Read Samo, Southern BLS 1 Bible Online

BLS 1 - Samo, Southern bible

BLS 1

¹Sii-dɔ̃li ke Davida a nɛgiĩ lɛa, kii lɛa Zeruzalɛmu kiwi, bɛa da ǹ boon man ka kɛn nɛ.

²A na á pɛ kɛnɛn: A giala din na a banban. Sii woo sii, a giala din na a banban.

³Minbuiin nɛ bɛ́ dí kaka mɛn tumaa nyɛɛ kanaa kɛ nɛ, a n wàa là yii a nɛ?

⁴Minin manə n boe ǹ wasa nɛ, kɔsɔn nə daa. Sɛnɛ, tán na a din lɛa miɛ̃, duduu.

⁵Wasa n boe, wasa nə n yii siɛ̃. A nə n nanaɛ bɛ̀ a wo a bɔ ǹ bǎã-n doo.

⁶Piɛ̃ n boe a wo gusin a lɛ̀gɔn li, a n pɛnɛ a wo gɔsɛ a lɛ̀gɔn li, a n pɛnɛ, a n pɛnɛ miɛ̃, a wusoo doo a kɔ a din basa goon lɛ lɛ.

⁷Tàn mu tumaa n baa sii woe kiɛ yìsi mu li. Sɛnɛ yìsi mu lɛ a piɛ̃ wa. Tàn mu bɛ́ baa sii woe bǎã mɛn li, maǹ baa la miɛ̃ woe walan li.

⁸Màn din tumaa n dí nyɛɛ, minbuiin nɛ ba boe a pɛ la wa. Ga ba yii nàn boe wa. Too bɛ́ màn mɛn miɛ̃, bɛa piɛ̃ wa.

⁹Màn mɛn nə goã a tan, bɛ lɛ n die goɛ̃. Sii mɛn nə goã á n zɛnaa, bɛ lɛ n die n zɛnɛɛ. Sii dii kɔn ba kanaa kɛ-n wa.

¹⁰Ta màn tan, min nə́ boe la a boo da a wɔ paǹ li, mà ǹ ga kɛ ganaa, mà màn dii ni, bɛa màn kɛ lɛ goã a tan haalɛ bibi, bɛ̀ wɔ tɔn yɛ wa.

¹¹Siin mɛnɛn nə kiɛ̃, yiri ba goɛ̃ ǹ nɛ wa. A din yɔrɔ goon lɛ la, siin mɛnɛn bɛ́ re n zɛnɛɛ, min mɛnɛn bɛ́ kio die, bɛn dɔn yiri ba re goɛ̃ ǹ nɛ wa.

¹²Masɛ din sii-dɔ̃li, má kii baa Izirayeli gána mìi la, Zeruzalɛmu kiwi.

¹³Sii mɛn tumaa bɛ́ n zɛnɛɛ kanaa kɛ nɛ, má da ma foo ne, má bɛ yii gɔsɛ ka sii-doɛ̃ nɛ, máa ma a giala ma: dí kaka n ka kɛ nɛ, Lawa da minbuiin nɛ mìi ni.

¹⁴Dí mɛn tumaa bɛ́ n nyɛɛ kanaa, má a yii yɛ. Sɛnɛ, á ke bɛ kɔn giala banban, a n ka min nə piɛ̃ lui.

¹⁵Màn mɛn bɛ́ pusii ni, bɛ ba boe la a n tele wa. Màn mɛn bɛ́ a banban, bɛ ba boe la a n nimi wa.

¹⁶ Má pɛ ma din gɔ́ɔ̃-n máa: á ke, má màn gole baa, min mɛnɛn tumaa Zeruzalɛmu a kii baa ma nyɛɛnɛ, maa sii-doɛ̃ la bɛn wɔ nɛ. Má sii-doɛ̃ gole yɛ, ka doɛ̃ nɛ.

¹⁷Má da ma foo ne, máa ma yii dɔ sii-doɛ̃ laanka doɛ̃ gɔ́ɔ̃ nɛ, baãnaabaa laanka gàãnaabaa nɛ. Sɛnɛ má yɛ, bɛ dɔ n piɛ̃ loo lɛa.

¹⁸A giala, bɛ̀ sii-doɛ̃ gole tá n lon, n taasiɛ dɔ n mɔnɛɛ. Bɛ̀ ń màn da n doɛ̃ li, màn nə miɛ̃ n nɔmaa dɔ li.