Read Samo, Southern Suu 21 Bible Online

Suu 21 - Samo, Southern bible

Suu 21

¹Kii foo n mu zii lɛa Dɛnaa Lawa gɔn. Bǎã mɛn bɛ́ kɔɔ̃n a ganaa, a na a yɔrɔ diɛ walan.

²Minbuiin nɛ a sii zɛnaan tumaa n pepere a din yii li. Sɛnɛ, Dɛnaa Lawa dinsɔɔ̃ n gɔ́ɔ̃ doɛ̃.

³Giã ǹ gɔn sonbore, a n pepere, á kiɛ Dɛnaa Lawa foo la á la *wúlu màn nɛ.

⁴Ga ka yɔrɔ baraa nɛ, ka din gole kɔ nɛ, bɛ n min baraan sii baraa giala pii.

⁵Min mɛn bɛ́ taasiɛ we sii ganaa bɛ̀ a tɔn zɛnaa, bɛ n pàãma biɛ.

⁶Min mɛn bɛ́ sii zɛnɛɛ fufuu a foo na á kuĩ wa, bɛ lɛ n die doobaa biɛ.

⁷Min baraan kakaarɛbaa nə ǹ papaɛ̃, a giala maǹ nə n piɛ̃ ka peperebaa nɛ.

⁸Gɛ̀-dɛli a giã ǹ gɔn nə kɔkɔrɔ. Sɛnɛ, min pepere a sii zɛnaa n pepere.

⁹Giã kanaa á soɛ giã kion goon ne kun ka lɔ zia-dali ni.

¹⁰Min baraa a sii tumaa n doa nɛ baraa zɛnaa ganaa. Haalɛ a giaára din makara a boe a ganaa wa.

¹¹Bɛ̀ n dɔlɔ bɔ yaa wɔ minin ganaa wole ganaa, bɛ n yiri koe baãnaa la. Bɛ̀ n sii-dɔ̃li daraa, bɛ n yiri koe la.

¹²Lawa sonbore lɛ yii n doa-n min baraan kion la, a nə́ ǹ noɛ̃ ǹ kiɛ koe ne.

¹³Min mɛn bɛ́ n too tiɛ̃ pàãwɛɛnaa a lɛ dɛ ganaa, a dɔ á re gu diɛ, min ná a ba n nyiĩ la wa.

¹⁴Bǐɛ̃baa min ni ka durii ni, bɛ n foo wɛɛ. A da a zéwo-n ka durii-n na a kakaarɛbaa tɛ nimi.

¹⁵Kɔ dí-pɛn lɛ n foo kɔɔ̃n lɛa sii bǐɛ̃-zɛnaalin gɔn, sɛnɛ, a n sii baraa-zɛnaali nyín soe.

¹⁶Min mɛn bɛ́ á koe zii pepere lɛ wa, bɛ á re woe n susui fufuu kun ka geren ne.

¹⁷Foo sii bɛ́ kɔɔ̃n min mɛn ganaa, á re goɛ̃ doobaa lɛa duduu. Min mɛn bɛ́ mi ǹ màn narɛ ka màn-bii kɔɔ̃n nɛ, bɛa naforo yii wa.

¹⁸Min baraan man die giɔ̀mɔ saraa ǹ màn biɛ min sonboren lɛa, soɛ-bɔlen man die min peperen wɔ biɛ.

¹⁹Bɛ̀ n giã diə gole ne, á soɛ n giã kion kun ka lɔ baraa zia dali ni.

²⁰Sii-dɔ̃li a kion, gɔn màn sonbore ka nyɔɔ gigiã tan, sɛnɛ baãnaa sɛ ná a wɔ yii ziziɛ̃.

²¹Min mɛn bɛ́ giɛ peperebaa li ka sonborebaa nɛ, bɛ á re nyin sasa yii, peperebaa ka gugurubaa nɛ.

²²Zia-baali kakan bɛ́ kiwi mɛn lɛduĩ, sii-dɔ̃li n bɛ sii. Kungɔnɔn mɛnɛn bɛ́ ǹ foo n doa nɛ ǹ ganaa, a n bɛn noɛ̃ a ǹ kaa.

²³Bɛ̀ min mɛn boo a lɛ laanka a lɛwɔn la, a nə n din tamɛɛ koe ganaa.

²⁴Min mɛn bɛ́ n din koɛ a n gasɛ we ǹ miãn-a, a n yaa wɔ minin ganaa wole lɛa. A din gole kɔ la yii ni a sii zɛnaan tumaa gɔ́ɔ̃ nɛ.

²⁵Yoonaa foo sii n woe-n gɛ̀ ganaa, a giala a nə n piɛ̃ ka dí ni.

²⁶Baraabaraa, a foo n wuu pii, sɛnɛ, min sonbore n bǐɛ̃ biɛ a ná a nɔmɛɛ wa.

²⁷Min baraan wúlu màn nə màn bɔnɛɛ lɛa, sanparɛ bɛ́ ǹ nə́ zɛnaa ka gɔ́ɔ̃ tìbaa nɛ.

²⁸Siére baraa-pɛli á re giɛ̃. Sɛnɛ, min mɛn bɛ́ n too koe doɛ̃, bɛ n boo giala yii biikoo yii li.

²⁹Min baraa nə n din biɛ sii doɛ̃ wole lɛa. Min pepere a sii zɛnaan gòãn we tán.

³⁰Minbuiin nɛ a sii-doɛ̃, a yiridɛnaabaa, ka a taasiɛn ba màn kɔn lɛa Dɛnaa Lawa yɔrɔ-a wa.

³¹Maǹ sùin yɔrɔ boe ziabaa pinaa a lɛa. Sɛnɛ, Dɛnaa Lawa din nə gɔ̀lɔ̀baa koe.