Read Samo, Southern Suu 17 Bible Online

Suu 17 - Samo, Southern bible

Suu 17

¹Buuru lɛ koro gere ka giã kiĩ ta soɛ kion mɛn bɛ́ piɛ̃ nɛ ka zia nɛ a màn-bii n kɔɔ̃nɛ.

²Nɛgiĩ mɛn bɛ́ sìi diɛ, dí-nyali sonbore á re a bǎã siɛ. Á re kíɛ̃ gii kɔn ka ǹ dɔɔ̃nɔn nɛ.

³Maǹ sana laanka wɔrɔ á sonborebaa doɛ̃ ka tɛ nɛ. Sɛnɛ, Dɛnaa Lawa n kiri we minbuiin nɛ foo a siĩnbaa ganaa.

⁴Min mɛn bɛ́ sii baraa zɛnɛɛ, a n boe a din ni, á n too koe boo baraan li. Min mɛn bɛ́ soɛ boe, a nə n too koe soɛ boon li.

⁵Min mɛn bɛ́ yaa we doobaa ganaa, a n sɔ koe ǹ zɛnaali ganaa. Min mɛn bɛ́ n nyɛnyɛɛ ka ǹ miãn koe ne, dɔlɔ á re n boe ǹ dɛnaa ganaa.

⁶Nɔ̀ɔnɔn man díigolen kii bafolo lɛa, nɛnyaanan manə ǹ díin tɔ boe.

⁷Baãnaa kɔnbɔ ka boo sonbore-n wa. Kiã dɔ kɔnbɔ ka soɛ-n wa.

⁸Min tɛn a taasiɛ nɛ mà lɛ pii ǹ màn nə mìi kɔɔ̃nbaa lɛa asɛ ganaa. A n taasɛ mà á boe la a kiɛnlɛ tumaa bũ asɛ nɛ.

⁹Min mɛn bɛ́ giɛ giaárabaa li, a toa a yiri bɔ ka sãn nɛ. Yiri kɔ sãn li n giaáran niɛ̃ kɔn.

¹⁰Yiridɛnaa a sɛ̀ pɛ ma-a á busi a ganaa á la baãnaa a bàlà yii paabiɛ kɔmala nɛ.

¹¹Min baraa n zoɛ̃ piã li, sɛnɛ, dia dí-a wole baraa á re die a gialaa.

¹²Ǹ don màn babaraa mɛn a nɛn dɛ, bɛa dɔmalɛ á soɛ baãnaa a dɔmalɛ nɛ a gàãn pinaa.

¹³Min mɛn bɛ́ sii bǐɛ̃ sarɛɛ ka sii baraa nɛ, koe á re goɛ̃ a kion duduu.

¹⁴Bɛ̀ n zia giala kɔ, ma nə n mu tii lɛ bũ. Zia lɛ laan bɛ̀ a n yui, n basã.

¹⁵Min mɛn bɛ́ sonbore koe min baraa la, ka min mɛn bɛ́ min pepere yii tì-a kuĩ koe, ǹ dinin paanan tìĩ n boe ne Dɛnaa Lawa nɛ.

¹⁶Wɔrɔ n wàa bǐɛ̃ koe baãnaa gɔn? A yiri woorobaa yɛ nɛ? Bɛ boo bie wa. Á gaãnaa lɛa bɛ ganaa.

¹⁷Giaáran man kɔɔ̃n kɔn biikoo tumaa li. Dɔɔ̃n wɔ n ka biikoo kaka nɛ.

¹⁸Yiriwɛɛnaa dinsɔɔ̃ n lɛ koe a n miã a giɔ̀mɔ a siére baa.

¹⁹Min mɛn bɛ́ zia narɛ, a n sii baraa dɔ narɛ. Min mɛn bɛ́ n din gole koe, a n bɔ̀n diɛ a din ganaa.

²⁰Min mɛn yiri bɛ́ kɔkɔrɔ, bɛa là nyantoro yii wa. Min mɛn a lɛn su bɛ́ baraa, á re koe yii.

²¹Bɛ̀ n baãnaa yɛ ń da kanaa, n wɔ n ka foo busii ni. Nɛnyaan yiriwɛɛnaa n di a boe la a nyɛnyɛɛ wa.

²²Foo kɔɔ̃n tá boe la a busu nya, sɛnɛ foo ziziɛ̃ n pǎã wɛɛ diɛ.

²³Min baraan lɛ pii ǹ màn sii ka durii ni màn mɛn bɛ́ toɛ a kiri kɔkɔrɔ wɔ.

²⁴Sii-doɛ̃ mɛn bɛ́ kunu yiridɛnaa ganaa, a n giɛ bɛ li. Sɛnɛ, yiriwɛɛnaa sɛ n giɛ tán lɛ dan ganaa.

²⁵Nɛgiĩ yiriwɛɛnaa n foo busii lɛa ǹ di ganaa. Min mɛn yɛ á da kanaa, a n foo ziziɛ̃ lɛa bɛ ganaa.

²⁶Dɔlɔ bɔ min pepere ganaa a siĩn duduu wa. Min yii guguru-a kɔnbɔ ka dɛ-n wa.

²⁷Min mɛn bɛ́ boe a din la boo diɛ gɔ́ɔ̃ nɛ, a na a doɛ̃ nyɛɛ. Min mɛn bɛ́ boe n foo kũ la, yiridɛnaa nɛ.

²⁸Min tá boe la n baãnaan dinin taasɛ sii-dɔ̃lin lɛa, bɛ̀ ǹ nə n lɛ tã. Bɛ̀ ǹ boo da wa, ma n taasɛ mà yiridɛnan manɛ.