Read Samo, Southern Suu 1 Bible Online

Suu 1 - Samo, Southern bible

Suu 1

¹ Izirayelin kii Davida a nɛgiĩ Salomɔn a suusun nə́ ke.

²Suusun kɛn mìi n ka minin daraa sii-doɛ̃ ganaa nɛ, ka giã ǹ gɔn sonbore ne. A n doroo sonbore koe, a n toɛ n boo sonboren giala ma.

³A n toɛ wɔ yiridɛnan giã ǹ gɔn wɔ, wɔ goã pepere, wɔ dí-pɛn guguru kɔ, wɔ sonborebaa zɛnaa.

⁴Min mɛnɛn yiri bɛ́ kiɛɛrɛ, a n toɛ ǹ yiri goã ǹ dinin li. A n yiri koe nɛ tenən la, a toa ǹ sìi bɔkɔnlɛ dɔ̃.

⁵Sii-dɔ̃lin nə n too kɔ, ǹ tá re màn diɛ ǹ doɛ̃ li. Yiridɛnaan nə n too kɔ, ǹ tá re doroo sonbore yii.

⁶Ǹ tá re suusun tɛnɛn boo duriin giala miɛ, ka boo kakan kɛn nɛ sii-dɔ̃lin daraan gɔ́ɔ̃ nɛ.

⁷ Nyɛ́ɛbaa Dɛnaa Lawa yii ni n sii-doɛ̃ a giala kɔ ǹ bǎã lɛa. Min mɛnɛn laadoo bɛ́ a bie ka bɛa daraan laanka bɛa doroon kɛn nɛ wa, baãnaan manɛ.

⁸Maa nɛ, n too kɔ n di a gɔn waa ǹ boon kɛn li. N nyan nə n piã ka a doroon ne wa.

⁹Maǹ ka kii bafolo siĩn bɛ́ lɔn n mìi ganaa, ka bɔlɔ-a ǹ gii bɛ́ lɔn n bɔlɔ-a.

¹⁰Maa nɛ, bɛ n miã baraan tá zoɛ̃ li ǹ nə n da sii baraa nɛ, n piã.

¹¹Ǹ tá boe la ǹ pɛ n nɛ: «Da kun ka wɔ nɛ, wɔ n die n duri wɔ minin dɛ. Wɔ n die yii tì-an tɔwɛ, wɔ dinin foo sii lɛa.

¹²Wɔ n die ǹ kuĩ ǹ yii n koo, wɔ ǹ dɛ. Wɔ n die ǹ zuĩ yala-n, turuu ni.

¹³Wɔ á re màn giɔ̀mɔ kakaa tɔrɔ tumaa yii. Wɔ á re wɔa kion piɛ̃ ka bɛa mànan kɛn lɛn nɛ.

¹⁴Daa, n tá re n wɔ gii yii. Wɔ n die lɛ kaa kun goo koɛ.»

¹⁵Maa nɛ, n nyan wo kunun ǹ ni wa. N wɔlɔ lui ǹ zii ganaa.

¹⁶Maǹ baa sii sii baraa zɛnɛɛ, manə n nanɛɛ gɛ̀ dɛ li.

¹⁷Bɛ̀ bàan yii dɔ-dɔli yɛ, a kan kɔ nɛ là banban doo wa.

¹⁸Sɛnɛ, bɛa minin kɛn lɛn man kan koe ǹ dininmaan manɛ, maǹ kan koe ǹ dinin nyin ni.

¹⁹Taãn nɛ, á ke, min mɛnɛn bɛ́ mɛnɛɛ minin la, sii mɛn bɛ́ re ǹ yii, gɛ̀ nɛ.

²⁰ Sii-dɔ̃li nə n lɛ dii zii la. Bǎã dadaran nɛ, a n boo diɛ ka lɛn gole ne.

²¹Zaman bɛ́ mɔnaa-n bǎã mɛn nɛ, a n lɛ diɛ walan. A n lɛ diɛ kiwi kiɛnlɛ-a.

²²Baãnaan lɛn, ka n die kaa baãnaabaa lɛ narɛ yǎa biĩ kəni? Yaa wɔ minin ganaa wolen lɛn, ka n die yaa woe minin ganaa yǎa biĩ kəni? Yiriwɛɛnaan lɛn, ka n die n piɛ̃ ka sii doɛ̃-n yǎa biĩ?

²³Ka n too kɔ maa doroon li. Man die ma yiri gisĩ ka la kəni, ma toa ka maa da ǹ boon dɔ̃.

²⁴Man ka bíi we, ka lɛ n boe haayii diɛ. Ma nə n gɔn diɛ ka la, min kɔn ba diɛ sii li wa.

²⁵Ka nə n piɛ̃ ka maa doroon ne, ka a n too koe maa gɔn waa ǹ boon li wa.

²⁶Bɛ lɛ nɛ, kaa koe pinaa, ma á re yaa we ka ganaa. Bɛ̀ ka gɔ̀nɔn tá bìn diɛ nyɛ́ɛ gunun, ma á re ka foo siɛ.

²⁷Hiĩ, ǹ kɔn pinaa, nyɛ́ɛ á re n doe ka bii ka piɛ̃ gole wɔ bɛ́ lɔn. Koe á re ka siɛ ka la tì gole wɔ bɛ́ lɔn. Foo biɛ na laanka foo ziziɛ̃ á re ka yii.

²⁸Ka á re ma bíi, sɛnɛ, ma a re ka lɛ sii wa. Ka á re giɛ ma li, sɛnɛ ka a re ma yii wa.

²⁹Bɛ n die n zɛnɛɛ a giala ka n piã ka doɛ̃ nɛ, ka n piã ka nyɛ́ɛbaa Dɛnaa Lawa yii n ni.

³⁰Ka lɛ kɔ maa doroon ganaa wa. Ka maa gɔn waa ǹ boon kɛn kɔn da sii li wa.

³¹Kaa giã ǹ gɔn lɛ a siin man die kuĩ ka dinin mìi ni. Kaa sii yɔrɔ bɔn kɛn, ǹ tìĩ á re boe ka nyin ni kusikusi.

³²Piã ka sii-doɛ̃ nɛ n bɔ̀n diɛ baãnaan ganaa. Foo doa din ganaa dɔ n gəngəə̃n wɔ ziziɛ̃.

³³Sɛnɛ, bɛ̀ min mɛn nə n too kɔ ma lon, bɛa dɛnaa á re goɛ̃ yii-nyɛɛ gɔ́ɔ̃ nɛ, kiĩn ni a ná a ba nyɛ́ɛ biɛ koe-n wa.