Read Samo, Southern Suu 23 Bible Online

Suu 23 - Samo, Southern bible

Suu 23

¹Bɛ̀ n tá màn bii kun ka min yii guguru-a nɛ, min mɛn bɛ́ n nyɛɛnɛ, n yiri kɔ bɛ li.

²Bɛ̀ ń tá màn bii á la yii ni, màn bɔ lɛ.

³N nyan toa n yii bɔ bɛa màn-bii kɔɔ̃n li wa, á boe la a kan baa n ganaa.

⁴N nyan nə n din nɔmaa n ga naforo li wa, a taasiɛ lɛ da.

⁵Bɛ̀ ń nə n yii saa ń ga-a lɔn gɔrɔ a woo á ke. A nə n nyàan dii doɛ̃ ka sia bɛ́ lɔn yui woe.

⁶Min mɛn foo bɛ́ wuu pii ǹ miãn li, n nyan màn-bii kun ni wa. Ń yii nyan bɔ a màn-bii kɔɔ̃n li wa.

⁷Taãn nɛ, a bɛ́ boo mɛn diɛ, a taasiɛ bie bɛ-n wa. A n pii n ni: «A bii n kã», sɛnɛ, a parsii bie wa.

⁸Bɛa kiɛ̃ kio, n màn mɛn muĩ, n tá re pisii ni. N boo kɔɔ̃n lɛ là yɛ wa.

⁹N nyan boo kɔɔ̃n da baãnaa-n wa. A giala, á re barka boe a nɛ.

¹⁰N nyan gèlè la ǹ kɔlɔ zɔ̃ wa, n nyan tán si nɛ toenən la wa.

¹¹A giala, pàã tá ǹ tamaali wole lon. Á re ǹ kanbiɛ n ganaa.

¹²Ń foo bũ daraa li, ń nə n too da doɛ̃ wolen lon.

¹³N nyan nyɛ́ɛ baa nɛnyaan doroo-n wa. Ta n dɛ, a giɛ̃ wa.

¹⁴A dɛ lɛ din nə die toɛ a kirisibaa gɛ̀ ganaa.

¹⁵Maa nɛ, bɛ̀ n sii-dɔ̃li baa, bɛ n masɛ foo kɔɔ̃n koe.

¹⁶Bɛ̀ ń tá sonbore pii, man die n nyɛnyɛɛ.

¹⁷Ń foo nyan wuu pɛ sii baraa-zɛnaalin li wa. Sɛnɛ, nyɛ́ɛ baa Dɛnaa Lawa yii ni.

¹⁸Ka bɛ nɛ, n biɛ̃ ǹ tá re bǐɛ̃ koe. Ń foo sii á re ziziɛ̃ wa.

¹⁹Maa nɛ, n too kɔ ma lon. Ń ta re sii-dɔ̃li biɛ. Ń ta re koe zii pepere lɛ.

²⁰Min mɛnɛn bɛ́ yɔ mii á la yii ni, ǹ nə́ siĩ soɛ̃ á la yii ni, n nyan koa kun ka bɛn nɛ wa.

²¹A giala, doobaabaa n die yɔ-mili babaraan laanka màn-bii a la yii-n wolen yii. Ǹ yoobaa á lɛa maǹ mɔnaa kunun we.

²²Ń di mɛn nə n yɛ á n da kanaa, n too kɔ a lon. Bɛ̀ n náa zizi kɔ, n nyan na a puusə kɔ wa.

²³Sonbore pii, n nyan sã wa. Ga sii-doɛ̃ li, doɛ̃ nɛ ka yiridɛnaabaa nɛ.

²⁴Min pepere n di n nyɛnyɛɛ la. Bɛ̀ min mɛn sii-dɔ̃li yɛ n da kanaa, a foo n kɔɔ̃nɛ.

²⁵N di laanka n náa foo kɔɔ̃n kɔ! Lɔ mɛn bɛ́ á n yɛ, bɛ parɛ ka foo kɔɔ̃n nɛ!

²⁶Maa nɛ, n foo doa ma ganaa. Kɔ maa giã ǹ gɔn lɛ ka foo kɔɔ̃n nɛ.

²⁷Ka boo taãn nɛ, lɔ kɔrɔbaali n nyankɔrɔ zuzulu lɛa. Lɔ naarɛbaali n tù lɛa a lɛ n toen ne.

²⁸A n gɔn diɛ ka waa zii ganaa wole bɛ́ lɔn, a n giĩn kiɛ bɔlɔgoonbaãdɛnaabaa ganaa.

²⁹Die n nɔmaa-wɔle lɛa? Die n gɔ́ɔ̃ bii gɔ́ɔ̃ nɛ? Gungunun sii n die wɔ lɛa? Zia n die wɔ lɛa? Die n mandɛ yii mìi ná a ba la wa? Die yii nànan man tãtaã nɛ?

³⁰Yɔ mi bɛ́ min mɛn a dí lɛa, a n yɔ kakaarɛn lɔlɛkɔn, bɛa dɛnaa nɛ.

³¹N nyan ga duvɛ̃ a yii tãbaa kɛ ganaa wa, kaã boe n paan nɛ, a mii ń kɔɔ̃nɛ.

³²Á pii mà a nə n giala nyɔmiɛ̃, a n sɔn doe ka miɛ̃ bɛ́ lɔn, a nə n yagaɛ ka kɔrɔkan bɛ́ lɔn.

³³Mànan tá re kiɛ̃ n yɔrɔ-a siɛ̃saã siɛ̃saã, ń tá re boo tɔrɔ tumaa diɛ.

³⁴Ń tá re taasɛ mà nsɛ n yìsi mu gole la, waa-n tán mu la ǹ goo giala wɔlɔ-a.

³⁵Ń tá re taasɛ mà maǹ nə́ n dɛ, sɛnɛ mà n paǹ kɔn ba busi wa, mà maǹ nə́ n məə sɛnɛ, mà a wɔ n ganaa wa. N yii á re kiɛ fufuu, n wusoo n nɔ̀n da duvɛ̃ li, n mi.