, a n ka tèlò a biikoo goon bɛ́ lɔn.

⁵N din nə minbuiinin nyin nyɛɛ. A n nyɛɛ ka baayɛlɛ a narɛɛ á ke lɔn. Maǹ ka buu bɛ́ lɔn boe tán.

⁶Baayɛlɛ, a n fúli, a yoo lon, wasamiɛ̃nɛ, a n bɛbɛnɛ a laa.

⁷Taãn nɛ, n foo-yoo kɛ wɔ giala nyɔmɔɔ. N foo-busii kɛ wɔ gɔ̀nɔn bìn da.

⁸Ń wɔa sã ǹ siin lɛn koa n din yɔrɔ-a, ń wɔa sii duriin lɛn koa n din yii giulun.

⁹Taãn nɛ, n din a foo-yoo lɛ na á toa wɔa lɛawaan tá nyɛɛ. Wɔa lɛ̀n man nyɛɛ ka lɛ gɔ́ɔ̃ ǹ piɛ̃ bɛ́ lɔn.

¹⁰Wɔa belebɔ kanaa n lɛ̀ pɔsɔbaa. Bɛ̀ min mɛn a bɔ ǹ gɔn tá siĩni, lɛ̀ pɔkiwisi. Sɛnɛ, a din-dɛdɛ a màn kɔn lɛa wa, yǎa nɔmaa laanka fuu dinsɔɔ̃. Minbuiin nɛ á papaɛ̃ fufuu, boɛɛn nɛ, a n woe.

¹¹Die nə n foo-yoo a lɛ goa ǹ bǎã doɛ̃? N foo a busu min li bɛ́ nyɛ́ɛ mɛn diɛ, die n bɛa lɛ goa ǹ bǎã doɛ̃?

¹²Bɛ lɛ n ke, wɔ daraa wɔa lɛawaan lɛn nimii ganaa, wɔ dɔ̃ wáa ǹ ba tɛ wa. Bɛ á re toɛ wɔ yiri yɛ.

¹³Dɛnaa Lawa, sabara baa n si n ganaa! N foo n die basɛ̃ biĩ? N din a dí-nyalin man wɔsɛn nɛ, bǐɛ̃ kɔ, n nə n yɔrɔ bǐɛ̃ da wɔ la.

¹⁴Bɛ̀ lɛ̀ waa lɔn, n wɔ kã ka n kɔn-narɛɛ gole kɛ nɛ, ń giɛ wɔ foo á kɔɔ̃n koe, wɔ n nyɛnyɛɛ wɔa tá kanaa lɛawaa tumaa gɔ́ɔ̃ nɛ.

¹⁵N nɔmaa da wɔ mìi-n lɛawaan mɛnɛn li, koe bɛ́ á bɔ wɔ ganaa lɛ̀n mɛnɛn gɔ́ɔ̃ nɛ, foo kɔɔ̃nbaa kɔ wɔ la bɛ doo.

¹⁶Toa wɔ n nya ǹ dí yɛ, wɔ tɔrɔn nə boo la ǹ nə n golebaa yɛ.

¹⁷Dɛnaa Lawa, n die n barka da wɔ ganaa. N die n barka da wɔa nya ǹ dín ganaa, n nyan toa wɔa nya ǹ dí kooro baa wa.