Read Samo, Southern Suu 19 Bible Online

Suu 19 - Samo, Southern bible

Suu 19

¹Bɛ̀ ń doobaa baa, n giã ǹ gɔn nə́ pepere, á soɛ soɛ-bɔle laanka baãnaa nɛ.

²Taasiɛ wɛɛ a siĩn wa. Wo fufuu a la yii-n ni die ka siɛ̃ nɛ.

³Minbuiin nɛn sii kooro zɛnaan man toɛ ǹ tá siɛ̃. Bɛ kio, ǹ foo n yoo-n Dɛnaa Lawa li.

⁴Pàãma a giaáran man mɔnɛɛ, sɛnɛ, maǹ doobaa niɛ̃ kɔn ka a giaára nɛ.

⁵Dɔlɔ á re n boe siére baraa-pɛli ganaa ǹ kɔn pinaa. Sɛnɛ, soɛ-bɔli dɔ bɛ á kɔnbɔ ka màn mɛn nɛ, á re bɛ yii.

⁶Min dadaran laakalaalin man gigiã. Min tumaa n bǐɛ̃-baali a giaára lɛa.

⁷Doobaa tìĩ n boe ne ǹ dɔɔ̃nɔn nyin ni. A giaáran manə n nyɛnɛɛ nɛ a la a lɛlɛ ǹ nɛ. Bɛ̀ á zoɛ̃ mà a boo da ǹ nɛ, a ba ǹ yii wa.

⁸Min mɛn bɛ́ n darɛɛ taasiɛ we ganaa, a n sii sonbore zɛnɛɛ a din ni. Min mɛn bɛ́ n doɛ mà asɛ sii giala ma, sii n yɔrɔ yii bɛ gɔn.

⁹Dɔlɔ á re n boe siére baraa-pɛli ganaa ǹ kɔn pinaa. Soɛ-bɔli sɛ́ wɔ n ka bɔ̀n nɛ.

¹⁰Yiriwɛɛnaa kɔnbɔ ka màndɛnaabaa-n wa, sanparɛ ka bɛ̀rɛ a goã kiin mìi la nɛ.

¹¹Yiridɛnaa foo á yui naanaa wa. Ǹ bɛ́ baraa mɛn zɛnɛɛ nɛ, bɛ toa walan nə gugurubaa koe la.

¹²Kii a foo-yoo na á kɔnbɔ ka yàra a lɛbaa nɛ, sɛnɛ, a sonborebaa n ka pele bɛ́ lɔn buu ganaa.

¹³Nɛnyaan yiriwɛɛnaa n bɔ̀n lɛa ǹ di ganaa. Lɔ zia-dali n ka tɔlɔ foɛ̃ wole bɛ́ lɔn, a mu boe ná a ba n lɛ kuĩ wa.

¹⁴N tá boe la n kion laanka díin gɔn màn yɛ kíɛ̃ lɛa sɛnɛ, lɔ yiridɛnaa n Dɛnaa Lawa a bǐɛ̃ lɛa.

¹⁵Yoobaa n min gù dii, bòo n dí-nyali baãnaa sɛ kuĩ.

¹⁶Min mɛnɛn bɛ́ koe dí-pɛn lɛ, manə n dinin nyin tamɛɛ. Min mɛnɛn bɛ́ ǹ ba yiri boe ǹ dinin giã ǹ gɔn li wa, ǹ tá re giɛ̃.

¹⁷Min mɛn bɛ́ doobaa goe, a n giɔ̀mɔ diɛ Dɛnaa Lawa ganaa. Dɛnaa Lawa á re sarɛɛ.

¹⁸N nɛnyaan doroo a kɔnpɛ ka a doroo biikoo ne. Sɛnɛ n foo yoo gɔ́ɔ̃ nɛ, n nyan nə ǹ dɛ n nə ǹ koa gɛ̀ li wa.

¹⁹Foo-yoo gole doamaa-n ka dɔlɔ màn saraa nɛ. Bɛ̀ ká n dɛnaa toa walan, ka n tɔn sɔsɔmɛ diɛ a zɛnaa ganaa.

²⁰N too kɔ doroo li, n lɛ kɔ daraa ganaa. Ka bɛ nɛ, n tá re sii-doɛ̃ yii.

²¹Minbuiinin man sii gigiã taasɛ ǹ yiri ni, sɛnɛ, Dɛnaa Lawa foo sii nə n zɛnɛɛ.

²²N bɛ́ zoɛ̃ li mà n min goã ka yɔrɔ mɛn nɛ, bɛ n ka sonborebaa nɛ. Doobaa á soɛ soɛ-bɔli ni.

²³Dɛnaa Lawa guguru kɔ n yii toɛ koo. Min mɛnɛn bɛ́ a guguru koe, ǹ ba foɛ̃ màn kɔn li wa, koe dɔ a boe ǹ ganaa wa.

²⁴Yoonaa nə n gɔn we tasa nɛ, sɛnɛ a woe ne a lɛ-a wa.

²⁵Bɛ̀ n yaa wɔ minin ganaa wole dɛ, bɛ á re doroo koe baãnaa la. Boo da yiridɛnaa nɛ, n bɛ́ li n daraa sii mɛn ganaa, á re bɛ giala miɛ.

²⁶Nɛnyaan mɛn a giã ǹ gɔn bɛ́ sìi diɛ, a nə ǹ di gɔn màn tumaa koɛ̃, a ǹ dan da baa si ganaa.

²⁷Maa nɛ, bɛ̀ n nə n too kɔ gɔn waa ǹ boon li wa, n ba re màn kɔn doɛ̃ wa.

²⁸Siere-pɛli mɛn laadoo bɛ́ a bie ka dí-pɛn nɛ wa, bɛa màn kɔn lɛa wa. Sii baraa n kɔɔ̃n min baraan ganaa.

²⁹Yaa wɔ minin ganaa wole nə n yiri koa a dɔlɔ li. Yiriwɛɛnaa dɔ nə n yɔrɔ bɔ mandɛ a lɛa.