Read Samo, Southern Suu 24 Bible Online

Suu 24 - Samo, Southern bible

Suu 24

¹N nyan toa n foo wuu pɛ min baraan li wa. N nyan koa kunun ǹ ni wa.

²Ǹ taasiɛ n doa nɛ basaã ganaa. Ǹ bɛ́ re sii baraa mɛn zɛnɛɛ, ǹ lɛ n bɛ dinsɔɔ̃ boo diɛ.

³Dí doɛ̃ n toɛ min kion dɔ, sɛnɛ, yiridɛnaabaa n toɛ a goã gengeren.

⁴Sii-doɛ̃ dɔ n toɛ kion pã ka màn sonbore giɔ̀mɔ kakaan nɛ.

⁵Pàã n sii-dɔ̃li lon. Bɛ̀ doɛ̃ wole ne, màn nə wusii miɛ̃ a pàã li.

⁶Bɛ̀ n tá woe zia la, n taasɛ taãn-taãnɛ. Doroo wole gigiã n gɔ̀lɔ̀baa koe.

⁷Yiriwɛɛnaa a boe la a sii-dɔ̃li baa wa. Bɛ lɛ nɛ, bɛ̀ ǹ tá kiwi a sii yɔrɔ boe, a n lɛ tã.

⁸Min mɛn bɛ́ sii baraa taasɛ a yiri ni, bɛ lɛ n min baraa lɛa.

⁹Yiriwɛɛnaa a taasiɛ tumaa n doa nɛ sii baraa ganaa. Min mɛn bɛ́ yaa we sii tumaa ganaa, a tìĩ boemaa-n min tumaa nɛ.

¹⁰Bɛ̀ n yalaa foo ziziɛ̃ gole pinaa, ń pàã na a tɛ wa.

¹¹Ǹ bɛ́ woe min mɛnɛn dii koe la, ń doa n nə ǹ kirisibaa. Ǹ si n nə ǹ kaa, ǹsɛn mɛnɛn bɛ́ tatalɛɛ woe n bɔlɔ kuru ǹ bǎã nɛ.

¹²Kɔntan n tá re pii mà n ba sii kɔn siére-a wa. Sɛnɛ, min mɛn bɛ́ sii tumaa doɛ̃, bɛ á doɛ̃. A n giɛ n ganaa, á re didie sarɛɛ a kɔnpɛ ka a zɛnaa ǹ siin ni.

¹³Maa nɛ, zoo nyɔɔ bii, a n kɔɔ̃nɛ, á re goɛ̃ nɔɔnɔɔ n lɛ-n.

¹⁴A din yii goon ne ka sii-doɛ̃ nɛ, n doamaa nɛ n dɔ̃. Bɛ̀ n bɛ yɛ, n biɛ̃ ǹ tá re bǐɛ̃ koe, n foo sii a re ziziɛ̃ wa.

¹⁵Min baraa, n nyan nə n gɔn da sii sonbore zɛnaa wole a kion ganaa wa. N nyan nə n zɔɔ̃ a giã ǹ bǎã kokoo li wa,

¹⁶a giala min mɛn bɛ́ sii sonbore zɛnɛɛ, ta a na á mɛnaa gunyin sɔbaa, a n wusii a yoo. Sɛnɛ, min mɛn bɛ́ sii baraa zɛnɛɛ, koe n die boe bɛ ganaa.

¹⁷Bɛ̀ n zɔ́ɔ bɔ á mɛnaa, n nyan nə n nyɛnyɛɛ wa. Bɛ̀ á n gòã na, n nyan bɛ̀ baa ka foo kɔɔ̃n nɛ wa.

¹⁸Bɛ bie wa, bɛ̀ Dɛnaa Lawa bɛ yɛ, a kɔɔ̃n koe a ganaa wa. A bɛ́ re dɔlɔ mɛn boe n zɔ́ɔ lɛ ganaa, a n bɛ lɛ diɛ.

¹⁹N nyan toa n foo yoo sii baraa zɛnaa wole li wa. N foo nyan wuu pɛ min bɔnɛɛ li wa.

²⁰Min mɛnɛn bɛ́ sii baraa zɛnɛɛ, ǹ biɛ̃ n banban. Min bɔnɛɛn yiikoonaabaa n ka bolon tɛ bɛ́ lɔn nimi.

²¹Maa nɛ, Dɛnaa Lawa laanka kii guguru kɔ. Min mɛnɛn bɛ́ zoɛ̃ mà ǹ sii tumaa bɔyaa, n nyan koa kunun ǹ ni wa.

²²A giala, koe á boe la a bɔ ǹ ganaa bǎã goon ne. Dɛnaa Lawa laanka kii bɛ́ re koe mɛn boe ǹ gogoonmaa ganaa, ǹ ba bɛ doɛ̃ wa.

²³Sii-dɔ̃lin nə boo mɛn da doo, bɛ á ke: Bɛ̀ ń tá kiri we, a siĩni n bɔnbii-a wɔ minin bii wa.

²⁴Bɛ̀ kiri-kuruli pɛ zɛ̀rɛdɛnaa nɛ: «Zɛ̀rɛ ba n ganaa wa,» bɛa kiri-kuruli lɛ tìĩ á re boe zaman tumaa nɛ.

²⁵Kiri-kurulin mɛnɛn bɛ́ re bɛa kiri kɔkɔrɔ lɛ we, là nyantoro laanka gugurubaa n bɛn wɔ lɛa.

²⁶Boo lɛ si ka gɔ́ɔ̃ fubaa n giaárabaa taãn giala pii.

²⁷N dí gɔn nyɔmɔɔ kanaa, n wuru yɔrɔ bɔ, bɛ kio, ń tá boe la n nə n kion dɔ.

²⁸N nyan nə n miã zɛ̀rɛ baa mìi na a ba la wa. Soɛ bɔ sii ni n ganaa?

²⁹N nyan pɛ: «A zɛnaa ma-n lɔn ke, ma dɔ n die zɛnɛɛ-n miɛ̃. A sii mɛn zɛnaa ma nɛ, man die bɛ lɛ miã sarɛɛ la.»

³⁰Má bɔ kunun yoonaa a wuru li, má bɔ kunu baãnaa a rezɛ̃ wuru li.

³¹Á ke, nyan da n pɛnɛɛ nɛ a tumaa ganaa. A kungɔn mɛn dɔ ka kɔlɔ nɛ, bɛ́ kaa.

³²Bɛa siin lɛn má ǹ yɛ, má taasiɛ wɔ ǹ ganaa, má doroo goon gũ ma yiri ni:

³³ Nyuù boɛɛn wɔ, n nə n yii kɔ kɔnlɛ boɛɛnɛ, n nə n bɔ kɔn tán boɛɛnɛ, n nə n gɔnɔn kaa n kolo-n.

³⁴Bɛa biikoo li, doobaabaa n die n tɔwɛɛ ka wurumu bɛ́ lɔn, nɔmaa n die n koe n lɛ ka zia-baali bɛ́ lɔn.