Read Samo, Southern Suu 3 Bible Online

Suu 3 - Samo, Southern bible

Suu 3

¹Maa nɛ, n yiri nyan bɔ ka maa daraan lɛn nɛ wa. Maa dí-pɛn lɛn tamaa n foo ne.

²Ka bɛ nɛ, n yii á re goɛ̃ koo, n tá re nyin sasa yii, ka là nyantoro ne.

³Toa n min sonborebaa, n bɔlɔgoondɛnaa baa baraabaraa. N paraa bɛa sɔ̀nɔn lɛn ganaa, n nə ǹ tamaa n foo ne.

⁴ N sii á re kɔɔ̃n koe Lawa ganaa, ka minbuiinin ni. N sii á re bǐɛ̃ koe.

⁵N nyan nə n foo doa n din yiri ganaa wa. N foo doa Dɛnaa Lawa ganaa parsiini.

⁶N sii zɛnaan tumaa gɔ́ɔ̃ nɛ, toa n na a din dɔ̃, á re n nyɛɛnaan boe.

⁷ N nyan taasɛ mà nsɛ n yiridɛnaa lɛa wa. Sɛnɛ, nyɛ́ɛ baa Dɛnaa Lawa yii ni, n nə n wɔlɔ lui sii baraa ganaa.

⁸Bɛ á re kakabaa koe n la, a pàã kɔ n la.

⁹Dɛnaa Lawa tɔ bɔ ka n gɔn mànan nɛ, n nə n kaa-piɛ màn bibinaa kɔ la.

¹⁰Bɛa biikoo li kəni, n dɔǹɔn tá re piɛ̃, n duvɛ̃ tamaa ǹ bǎã á re nyaabiɛ.

¹¹ Maa nɛ, n nyan nə n piã ka Dɛnaa Lawa a gɔn waa ǹ boon ne wa. N nyan nə n la bɔ ǹ ganaa wa.

¹² Sonbore, Dɛnaa Lawa bɛ́ min mɛn narɛ, a n bɛa dɛnaa doree ka díi bɛ́ a foo nɛ doree lɔn.

¹³Bɛ̀ min mɛn sii-doɛ̃ yɛ, ka yiridɛnaabaa nɛ, a na á foo kɔɔ̃nbaa yɛ.

¹⁴Sii-doɛ̃ á soɛ wɔrɔdɛnaabaa nɛ. A là á liɛ nɛ sana wɔ nɛ.

¹⁵Sii-doɛ̃ giɔ̀mɔ á kaka á la nyaǹ màn tumaa nɛ. Á soɛ màn kɛ tumaa nɛ wɔ n giɛ li.

¹⁶A n nyin sasa koe minbuiinin la, naforo ne ka tɔ golebaa nɛ.

¹⁷A nə ǹ kiɛ zii sonbore la, ǹ nə́ tɔ we la ka yii-nyɛɛ nɛ.

¹⁸Sii-doɛ̃ lɛ n ka yiikoonaabaa ǹ da bɛ́ lɔn. A bɛ́ min mɛnɛn gɔn, ǹ yii n nyɛɛ nɛ.

¹⁹Dɛnaa Lawa na á lon zɛnaa ka a Sii-doɛ̃ nɛ, á lon koa ka a yiridɛnaabaa nɛ.

²⁰A sii-doɛ̃ taman yii, tán giulun mu n piã woɛ̃, là baran nə́ toɛ là n kiɛ.

²¹Maa nɛ, n gɔn paraa yiridɛnaabaa laanka sii bɔkɔnlɛ ganaa. N nyan nə n na ǹ ganaa duduu wa.

²²Ǹ tá re yii-nyɛɛ koe n la.

²³Ka bɛ-n kəni, n tá re tɔ we n foo n doa nɛ, n gòã ná a talɛɛ wa.

²⁴Bɛ̀ n waa, n gɔ̀nɔn ba re bìn diɛ nyɛ́ɛ gunun wa. N tá re nyuù kɔɔ̃n we n waa ǹ piì la.

²⁵Nyɛ́ɛ a re kirii n la tán bǎã goon ne wa. Min baraan ba re yui n gialaa wa.

²⁶A giala, Dɛnaa Lawa á re n tamɛɛ, á re n kanbiɛ kan ganaa.

²⁷Min mɛn laadoo bɛ́ dɔmalɛ ganaa, bɛ̀ n tá boe la, n dɔ lɛ, n nyan nə n piã wa.

²⁸N nyan pɛ n miã nɛ: «Woo! Biɛ̃ n wusoo n daa ma kɔ n la.» A da yaa dɔn màn tá n gɔn n nə boe la n kɔ la.

²⁹N giaára mɛn bɛ́ n li a foo n doa nɛ n ganaa, n nyan sii bɔbɔnɛɛ kɔn taasɛ n doa a ganaa wa.

³⁰N nyan toa n zia da ka min ni kooro, bɛ̀ a ná a baraa zɛnaa n nɛ wa.

³¹N nyan toa n foo wuu pɛ min kakaarɛ li wa. N nyan a giã ǹ gɔn lɛn zɔɔ̃ wa.

³²Min kɔkɔrɔn tìĩ n boe ne Dɛnaa Lawa nyin ni, sɛnɛ, min peperen giaára nɛ.

³³Dɛnaa Lawa nə n liɛ min baraan kion li, sɛnɛ a n barka diɛ min sonboren kion ganaa.

³⁴ Dɛnaa Lawa nə n foo nyɛɛ din koa wolen mala, sɛnɛ a na a sonborebaa nyɛɛ din gisiĩ wolen manɛ.

³⁵Gugurubaa n die goɛ̃ sii-dɔ̃li-n wɔ lɛa, sɛnɛ, baãnaan wɔ n ka sìi ni.