Read Samo, Southern Suu 29 Bible Online

Suu 29 - Samo, Southern bible

Suu 29

¹Min mɛn bɛ́ a lɛ koe doroo ganaa wa, sàabaa ba la wa, á re ziziɛ̃ bǎã goon ne.

²Bɛ̀ min peperen nə́ pàã saa, zaman nə n nyɛnyɛɛ. Sɛnɛ bɛ̀ min baraa pàã saa, zaman nə gungunun sii.

³Min mɛn bɛ́ sii-doɛ̃ narɛ, bɛ̀ nə ǹ di foo kɔɔ̃n koe. Sɛnɛ min mɛn bɛ́ n parɛɛ lɔ kɔrɔn ganaa, a na a wɔrɔ tumaa nyɛɛ.

⁴Kii mɛn bɛ́ koe dí-pɛn lɛ, a gána a naforon gòã n doɛ. Sɛnɛ, ǹ mɛn bɛ́ nyin giɔ̀mɔ sii á la yii ni, a na a gána yui.

⁵Min mɛn bɛ́ ǹ miãn bebele, a n kan koe a din ni.

⁶Min mɛnɛn bɛ́ sii baraa zɛnɛɛ, ǹ sãn man kan lɛa ǹ ganaa. Sɛnɛ, min mɛnɛn bɛ́ sii bǐɛ̃ zɛnɛɛ, manə n nyɛnyɛɛ ǹ nə́ bɛ̀ biɛ ka foo kɔɔ̃n nɛ.

⁷Min pepere nə n yiri koɛ doobaa li, bɛa yiri ba min baraa lon wa.

⁸Boo wɔkɔn wolen man kiwi lɔlɛkɔn. Sɛnɛ, sii-dɔ̃lin man kiwi minin foo wɛɛ.

⁹Bɛ̀ sii-dɔ̃li á kiri we kɔn ka baãnaa nɛ, a foo á boe la a yoo hinlaa a yaa wɔ, sɛnɛ a ba n boe a-n wa.

¹⁰Min sonboren tìĩ boemaa nɛ gɛ̀-dɛlin manɛ, sɛnɛ min peperen man koɛ kunun ǹ ni.

¹¹Baãnaa na a foo-yoo tumaa nyɛɛ. Sɛnɛ, sii-dɔ̃li nə n diɛ a wɔ lɛ, a da waa ganaa.

¹²Bɛ̀ kii lɛ kɔ á n too kɔ soɛn li, a dí-nyali tumaa n min bɔnɛɛ biɛ.

¹³Doobaa nɛ ka min mɛn bɛ́ mɛnɛɛ doobaa la, sii goon nə ǹ doɛ kɔn: Dɛnaa Lawa yii nànan kɔ ǹ dinin paanan la.

¹⁴Bɛ̀ kii á kiri kuri doobaan la ka peperebaa nɛ, a pàã goã n woe tán miɛ̃ yǎa duduu.

¹⁵Mandɛ ka sɛ̀-pɛma-a n yiri koe min la. Sɛnɛ nɛnyaan mɛn bɛ́ ǹ ba n gɔn diɛ a ganaa wa, a n sìi diɛ ǹ dan ganaa.

¹⁶Bɛ̀ min baraa á gigiã, gɛ̀ dɛ n mɔnɛɛ. Sɛnɛ, ǹ kɔn pinaa, min peperen tá re bɛa minin kɛn lɛn mɛnaa yii.

¹⁷Dɔlɔ bɔ n nɛ ganaa sɔnbɔraanɛ, n tá re goɛ̃ yii-nyɛɛ la. Ka bɛ nɛ, á re n foo kɔɔ̃n koe.

¹⁸Bɛ̀ sii-nyaan banban wa, zaman nə n gɔn boe a din-a. Min mɛn bɛ́ koe dí-pɛn lɛ, bɛ foo á re kɔɔ̃n koe!

¹⁹Ǹ bie dí-nyali doree ka boon wa. Ta á ma, a koe lɛ wa.

²⁰Bɛ̀ min tá boo diɛ a na a ba n taasɛɛ wa, baãnaa á soɛ bɛa dɛnaa nɛ.

²¹Bɛ̀ n nə́ n bɛ̀rɛ ziziɛ̃ a yoo tán waáraa, a n yoo-baali biɛ.

²²Foo goledɛnaa n zia yiɛ, a n sii baraa gigiã zɛnɛɛ.

²³Min mɛn bɛ́ n din gole koe, bɛa dɛnaa á re boɛɛn koe. Sɛnɛ, min mɛn bɛ́ n din boɛɛn koe bɛa dɛnaa tɔ á re boe.

²⁴Min mɛn bɛ́ n naɛ kɔn ka wurumu ni, a n mɛnɛɛ a din la, Lawa bíi mɛn bɛ́ a kio á bɛ doɛ̃, sɛnɛ a ba wurumu lɛ giala diɛ kanaa wa.

²⁵Nyɛ́ɛ n kan lɛa min kuĩ. Sɛnɛ, min mɛn bɛ́ n din sii we Dɛnaa Lawa gɔn, bɛa dɛnaa tamaamaa nɛ.

²⁶Min gigiã n giɛ goledɛnaa a laakalaa li. Sɛnɛ Dɛnaa Lawa n kiri we didie ganaa.

²⁷Sii kɔkɔrɔ zɛnaalin tìĩ boe maa-n min peperen nyin ni. Min peperen tìĩ boe maa-n min baraan nyin ni.