Read Samo, Southern Suu 5 Bible Online

Suu 5 - Samo, Southern bible

Suu 5

¹Maa nɛ, ń yiri kɔ sii-doɛ̃ boon kɛn li ma á n darɛɛ ǹ ganaa, n nə n too kɔ maa doroon kɛn li ma á ǹ koe n la.

²Ń tá re yiridɛnaa biɛ, ka bɛ dɔ nɛ, n da ǹ boon tá re yiridɛnan wɔ biɛ.

³A giala, min kɔsɔ a lɔ lɛ gɔ́ɔ̃ ǹ boo maǹ paparɛ ka zoo nyɔɔ bɛ́ lɔn, susuu á la nyɔɔ nɛ.

⁴Sɛnɛ, a nə n gɔn nyɔmiɛ̃ kɔɔsɛ ka sèwò bɛ́ lɔn. A n baraa ka gɔya sa lɛ bɔle bɛ́ lɔn.

⁵Bɛa lɔ kɛ miã a giã ǹ gɔn nə gɛ̀ koe min la. A gòã goɛ̃ n woe yala ganaa.

⁶A ba yiikoonaabaa ǹ zii siɛ wa. A siɛ̃ zii ganaa a ná a ba doɛ̃ wa.

⁷Kanna kəni maa nɛ, n too kɔ ma lon. N nyan nə n piã ka maa doroon kɛn nɛ wa.

⁸N wɔlɔ lui bɛa lɔ kɛ miã ganaa, n nyan toa n nə n mɔrɔ a kiɛnlɛ ganaa wa.

⁹Bɛ bie wa, n tɔn kiɛ̃ n nə n din kɔ min kɔsɔ la, n nə n din nyin wɔ makara doɛ̃ baã wole gɔn.

¹⁰Bɛ bie wa, n tá re dí nyɛɛ tiin manɛ, n gɔn màn nə min kɔsɔ wɔ baa.

¹¹N tɔn kiɛ̃ n ginii wɔ n lɛ nyɔmiɛ̃ biikoo li, bɛ̀ n pàã bɛ á nya.

¹²Bɛa waáraa kəni, n tá re pii: «A na á saa lɔn má daraan tii, man piã ka doroon ne?

¹³Wàa na á baa man too kɔ maa mìinaan boo li wa, man too da maa daraalin lon wa?

¹⁴Á ke! Kanna kəni, koe n boe ma ganaa maa zaman bii, maa minin bii!»

¹⁵N lɔ n ka mu piã bɛ́ lɔn, n dinsɔɔ̃ bɛa mu kɛ lɛ mi.

¹⁶N nyan toa bɛa mu lɛ baa si a soo kanaa hinlaa a wo pii-n wa.

¹⁷Toa a goã n dinsɔɔ̃ wɔ lɛa, n nyan gii kɔn ka tiin ni wa.

¹⁸Toa n foo kɔɔ̃n kɔ kun ka n tenmaa waáraa lɔ kɛ nɛ.

¹⁹A siĩnbaa n ka yuùn wɔ bɛ́ lɔn. Toa a kɔn-narɛɛ goã n foo ne, a n foo kɔɔ̃n kɔ biikoo yii li.

²⁰Maa nɛ, wàa na á baa n nə́ min kɔsɔ a lɔ narɛ, n nə n gɔn talɛɛ lɔ kɔsɔ tìã bii?

²¹Dɛnaa Lawa yii-n minbuiin nɛ tumaa a zɛnaa ǹ siin ganaa, a tá ǹ ziin tumaa doɛ̃.

²²Min baraa n mɛnɛɛ a din a kan nɛ. A din a sii baraa lɛ nə n pɛnɛ a ganaa ka kan bɛ́ lɔn.

²³Min mɛn bɛ́ a boe a din la wa, a n giɛ̃. A gàãn gole lɛ n diɛ papaã ganaa.