Read Samo, Southern BLS 5 Bible Online

BLS 5 - Samo, Southern bible

BLS 5

¹N baran saa lɛlɛ, n boo da wa. Boo baran n si n lɛ la, Lawa yɔrɔ-a wa. A giala, Lawa n lon, nsɛ n tán. Bɛ lɛ nɛ, n boo baran toa a mɔnaa wa.

²Sonbore, taasiɛ gigiã n die ka narɛɛ nɛ. Boo gigiã n min biɛ baãnaa lɛa.

³ Bɛ̀ ń lɛ-kɔ wɔ Lawa nɛ, n baran n lɔlɔɔ a lɛ piɛ̃ li wa. A giala baãnaan sii ba kiɛ Lawa foo la wa. N bɛ́ ń lɛ-kɔ mɛn wɔ, bɛ lɛ pã.

⁴Màn mɛn tá a ganaa, n lɛ-kɔ wɔ, ń nə́ n ba re a lɛ piɛ̃ wa, á soɛ n ganaa, n baran lɛ-kɔ wɔ wa.

⁵N baran toa n lɛ nə n da sii baraa zɛnaa-a wa. N baran wo pɛ Lawa a dí-nyali ni, mà sã-n wa. Wàa na á baa Lawa foo n die yui, n da ǹ boon kɛn taman yii, a n nya ǹ dí ziziɛ̃?

⁶A giala, boo punpun lɛ n kooro lɛa, ka narɛɛ didi bɛ́ lɔn. Bɛ lɛ nɛ, nyɛ́ɛ baa Lawa yii ni.

⁷Bɛ̀ ń yɛ gána nɛ, ǹ nə́ boe doobaa yii ni, ǹ nə́ sii yɔrɔ bɔ ǹ zii laanka peperebaa toɛ walan, bɛ baran kaãbaa da n-a wa. A giala, min mɛn nə́ ke nyɛɛn gole, min kɔsɔ tan gole bɛ dɔ mìi la, bɛn dɔn mìi la doo, minin tan dadara.

⁸Tán a là nə ǹ dinin tumaa ganaa. Tán dí n kii pàã lɛa.

⁹Min mɛn bɛ́ paa narɛ, paa ba doe bɛ yii li wa. Min mɛn bɛ́ gɔn màn narɛ, bɛ ba a là yii wa. Bɛ dɔ giala banban.

¹⁰Bɛ̀ gɔn màn mɔnaa, a biili dɔ n mɔnɛɛ. Wàa là nə ǹ dɛnaa wɔ lɛa? Bɛ̀ á n bɔ a yii mɛn bɛ́ a ganaa.

¹¹Min mɛn bɛ́ dí nyɛɛ, bɛ n nyuù kɔɔ̃n we, ta a na á màn bii boɛɛn hinlaa didi. Sɛnɛ pàãma sɛ a màn-kiɛ̃ ba toɛ á nyuù we wa.

¹²Má koe sii kaka goon yɛ kanaa kɛ nɛ: min na a naforo koa, a wo koe baa ǹ dɛnaa ganaa.

¹³Bɛa naforo lɛ yoo a ziziɛ̃ sii kaka gɔ́ɔ̃ nɛ, bɛ̀ ǹ dɛnaa nɛ yɛ, màn kɔn ná a ba a gɔn doo wa.

¹⁴ A gɔn kooro soo ǹ dan gɔ́ɔ̃-n lɔn, a gɔn kooro n die n bɔyɛɛ miɛ̃. A da lɔn, a n die woe miɛ̃. Màn kɔn bie á n die woe ne a gɔn wa.

¹⁵A goã á daa lɔn, a wusoo a wo miɛ̃ kɛ lɛ, bɛ dɔ n sii lɛa, a lɛ n we. A bɛ́ á dí mɛn nya, á ń piɛ̃ loo lɛa, a n wàa là yii bɛ nɛ?

¹⁶Ka bɛ dɔ nɛ, a na a yiikoonaabaa biikoo tumaa zɛnɛɛ wɔlɔ tì li, a n taasiɛ gigiã we, busu na a ganaa, a foo dɔ n yoo ne.

¹⁷Ma màn mɛn yɛ siĩni, bɛ á ke: min nə siĩni, a màn bii, a màn mi. Lawa bɛ́ á lɛawaan mɛnɛn kɔ la kanaa, a bɛ́ dí mɛn tumaa nyɛɛ bɛn gɔ́ɔ̃ nɛ, a bɛ́ màn mɛn tumaa boe bɛ nɛ, a n siĩni, a n nyɛnyɛɛ bɛ la, a giala a wɔ gii n ka bɛ lɛ nɛ.

¹⁸Sɛnɛ, bɛ̀ Lawa naforo laanka gɔn màn kɔ min mɛn la, á ná a bii ǹ lɛ dɔ kɔ la, á baa a wɔ gii lɛa, mà a n nyɛnyɛɛ a dí gɔ́ɔ̃ nɛ, bɛ n Lawa a bǐɛ̃ lɛa.

¹⁹Sonbore, bɛa min lɛ ba re yiri boe a yiikoonaabaa li taãn wa, a giala, Lawa nyɛnyɛɛ mɛn kɔ la, a n die n siɛ bɛ li.