Read Samo, Southern Suu 13 Bible Online

Suu 13 - Samo, Southern bible

Suu 13

¹Nɛnyaan yiridɛnaa nə ǹ di a gɔn waa ma-n sii. Sɛnɛ, nɛnyaan mɛn laadoo bɛ́ a bie ka sii kɔn nɛ wa, bɛa n too koe doroo li wa.

²Min tá boe la a màn bii a lɛ gɔ́ɔ̃ ǹ boo barka nɛ. Sɛnɛ, min mɛnɛn bɛ́ baraa zɛnɛɛ, kakaarɛɛbaa boro n bɛn ganaa.

³Min mɛn bɛ́ yiri boe a din a da ǹ boo li, a nə nyin tamɛɛ. Sɛnɛ, min mɛn bɛ́ boo sawɛɛ, nɔmaa n die bɛ yii.

⁴Yoonaa nə n yiri koɛ màn gigiã-a sɛnɛ, a ba ǹ kɔn yii wa. Gɔ̀nɔndɛnaa bɛ́ giɛ màn mɛn li, a n bɛ yii.

⁵Sii sonbore-zɛnaali soɛ̃ n ka soɛ nɛ. Sɛnɛ sii baraa-zɛnaali n sɔ kiɛ ǹ miãn la, a n sìi diɛ ǹ ganaa.

⁶Bɛ̀ peperebaa á min sonbore nyin tamɛɛ, sii baraa n min baraa nyin boe.

⁷Min tɛnɛn manə ǹ dinin biɛ pàãman lɛa, màn kɔn dɔ ná a ba ǹ gɔn wa. Ǹ tɛnɛn dɔn manə ǹ dinin biɛ doobaan lɛa, ǹ gɔn màn dɔ n mɔnaa-n taãn-taãnɛ.

⁸Pàãma gɔn màn na a nyin tamɛɛ. Sɛnɛ, min kɔn ba yui doobaa gialaa wa.

⁹Min mɛnɛn bɛ́ sii sonbore zɛnɛɛ, ǹ foo n kɔɔ̃n duduu. Sɛnɛ, min baraan man ka bolon tɛ bɛ́ lɔn nimi.

¹⁰Din gole kɔlen man zia yiɛ. Sɛnɛ, min mɛnɛn bɛ́ lɛ koe doroo ganaa, sii-doɛ̃ n bɛn wɔ lɛa.

¹¹Naforo mɛn bɛ́ yii bǎã goon ne, bɛ n nyɛɛ fufuu. Ǹ mɛn yɛ boɛ boɛ, bɛ n woe nyɛɛnɛ.

¹²Bɛ̀ min nə n yii da màn la á belebɔ nɛ, a foo n ziziɛ̃. Sɛnɛ, n yiri bɛ́ màn mɛn ganaa, bɛ̀ n bɛ yɛ, a n goon ka yiikoonaabaa da nɛ.

¹³Bɛ̀ min nə n piã ka doroo ne, a lɛ á re we ǹ dɛnaa ganaa. Sɛnɛ, bɛ̀ min mɛn dí-pɛ tamaa, á re a saraa yii.

¹⁴Sii-dɔ̃li a daraa n yiikoonaabaa ǹ mu yala lɛa. Sãn mɛnɛn bɛ́ die ka gɛ̀ nɛ, a n toɛ min nə n nyɛnaa bɛn manɛ.

¹⁵Yiri sonbore bɛ́ min mɛn nɛ, bɛa dɛnaa n kɔɔ̃n minin ganaa. Sɛnɛ min baraan n zii baraa la.

¹⁶Min mɛn yiri bɛ́ a din li, a nə n taasɛ a tɔn sii zɛnaa. Sɛnɛ, baãnaa sɛ na a gaãnaabaa nyɛɛ.

¹⁷Dia dí-a wole baraa n die ka koe ne. Sɛnɛ, dia dí-a wole bɔlɔgoondɛnaa n die ka yii-nyɛɛ nɛ.

¹⁸Min mɛnɛn bɛ́ n piɛ̃ ka doroo ne, doobaabaa laanka sìi n bɛn wɔ lɛa. Sɛnɛ, min mɛnɛn bɛ lɛ koe doroon ganaa, yii gugurubaa n bɛn wɔ lɛa.

¹⁹Taasɛ sii ganaa a yɔrɔ yɛ n kɔɔ̃n foo ganaa. Sɛnɛ baãnaan a wusoo si baraa kio ba kɔɔ̃n a wa.

²⁰Bɛ̀ n koa kun ka sii-dɔ̃li ni, ma n sii-dɔ̃li biɛ. Bɛ̀ n koa kun baãnaa nɛ, n tá re nɔmaa we.

²¹Koe n sii baraa-zɛnaalin kio. Sɛnɛ là nyantoro n sii bǐɛ̃ baraa-zɛnaalin saraa lɛa.

²²Min mɛn bɛ́ sii bǐɛ̃ zɛnɛɛ, a n kíɛ̃ koɛ a nɔ̀ɔnɔn manɛ. Sɛnɛ, sii baraa-zɛnaali a naforo n sii sonbore-zɛnaalin wɔ lɛa.

²³Doobaa a wuru mɛn nə n kɔsɔ sɔnbɔraanɛ, màn-bii gigiã n yii a nɛ. Sɛnɛ, min kɔkɔrɔ pàã n nyɛɛ boɛ boɛ.

²⁴Min mɛn bɛ́ a ba a nɛ dii wa, a na a ba narɛ wa. Sɛnɛ, ǹ mɛn bɛ́ a wɔ doree, bɛ n nyɛɛ mà a n narɛ.

²⁵Min mɛn bɛ́ sii sonbore zɛnɛɛ, á re màn-bii a kã. Sɛnɛ, min mɛnɛn bɛ́ sii baraa zɛnɛɛ, bɛn tá re bòo koe.