Read Samo, Southern Suu 12 Bible Online

Suu 12 - Samo, Southern bible

Suu 12

¹Min mɛn bɛ́ gɔn waa ma-n narɛ, a n giɛ doɛ̃ li. Sɛnɛ, min mɛn bɛ́ n piɛ̃ ka doroo ne, baãnaa nɛ.

²Sii sonbore-zɛnaali n kɔɔ̃n dɛnaa Lawa ganaa. Sɛnɛ min mɛn bɛ́ ǹ miãn siɛ̃, Lawa n zɛ̀rɛ diɛ bɛn la.

³Min mɛn bɛ́ sii baraa zɛnɛɛ, a gòã á tán wa. Sɛnɛ, sii sonbore zɛnaa wole gòã n we-n tán, bìn ba n diɛ a ganaa wa.

⁴Lɔ yiridɛnaa nə ǹ zuũ tɔ boe. Sɛnɛ lɔ mɛn bɛ́ sìi diɛ ǹ zuũ ganaa, bɛ n ka busu bɛ́ lɔn a wen sɔsoɛ̃.

⁵Min sonbore a taasiɛ n doa-n peperebaa ganaa. Min baraa wɔ n ka ǹ miãn sã nɛ.

⁶Min baraa lɛ gɔ́ɔ̃ ǹ boo n kan lɛa gɛ̀ dii. Sɛnɛ min sonbore wɔ nə ǹ miãn sii ǹ kiɛ.

⁷Bɛ̀ min baraa mɛnaa, a wɔ na á nya. Sɛnɛ min mɛnɛn bɛ́ sii sonbore zɛnɛɛ, bɛn kion gòã n we-n tán kaka.

⁸Maǹ min tɔ boe a yiriwoorobaa taman yii. Yirikɔkɔrɔdɛnaa wɔ n ka papaã nɛ.

⁹Á soɛ ǹ nə n pɔpɔsɛ a da yaa dí-nyali tá n lon, bɛ á soɛ din gole kɔ nɛ màn-bii din ná a ba n lon wa.

¹⁰Min pepere tá n yiri koɛ a tɔɔn li. Sɛnɛ min baraa ba makara goon din doɛ̃ wa.

¹¹Min mɛnɛn bɛ́ ǹ wuru kɔsɛ, màn-bii a nyaabiɛ ǹ ganaa wa. Sɛnɛ, min mɛnɛn bɛ́ baa sii màn kooro kio, yiriwɛɛnaan manɛ.

¹²Min baraan manə n yii boe koɛɛ̃n mànan li. Sɛnɛ min peperen sii n bǐɛ̃ koe.

¹³Min baraan man kòso-n ǹ soɛn taman yii. Sɛnɛ, koe a sii sonbore-zɛnaali yii wa.

¹⁴Min a sii á boe la a yɔrɔ yɛ lɛ gɔ́ɔ̃ ǹ boo barka nɛ ka dí bɛ́ saraa koe min la lɔn.

¹⁵Baãnaan man taasɛ mà ǹsɛn zɛnaa ǹ sii n siĩn duduu. Sɛnɛ, sii-dɔ̃li manə n too koe doroo li.

¹⁶Baãnaan foo n siɛ lɛlɛ bɛ̀ a n da ǹ lɛ la. Sɛnɛ, yiridɛnaa n sii sii a ganaa.

¹⁷Min mɛn bɛ́ sonbore pii, a nə n doe kiri a peperebaa lɛ. Min mɛn bɛ́ siére baraa pii, a n màn diɛ siɛ̃ li.

¹⁸Min mɛn bɛ́ boo diɛ a mìi gialaa, a n goon ka gɔya sa nɛ busu diɛ. Sɛnɛ min mɛn bɛ́ boo diɛ ka sii-doɛ̃ nɛ, a n dagòã lɛa busu nyɛɛ.

¹⁹Sonbore n duduu wɔ lɛa. Sɛnɛ, soɛ n beleboe yii-tã a buĩ dinsɔɔ̃.

²⁰Baraa-zɛnaalin foo n piɛ̃ nɛ ka soɛ nɛ. Sɛnɛ, min mɛnɛn bɛ́ doroo sonbore koe, foo kɔɔ̃n nə bɛn wɔ lɛa.

²¹Koe a min pepere yii wa. Sɛnɛ, min baraa wɔ n ka fuu ni.

²²Soɛ-bɔli tìĩ n boe ne Dɛnaa Lawa nyin ni. Sɛnɛ min mɛnɛn bɛ́ sonbore pii, bɛn sii n kɔɔ̃n a ganaa.

²³Boo ma din la wole n pìi koe a sii-doɛ̃ lɛ. Sɛnɛ baãnaa nə n lɛ dii ka a gàãn nɛ.

²⁴Min mɛn a dí boo bɛ́ kaka, bɛ n goɛ̃ ǹ miãn mìi la. Sɛnɛ, yoobaali á re bɛ̀rɛ biɛ.

²⁵Nɔmaa n min foo ziziɛ̃. Sɛnɛ, boo sonbore n min foo basɛ̃.

²⁶Sii sonbore-zɛnaalin man nyɛɛnaan-bɔle sonboren lɛa. Sɛnɛ sii baraa-zɛnaalin man siɛ̃ ǹ zii ganaa.

²⁷Yoo-baali ba a don siĩ tiɛ̃ wa. Sɛnɛ dí-nyali n là sonbore yii a dí ganaa.

²⁸Yiikoonaabaa n peperebaa ǹ zii la. Min woo min kɔ bɛa zii lɛ lɛ, a n kanbiɛ gɛ̀ ganaa.