Read Samo, Southern Suu 25 Bible Online

Suu 25 - Samo, Southern bible

Suu 25

¹Salomɔn a suusu kɔsɔn nə́ ke. Zudaan kii Ezekiasi a sumu sɛ́wɔ-kiɛ̃lin man nə ǹ kiɛ̃.

²Dɛnaa Lawa a sii zɛnaa ka durii-n na a tɔ guguru koe. Sii duriin doɛ̃ n tɔ koe kiin la.

³Lon a sɔsɔɔbaa ba n doɛ̃ wa, tán a zuzulubaa dɔ ba n doɛ̃ wa, a din yii goon ne, kiin dɔn foo ba n doɛ̃ wa.

⁴*Gɔ̀ bɔ n bɔ wɔrɔ ganaa, á re gɔn màn sonbore biɛ.

⁵Min baraa loo n bɔ kii a sumu, a kiibaa lɛ gòã á re we tán ka peperebaa nɛ.

⁶ N nyan nə n din kalaa kii yɔrɔ-a wa. N nyan giã min dadaran bǎã-n wa.

⁷Bɛ̀ ǹ nə́ pɛ n nɛ mà n nə n zɔ̃ n da nyɛɛnɛ, bɛ á soɛ n yii puusə kɔ nɛ kii yɔrɔ-a.

⁸N sii mɛn yɛ, n nyan saa lɛlɛ n bɛ pɛ fufuu kiri wɔ ǹ bǎã-n wa. Bɛ̀ n zɔ́ɔ nyaa mà sonbore ba n lon wa, ma nə n biɛ lɔn bɛ kio?

⁹Bɛ n zia da ka n miãkɛn nɛ, ka a yɔrɔ bɔ ka dinin bii-n ni. Min kɔsɔ boo mɛn da n nɛ, n nyan bɛ kalaa wa.

¹⁰Bɛ bie wa, min mɛn bɛ́ n too koe n lon, bɛ á re sɔ koe n ganaa. N saa lɛlɛ ń boo baraa mɛn da, n ba bɛ lui doɛ̃ n kũ wa.

¹¹Boo mɛn nə n da á kɔnpɛ a biikoo ne, a n ka sana màn bɛ́ lɔn ǹ nə́ wɔrɔ kaa la nyaǹ lɛa.

¹²Min mɛn bɛ́ n too koe doɛ̃, sii-dɔ̃li a doroo ǹ boon ka sana zan bɛ́ lɔn a yii li, hinlaa ka bɔlɔ-a gii bɛ́ lɔn sana yoreen lɛa.

¹³La bɛ́ wɔlɔ nyɛɛ lɔn tɛ̀fuu waáraa, dia dí-a wole bɔlɔgoondɛnaa n pàã koe a mìilandɛnaa la miɛ̃.

¹⁴Labara hinlaa piɛ̃ mɛn bɛ́ a na a die ka la mu goon din ni wa, min mɛn bɛ́ n lɛ koe ka bǐɛ̃ nɛ a na a ba koe a bɔlɔ lɛ wa, bɛa dɛnaa n miɛ̃.

¹⁵Bɛ̀ n nə foo kũ n bele bɔ nɛ, ń tá kiri-wɔle yiri wɛɛ. Boo kɔɔ̃n tá boe la a min kakaarɛ basã.

¹⁶Bɛ̀ n zoo nyɔɔ yɛ, n bii a kɔnpɛ n nɛ, bɛ biɛ wa, n tá re pisii ni.

¹⁷N nyan wo n giaára li paapaa wa. Bɛ bie wa, bɛ̀ á nɔmaa, n tìĩ á re boe ne.

¹⁸Min mɛn bɛ́ soɛ woon diɛ n miã la, a n goon ka bàlà gole ne, gɔya sa hinlaa kiɛ pɛpɛnɛ nɛ.

¹⁹Koe gɔ́ɔ̃ nɛ, bɛ̀ n nə n foo doa soɛ-bɔli ganaa, a n goon ka sɔ busulə á ke màn soɛ̃ ka a sɔ busulə n lɔn, hinlaa ka min mɛn bɛ́ tɔ we a gòã yiɛ la lɔn.

²⁰Foo-busii gole bɛ́ min mɛn ganaa, bɛ̀ n foo kɔɔ̃nbaa ǹ loe lɔ nɛ, a n goon ka ma nə n dɔnkɛ sɔlɔ ń bɔ a ganaa nyan pinaa, a n goon ka ma nə n mu piã, kaa bayɛrɛ ganaa.

²¹ Bɛ̀ bòo tá n zɔ́ɔ ganaa, màn-bii kɔ la a bii. Bɛ̀ mu boro tá a ganaa, n mu kɔ la a mi.

²²Bɛ̀ n zɛnaa miɛ̃, a re boe giã la wa ka maǹ nə tɛ nàn kaa a mìi ni. Dɛnaa Lawa á re n sarɛɛ.

²³Piɛ̃ mɛn bɛ́ woe lɛ̀giala-n, bɛ n die ka là nɛ. Soɛ n die ka n miãn foo yoo ne.

²⁴Bɛ̀ n giã kanaa gɔrɔ, á soɛ n giã kion goon ne kun ka lɔ mɛn bɛ́ zia n kɔɔ̃n a ganaa.

²⁵Boo tii kɔɔ̃n mɛn bɔ wɔlɔ sɔsɔɔ nɛ á daa, a n ka mu nyantoto bɛ́ lɔn mu boro dɛnaa gɔn.

²⁶Min mɛn bɛ́ pepere, sɛnɛ a gɔ̀nɔn nə́ bìn diɛ min baraa nyɛɛnɛ, a n goon ka mu yala hinlaa tù mu ni, ǹ na a mu zaãbaa.

²⁷Zoo nyɔɔ bii a la yii-n ba siĩn wa. Ga gugurubaa li a la yii-n dɔ a siĩn wa.

²⁸Min mɛn bɛ́ a boe a din foo la wa, bɛ na á kɔnbɔ ka kiwi mɛn bɛ́ panparaanɛ kungɔn ná a ba a ganaa wa.