Read Samo, Southern Suu 16 Bible Online

Suu 16 - Samo, Southern bible

Suu 16

¹Minbuiin nɛ n sii lɛ boe, sɛnɛ a yɔrɔ yɛ n boe Dɛnaa Lawa li.

²Minbuiin nɛ n taasɛ mà asɛ n sii sonbore zɛnɛɛ biikoo tumaa li. Sɛnɛ, Dɛnaa Lawa n kiri we foo ganaa.

³N bɛ́ sii mɛn tumaa zɛnɛɛ, a sii wɔ Dɛnaa Lawa gɔn. Ń sii mɛn lɛ bɔ, bɛ á re yɔrɔ yii.

⁴Mìi n Dɛnaa Lawa a sii zɛnaa tumaa la ka te. A na á min baraan dɔn zɛnaa koe pinaa taman yii.

⁵Din gole-kɔlin tìĩ n boe-n Dɛnaa Lawa nyin ni, ǹ dɔlɔ bɔ ma-a a sàabiɛ wa.

⁶Min mɛn bɛ́ bɔlɔgoondɛnaa lɛa, a sãn tá re n toɛ nɛ. Min mɛn bɛ́ nyɛ́ɛ biɛ Dɛnaa Lawa yii ni, a nə n wɔlɔ lui sii baraa ganaa.

⁷Bɛ̀ min a giã ǹ gɔn kaa Dɛnaa Lawa foo la, a n kiɛ kun ka a zɔ́ɔn dinin ni.

⁸Màn boɛɛn yɛ peperebaa gɔ́ɔ̃ nɛ á soɛ màn gigiã yɛ soɛ gɔ́ɔ̃-n nɛ.

⁹Minbuiin nɛn manə ǹ zii boe, sɛnɛ, Dɛnaa Lawa n tɔ wɔ bǐɛ̃ koe.

¹⁰Kii n boo diɛ ka Dɛnaa Lawa tɔ nɛ. Bɛ̀ á kiri we, a siɛ̃ wa.

¹¹Màn zɔɔ̃ ǹ kilo laanka a tasanan man Dɛnaa Lawa wɔ lɛa. A din na á ǹ tumaa zɛnaa.

¹²Sii baraa tìĩ n boe ne kii nyin ni. Taãn nɛ, bɛ̀ n sii bǐɛ̃ zɛnaa, n kiibaa gòã n we tán.

¹³Min mɛn bɛ́ boo diɛ kii ni ka peperebaa nɛ, bɛ n kiɛ a foo la. Sonbore-pɛli n kɔɔ̃n a ganaa.

¹⁴Kii a foo-yoo á min we gɛ̀ gɔn, sɛnɛ, sii-dɔ̃li á boe la a na a foo waa.

¹⁵Bɛ̀ kii yaa wɔ, bɛ n yiikoonaabaa lɛa. A bǐɛ̃baa n ka la bibinaa bɛ́ lɔn.

¹⁶Sii-doɛ̃ á soɛ sana nɛ. Yiridɛnaabaa á soɛ wɔrɔ nɛ.

¹⁷Min pepere nə n nyɛnɛɛ baraa nɛ. Min mɛn bɛ́ n yiri koɛ a din a giã ǹ gɔn li, a nə n nyin tamɛɛ.

¹⁸Din gole kɔ n die mɛnaa nɛ. Din koa n die ka bɔ̀n nɛ.

¹⁹Giã doɛ̃ kiĩn kun ka doobaan nɛ, á soɛ zia mànan gii kun ka din gole-kɔlin ni.

²⁰Min mɛn bɛ́ taasiɛ we sii ganaa a belebɔ nɛ, a sii n bǐɛ̃ koe. Min mɛnɛn bɛ́ n foo doɛ Dɛnaa Lawa ganaa, gɛrɛsiɛdɛnan manɛ.

²¹Min mɛn bɛ́ kiri kuri ka sii-doɛ̃ nɛ, yiridɛnaa nɛ. Bɛ̀ boo sonbore soo a lɛ-n a n min tumaa yiri wɛɛ.

²²Bɛ̀ doɛ̃ tá min mɛn gɔn, a n yiikoonaabaa ǹ mu yala lɛa. Sɛnɛ, baãnaan dɔlɔ n ka ǹ baãnaabaa nɛ.

²³Sii-dɔ̃li nə n taasɛ a tɔn boo da. Ka bɛ nɛ, a n boe la a ǹ miãn yiri waa ka a da ǹ boon ne.

²⁴Boo kɔɔ̃n nə ka zoo nyɔɔ bɛ́ lɔn, a n foo basɛ̃, a n gɔ̀nɔn bǐɛ̃ koe.

²⁵ Min tá boe la a taasɛ mà asɛ a giã ǹ gɔn tá siĩni a da yaa dɔn a n woe-n gɛ̀ ganaa.

²⁶Dí-nyali nɔ̀ n diɛ dí nyɛɛ ganaa, a giala, a nə n siɛ a lɛn gɔ́ɔ̃ li.

²⁷Min gɔ́ɔ̃ baraa a sii tumaa n doa-n baraa zɛnaa ganaa. A lɛ gɔ́ɔ̃ ǹ boo n ka tɛ bɛ́ lɔn kuĩ girigiri.

²⁸Min gɛsɛ n zia yiɛ. Tenten nə giaáran niɛ̃ kɔn.

²⁹Min kakaarɛ nə ǹ miãn siɛ̃ á ǹ diɛ zii baraa la.

³⁰Min mɛn bɛ́ ń yii tiɛ̃, sii baraa zɛnaa ná a gɔ́ɔ̃ nɛ, bɛ̀ á n lɛ məə, bɛ n nyɛɛ mà á sii baraa lɛ zɛnaa.

³¹Nyin sasa n saraa sonbore lɛa, min mɛnɛn bɛ́ sii sonbore zɛnɛɛ, bɛn man yii.

³²Min mɛn foo bɛ́ a yui wa, á soɛ gɔ̀lɔ̀ nɛ. Min mɛn bɛ́ boe a din la, á soɛ zia mìinaa nɛ.

³³Minin tá boe la ǹ nə n pã, sɛnɛ, Dɛnaa Lawa na a tumaa yɔrɔ boe.