Read Samo, Southern Suu 31 Bible Online

Suu 31 - Samo, Southern bible

Suu 31

¹Boon kɛn man Masan kii Lemuweli a da ǹ boon lɛa ǹ dan n daraa a ganaa.

²N too kɔ maa nɛ, nsɛ mɛn bɛ́ má n yɛ má n da kanaa, nsɛ mɛn bɛ́ ma goã n yii diɛ n la.

³Maa nɛ, n nyan toa lɔn nə n pàã nya wa. Lɔn mɛnɛn bɛ́ kiin papaɛ̃, n nyan toa bɛn nə n yiri si wa.

⁴Duvɛ̃ ba siĩn kii wɔ lɛa wa. Yɔ kaka a siĩn kiãn wɔ lɛa wa.

⁵Bɛ̀ ǹ nə́ mi, ǹ yiri n boe ka dí-pɛn nɛ, ǹ ba kiri pepere we doobaan nɛ wa.

⁶Min mɛn bɛ́ re giɛ̃, ka yɔ kaka kɔ bɛ la, hinlaa min mɛn yɔrɔ bɛ́ kɔsiɛ nɛ, ka duvɛ̃ kɔ bɛ la.

⁷Bɛ̀ á mi, a yiri á re boe ka a doobaabaa nɛ, a yiri a re gisiĩ a koe kɛ-n doo wa.

⁸Min mɛnɛn doamaa bɛ́ a bie ka boo diɛ-n wa, n lɛ bũ n boo da bɛn lɛa. Ǹ nə n la bɔ min mɛn tumaa ganaa, bɛn boo gii da.

⁹N lɛ bũ n kiri kuru ka peperebaa nɛ. Boo da nɔmaa-wɔlen laanka doobaan lɛa.

¹⁰Lɔ mɛn foo bɛ́ tã, die n die bɛ yii? A barka la nyaǹ mànan manɛ.

¹¹Ǹ zuũ foo n doa nɛ a ganaa taãn-taãnɛ. Ǹ zuũ á re doobaa biɛ duduu wa.

¹²A n sii bǐɛ̃ zɛnɛɛ nɛ a yiikoonaabaa gɔ́ɔ̃ nɛ baraabaraa. A baraa zɛnɛɛ-n duduu wa.

¹³A n giɛ sère ka li ka gɛ̀sɛ sonbore ne, a n dí nyɛɛ ka a gɔn nɛ parsiini.

¹⁴Ká pii kɔ ǹ mu la ǹ goo bɛ́ lɔn, a n boe ka a màn-bii-n wɔlɔ sɔsɔɔ nɛ a n die ne.

¹⁵A n yui bɛ̀ wɔlɔ á tɔn tì, a màn-bii zɛnaa a kion minin wɔ lɛa, a dí kɔ a dí-nyalin la.

¹⁶A n taasiɛ we, a wuru pii. A bɛ́ wɔrɔ mɛn yii, a n da wuru boe ne.

¹⁷A n dí nyɛɛ ka foo tãbaa nɛ. A giɛ̃ tán kooro mà a na a dí nyɛɛ wa.

¹⁸A yii na a siin tumaa ganaa yɔrɔ yii. A bolon nə kuĩ a làan kɔ.

¹⁹A n koára miɛ̃ taãn-taãnɛ, a gɔnɔn man mɔnaa tiɛ̃.

²⁰A nə n doe nɔmaa-wɔlen lɛ, a n doobaan goe.

²¹A nyɛ́ɛ biɛ nyan nɛ a sumu minin lɛa wa. A giala mɔnaa sonboren tá ǹ tumaa lon.

²²A n kɔmalɛn tiɛ̃, a dɔnkɛn man gɛsɛ bisin tã sonbore lɛa.

²³Ǹ zuũ n kiã lɛa, a yii n guguru. A n woe kiwi lɛa min golen lɛsɔkɔn bǎã nɛ.

²⁴A n mɔnaa nimi, a tá siɛ̃. A n maabɛlɛn zɛnɛɛ, a nə́ ǹ siɛ̃ pii-kɔlen la.

²⁵Pàã laanka tɔ bɔ n nyaǹ màn lɛa a ganaa. A n giɛ biɛ̃ ǹ ganaa, a foo n doa nɛ.

²⁶A n boo diɛ ka sii-doɛ̃ nɛ, a n doroo koe ka foo basiɛ̃ nɛ.

²⁷Sii mɛn tumaa bɛ́ n zɛnɛɛ a kion, a n giɛ bɛ walan. A nə n piɛ̃ ka gɔnɔn kaa ma kolo-n ne.

²⁸A nɛnyaanan man a laakalɛɛ min tumaa yɔrɔ-a, ǹ zuũ dɔ na a tɔ boe:

²⁹«Lɔ gigiã foo á tã, sɛnɛ nsɛ la ǹ tumaa nɛ.»

³⁰Siĩnbaa n min siɛ̃, a beleboe wa. Lɔ mɛn bɛ́ Dɛnaa Lawa guguru koe, bɛ dinsɔɔ̃ na á kɔnbɔ ka tɔ bɔ nɛ.

³¹A bɛ́ sii mɛn zɛnɛɛ, ka saraa bɛa lɛa. Kiwi tumaa doamaa nɛ ǹ na a tɔ bɔ a dí nyɛɛ kɛ a lɛa.