Read Samo, Southern BLS 3 Bible Online

BLS 3 - Samo, Southern bible

BLS 3

¹Sii din tumaa laanka a waáraa nɛ. Màn din tumaa laanka a biikoo ne kanaa kɛ nɛ.

²Yɛ biikoo tan, gɛ̀-wɔ biikoo tan. Da-zumii biikoo tan, da-woɛ̃ biikoo tan.

³Gɛ̀-dɛ biikoo tan, da gòã-diɛ biikoo tan. Màn-wurii biikoo tan, màn-doe biikoo tan.

⁴Wuu-pɛ biikoo tan, yaa-wɔ biikoo tan. Lala-diɛ biikoo tan, bɛ̀-baa biikoo tan.

⁵Giã-kũ biikoo tan, toɛ̃-kɔn biikoo tan[1]. Sɔɔ min ni biikoo tan, sɔɔ min ni baã biikoo tan.

⁶Ga màn li biikoo tan, màn a papaã biikoo tan. Màn-koa biikoo tan, màn-daa biikoo tan.

⁷Màn-toɛ̃ biikoo tan, màn-nimii biikoo tan. Lɛ-tiɛ̃ biikoo tan, boo-diɛ biikoo tan.

⁸Min-narɛɛ biikoo tan, min baa zɔ́ɔ biikoo tan. Zia biikoo tan, là nyantoro biikoo tan.

⁹Dí-nyali bɛ́ dí mɛn nyɛɛ, a n wàa là yii a nɛ?

¹⁰Lawa bɛ́ dí mɛn koe minbuiin nɛ la, mà a nɔmaa la, ma yii tá bɛ ganaa.

¹¹Lawa n sii tumaa zɛnɛɛ siĩni, a kɔnpɛ ka a biikoo ne. Ka bɛ dɔ nɛ, biikoo mɛn bɛ́ nyɛɛn sɔsɔɔ, Lawa bɛ dɔ din a doɛ̃ a taasiɛ wɔ minbuiin nɛ foo ne, a laanɛ ǹ ba boe la ǹ tá Lawa a sii zɛnaa giala miɛ wa, a saa a giala-kɔ ganaa, a wo kaa a gɔn nyɔmiɛ̃ lɛ.

¹²Má tɔ́n dɔ̃, máa màn kɔn din ba soɛ minbuiin nɛ ganaa wa. Bɛ̀ á n bɔ, a n nyɛnyɛɛ, a ga a din a bǐɛ̃-kɔ li, a yiikoonaabaa gɔ́ɔ̃ nɛ.

¹³A giala, bɛ̀ min woo min tá màn bii, á n màn mii, a bɛ́ màn mɛn boe a dí ni, a nə́ n nyɛnyɛɛ bɛ la, Lawa a bǐɛ̃ n ka bɛ nɛ.

¹⁴Má dɔ̃, máa Lawa bɛ́ sii mɛn tumaa zɛnɛɛ, bɛ n bele-boe yǎa duduu. Màn kɔn ba n diɛ li doɛ̃ wa, màn kɔn ba n boe lɛ doɛ̃ wa. Lawa n bɛ zɛnɛɛ, màn mɛn bɛ́ toɛ ǹ nyɛ́ɛ baa asɛ yii ni.

¹⁵Màn mɛn bɛ́ a tan, bɛ́ goã a tan. Sii mɛn bɛ́ nyɛɛnɛ die n zɛnɛɛ, bɛ bin nə́ n zɛnaa. Sii mɛn nə kiɛ̃, Lawa n wusii a da ka bɛ nɛ.

¹⁶Ka bɛ dɔ nɛ, kanaa kɛ nɛ, má yɛ doo, baraabaa na á mɛ sii yɔrɔ bɔ bǎã nɛ, baraabaa na á mɛ peperebaa bǎã nɛ.

¹⁷Má pɛ ma din gɔ́ɔ̃-n máa: Lawa á re kiri kuri min pepere laanka min baraa la. A giala, sii tumaa laanka a waáraa nɛ, dí tumaa laanka a biikoo ne.

¹⁸Minbuiin nɛn wɔ paǹ li, má pɛ ma din gɔ́ɔ̃-n máa: Lawa n giɛ li, a n da ǹ gɔ́ɔ̃ li, màn mɛn bɛ́ toɛ ǹ dininmaan nə yɛ, mà màn kɔn bie ka ǹsɛn nɛ, tɔɔn kio wa.

¹⁹A giala sii mɛn bɛ́ minbuiinin yii, a din lɛ dɔ n tɔɔn yii. Sii goon nə ǹ dinin tumaa yii. Tɔɔn bɛ́ giɛ̃ lɔn, minbuiin nɛn dɔn man giɛ̃ miɛ̃. Fɔfoã mɛn bɛ́ ǹ nɛ, a n goon. Minbuiin nɛ ba soɛ tɔɔ-n wa. Sii kɔn din giala banban.

²⁰Màn tumaa a giala-nyɔmɔɔ ǹ gɔn nə goon, màn tumaa n tii lɛa, màn tumaa nə n bɔyɛɛ a wo tii li.

²¹Fɔfoã mɛn bɛ́ minbuiin nɛ nɛ, die n bɛ doɛ̃? A n die woe lon, tɔɔ a fɔfoã sɛ n gisĩ woe tán?

²²Má tɔ́n yɛ, máa màn kɔn din ba soɛ minbuiin nɛ ganaa wa. Bɛ̀ á n bɔ, a bɛ́ dín mɛnɛn nyɛɛ, a n nyɛnyɛɛ bɛn la. Bɛ lɛ na a wɔ gii lɛa, a giala sii mɛn bɛ́ re n zɛnɛɛ a gɛ̀ kio, die n die kuĩ a da bɛ nyaa nɛ?