Read Samo, Southern Suu 30 Bible Online

Suu 30 - Samo, Southern bible

Suu 30

¹Yaake a nɛgiĩ Aguuru a parsii boon. Bɛa giĩ lɛ da ǹ boon mɛnɛn da Itiyeli laanka Ukaali ni, ǹ nə́ ke:

²Ma din ni baãnaa lɛa minbuiinin bii. Minbuiin nɛbaa ǹ yiri nyaabaa ma ganaa.

³Man daraa sii-doɛ̃ ganaa wa, bɛ lɛ taman yii ni, ma ba Lawa doɛ̃ wa.

⁴Die na á dii lon á wusoo á gisĩ? Die na á piɛ̃ kũ ka a gɔn nɛ? Die na á mɔnaa pɛnɛ mu ganaa? Die na á n yiin doa tán gèlè tumaa la? Ǹ dɛnaa tɔ n die? A nɛgiĩ tɔ n die? N tá bɛ doɛ̃?

⁵Dɛnaa Lawa a boo tumaa na á kɔnbɔ ka foo doa ma-a nɛ, min mɛnɛn bɛ́ ǹ nə́ baa ǹ foo doa ǹ bǎã lɛa, a n goóro lɛa ǹ tamɛɛ.

⁶N nyan màn kɔn da a boo li wa, bɛ bie wa, á re puri n ni, á re pii n ni mà ma n soɛ boe.

⁷Maa Lawa, man màn màn paa dinsɔɔ̃ nyankoe n la, ǹ kɔ ma la ma laan mà man giɛ̃.

⁸Kɔkɔrɔbaa laanka soɛ wɔlɔ lui ma ganaa. N nyan doobaabaa laanka pàãmabaa kɔ ma la wa. Màn mɛn bɛ́ re toɛ ma la, bɛ dinsɔɔ̃ kɔ ma la.

⁹Taãn nɛ, bɛ̀ má pàãma baa á la yii ni, ma á boe la man piã n nɛ ma pɛ: «Die n ka Dɛnaa Lawa nɛ?» Bɛ̀ má doobaa baa á la yii ni, ma á boe la ma wurumu baa, ma maa Lawa tɔ ziziɛ̃.

¹⁰N nyan dí-nyali tɔ baraa pɛ a mìilandɛnaa yii-n wa. Bɛ bie wa, á re Lawa bíi n li, n tá re a nɔmaa we.

¹¹Min tɛnɛn man Lawa bíi ǹ di li, ǹ ba barka diɛ ǹ dan ganaa wa.

¹²«Min tɛnɛn man taasɛ mà sɔ̀n ba ǹsɛn ganaa wa, a da yaa ǹ gɔ̀ pii ǹ nə́ bɔ ǹ dinin ganaa wa.

¹³Din gole kɔ la min tɛnɛn yii ni. Maǹ giɛ ǹ miãn ganaa ka yii baraa nɛ.

¹⁴Min tɛnɛn sɔn man ka gɔya san bɛ́ lɔn. Ǹ paǹ gɔn we n ka gɔya bɛ́ lɔn. Maǹ kanaa lɛ a nɔmaa-wɔlen soɛ̃, maǹ doobaan papaɛ̃ ǹ tá ǹ boe minbuiinin bii.»

¹⁵Tìntìn a nɛlɔ n paa: Maǹ pii: «A kɔ! A kɔ!» Màn sɔɔ na a tan sii ba ǹ yii kiɛ̃ duduu wa, a siibaa ǹ wɔ tan a ba pii ǹ kɔn pinaa "ka toa miɛ̃" wa:

¹⁶Geren piɛ nɛ, lɔ mɛn bɛ́ a nɛ yii wa, tán mɛn bɛ́ mu ba a-n wa. Tɛ nɛ, a pii ǹ kɔn pinaa "ka toa miɛ" wa.

¹⁷Min mɛn bɛ́ yaa we ǹ di ganaa, a na a ba ǹ dan bɔlɔ sii wa, zankoon tá re a yii nànan fɔfoɛ̃, zèwon nə muĩ.

¹⁸Sii sɔɔ na a tan ma ba ǹ doɛ̃ wa, a siibaa ǹ wɔ tan ma ba a giala miɛ wa:

¹⁹Sia a yoo a wo lon ne, miɛ̃ a kiɛ̃ ǹ zii gɛ̀fu la, mu la ǹ goo á zii yìsi mu lalan. A siibaa ǹ wɔ tan: Bɛ n ka zii mɛn bɛ́ giĩ á koe lɛ a wo lɔ li.

²⁰Lɔ mɛn bɛ́ ǹ zuũ siɛ̃, a zɛnaa ǹ sii á ke: A n màn bii, a n lɛ turuu a pɛ: «Ma sii kɔn zɛnaa baraa wa.»

²¹Sii sɔɔ n kanaa diɛ bìn diɛ ganaa, a siibaa ǹ wɔ tan min ba boe la a si a ganaa wa:

²²Bɛ̀rɛ a kiibaa yɛ nɛ, yiriwɛɛnaa mɛn bɛ́ màn bii á la yii ni.

²³Lɔ sɔ̀n baraa dɛnaa a wɔ giĩ li. Lɔ a dí nya a giulun wole nə n bɔyaa a na a bǎã saa.

²⁴Tɔɔ bisin tɔrɔ sii na a tan tán la yiridɛnan lɛa:

²⁵Bonboonən manɛ. Ǹ pàã banban sɛnɛ manə ǹ màn-bii goɛ kaa-piɛ waáraa.

²⁶Damanan manɛ. Ǹ pàã banban sɛnɛ manə ǹ kion doe gɛ̀fu la.

²⁷Bisinin ni: Ǹ kii banban, sɛnɛ maǹ yui kuru lɛa ǹ kɔn kun tɛmɛtɛmɛ.

²⁸Bìãn manɛ. Ń tá boe la nə ǹ kũ n gɔn nɛ sɛnɛ a n we yǎa kii a kion.

²⁹Màn yiikoonaa sɔɔ na a tan ǹ tɔ wɔ ǹ gɔn nə́ siĩni, a siibaa ǹ wɔ a ga ma-a dɔ n kɔɔ̃nɛ:

³⁰Yàra nɛ, foo tãnaa nɛ don mànan tumaa bii, a baa sii màn kɔn nyɛɛ-n wa.

³¹Koo sa mɛn bɛ́ golee ne a gòãn la hinlaa butumu, kii mɛn bɛ́ tɔ we a sɔraasin tumaa nyɛɛnɛ.

³²Bɛ̀ n baãnaabaa n nə́ n din laakalaa, bɛ̀ n nə́ n taasɛ bɛ kio, n nyɛnaa boo diɛ nɛ.

³³Bɛ̀ n bɔ̀nyaa fu dɛ, a n nàari biɛ. Bɛ̀ màn nə́ n nyin dɛ, a n mà boe. Bɛ̀ n min foo da yoo ganaa, bɛ n die ka zia nɛ.