Read Samo, Southern BLS 4 Bible Online

BLS 4 - Samo, Southern bible

BLS 4

¹Bɛ kio, bɔ kɔn yii ni ǹ siin mɛnɛn bɛ́ n zɛnɛɛ kanaa kɛ nɛ, má wusoo má n yii wɔ bɛn nɛ, má ga ǹ ganaa. Sɛnɛ á ke, ǹ bɛ́ boe min mɛnɛn yii ni, bɛn maǹ wuu pii, ǹ lɛ tã wole banban wa. Min mɛnɛn lɛn bɛ́ boe ǹ yii ni, pàã lɛ n bɛn lon, kɛn lɛ tã wole banban wa.

²Bɛ lɛ n ke, masɛ á pii, máa min mɛnɛn nə saa lɛlɛ ǹ nə́ gã, máa bɛn dinin wɔ á soɛ yiikoonaan kɛn wɔ nɛ, tɔn nə ǹ tan.

³Máa min mɛn bɛ́ a tɔn yɛ duduu wa, máa bɛ dɔ wɔ á soɛ doo, á la geren lɛn laanka yiikoonaan lɛn wɔ nɛ, a giala dí baraa mɛn bɛ́ n nyɛɛ kanaa kɛ nɛ, asɛ bɛ yɛ ka a yii-n wa.

⁴Má yɛ dɔn, máa dí din tumaa, sii a bǐɛ̃-kɔ din tumaa, foo a wuu pɛ kɔn li ni. Bɛ dɔ giala banban, a n piɛ̃ loo lɛa.

⁵Baãnaa nə n gɔnɔn kiɛ a kolo-n. A n bɔ̀n diɛ a din ganaa.

⁶Sɛnɛ dí mɛn nə́ ke piɛ̃ loo lɛa, min laan bɛ̀ a nə n din koe bɛ la, a susu boɛɛn tá soɛ.

⁷Má wusoo doo, má sii lɛ a kɔsɔ yɛ kanaa kɛ nɛ, á n piɛ̃ loo lɛa.

⁸Min nə ke a dinsɔɔ̃, a min kɔsɔ banban wa. A banban nɛ lɛa wa, a banban dɔɔ̃n lɛa wa. A da yaa, bɛa dɛnaa kɛ lɛ n kɔn ka di-n miɛ̃ duduu, gɔn màn ba doe a yii li wa. Die a lɛa nɛ, á n dí nyɛɛ, á n nyɛnyɛɛ lɛ tiɛ̃ a din ganaa? Bɛ dɔ giala banban, a n foo busi a tɔ-a.

⁹Min paa tá soɛ min goon ne. A giala, ǹ tá saraa gole yii ǹ dí ni.

¹⁰Sonbore, bɛ̀ ǹ goon mɛnaa, ǹ miã lɛ á siɛ a da lon. Sɛnɛ, min mɛn bɛ́ a dinsɔɔ̃, bɛ wɔ n ka bɔ̀n nɛ! Bɛ̀ á mɛnaa, ǹ miã banban, bɛ́ n die siɛ a da lon wa.

¹¹Ka bɛ dɔ nɛ, bɛ̀ minin nə́ waa tán kun min paa, sɛ̀fuu á boe ǹ ganaa. Sɛnɛ, min mɛn dinsɔɔ̃ bɛ́ nɛ, sɛ̀fuu n siɛ lɔn a tɔn bɔ a ganaa?

¹²Bɛ̀ min pàã la min goon ne, min paa tá boe la a n gòãn doa a ganaa. Biɛ mɛn bɛ́ nɛ sɔɔ, bɛ á niɛ̃ fufuu wa.

¹³Nɛginin ten mɛn nə́ ke doobaa lɛa, sii doɛ̃, bɛ á soɛ kii ni, ǹ mɛn nə́ ke á zizi kɔ, baãnaa lɛa, a ná a ba doree sii doo wa.

¹⁴Ta bɛa nɛginin kɛ lɛ na á yɛ doobaa lɛa, ta a na á soo kòso kion á pàã saa,

¹⁵má yɛ, máa min mɛnɛn tumaa yii bɛ́ koo, ǹ gòã ń siɛ kanaa kɛ nɛ, bɛn man die koe nɛginin lɛ kio lɛ, kii mɛn lɛ goã a nyɛɛn lɛlɛ, ǹ bɛ toa walan.

¹⁶Zaman mɛn tumaa bɛ́ nɛginin lɛ ń die goɛ̃ ǹ mìi la, bɛn man die mɔnɛɛ a tɔ-a. Sɛnɛ, min kɔsɔn mɛnɛn bɛ́ kio die, bɛn nə́ boe la ǹ nə́ ǹ ba n nyɛnyɛɛ ka nɛginin lɛ a sii-n wa. Bɛ dɔ giala banban, a n piɛ̃ loo lɛa.

¹⁷Bɛ̀ n tá woe Lawa a kion, yiri bɔ n gòã-saa li. N zɔ̃ n dɔ, n nə n too kɔ, n Lawa bɔlɔ si, n baran baãnaan wúlu kɛ tɔrɔ bɔ wa. A giala bɛn ba doɛ̃ mà ǹsɛn tá baraa zɛnɛɛ wa.