Read Samo, Southern BLS 9 Bible Online

BLS 9 - Samo, Southern bible

BLS 9

¹Ma màn mɛn tumaa yɛ, má tɔ́n nə n yii wɔ bɛ nɛ, má ga a ganaa. Má yɛ, máa min peperen ne, sii-dɔ̃lin ni, ǹ nya ǹ dín ni, maǹ Lawa gɔn. Lawa n die n yɔrɔ bǐɛ̃ diɛ minbuiin nɛ la, hinlaa a na a die n yɔrɔ bǐɛ̃ diɛ la wa, min ba bɛ doɛ̃ wa. Min ba boe la a bɛ kɔn toa nyɛɛnɛ a dɔ̃ wa.

²A din sii goon nə min tumaa yii. A din sii goon nə min pepere laanka min baraa yii. Min mɛn bɛ́ wúlu boe, a n bɛ yii, min mɛn bɛ́ a wúlu boe wa, a n bɛ dɔ yii. A n min bǐɛ̃ yii, ka sii baraa-zɛnaali dɔ nɛ. Min mɛn bɛ́ n liɛ, a n bɛ yii, min mɛn bɛ́ a n liɛ wa, a n bɛ dɔ yii.

³A din sii goon a min tumaa yɛ ke, ǹ nə́ giɛ̃, bɛ n sii kaka lɛa, siin kɛn bii, n zɛnɛɛ kanaa. Bɛ lɛ dɔ nɛ, minbuiin nɛn foo pã ka sii baraa nɛ. A ǹ toa ǹ yii n koo, gàãnaabaa nə ǹ ganaa. Bɛ kio, ǹ gɔn nyɔmɔɔ ǹ bǎã n geren li.

⁴Sɛnɛ, min mɛnɛn tumaa yii bɛ́ koo, foo-doa tá bɛn lon. A giala, doobaa yiikoonaa á soɛ pàãma gere ne.

⁵Sonbore, yiikoonaan tá doɛ̃ mà ǹsɛn tá re giɛ̃. Sɛnɛ, geren ba màn kɔn doɛ̃ duduu wa. Ǹ ba n yii diɛ màn kɔn la doo wa. A giala, yiri bɔ ǹ nɛ.

⁶Ǹ kɔn-narɛɛ nɛ, ǹ baa zɔ́ɔbaa nɛ, ǹ foo a wuu pɛ nɛ, bɛn nə́ nya gɔrɔ. Màn mɛn din tumaa bɛ́ n zɛnɛɛ kanaa kɛ nɛ, ǹ ba re, ǹ wɔ gii yii bɛ-n doo duduu wa.

⁷Bɛ lɛ n kaa, màn bii ka nyɛnyɛɛ nɛ. N duvɛ̃ mi ka foo kɔɔ̃nbaa nɛ, a giala Lawa lɛ kɔ n nya ǹ dín ganaa gɔrɔ.

⁸Nyaǹ bɔ ǹ mɔnaan wɔ biikoo yii li, n nə n nyɛnyɛɛ sɔnbɔraanɛ.

⁹N yiikoonaabaa lɛawaan kɛn lɛn mìi ná a ba la wa, Lawa nə́ ǹ kɔ n la kanaa, bɛn tumaa gɔ́ɔ̃ nɛ, n bɛ́ lɔ mɛn narɛ, toa n nə n dùũ bɔ kanaa kun ka bɛ nɛ. A giala, n wɔ gii n ka bɛ lɛ nɛ, dí kɛ gɔ́ɔ̃ nɛ n tá nyɛɛ kanaa.

¹⁰N bɛ́ re dí mɛn tumaa nyɛɛ, bɛ kũ ka n foo ne. A giala, n bɛ́ re woe bǎã mɛn nɛ, geren piɛ lɛ, dí ba walan wa, taasiɛ banban wa, doɛ̃ laanka sii-doɛ̃ banban wa.

¹¹Má yɛ doo kanaa kɛ nɛ: min mɛnɛn bɛ́ ǹ baa si miã banban wa, baa-si a gɔ̀lɔ̀baa bie bɛn wɔ lɛa, biikoo tumaa li wa. Min mɛnɛn bɛ́ ǹ kakabaa miã banban wa, zia a gɔ̀lɔ̀baa bie bɛn wɔ lɛa, biikoo tumaa li wa. Min mɛnɛn bɛ́ ǹ sii-doɛ̃ miã banban wa, lɛ-a ǹ bii yɛ bie bɛn wɔ lɛa, biikoo tumaa li wa. Min mɛnɛn bɛ́ ǹ yiri miã banban wa, naforo bie bɛn wɔ lɛa, biikoo tumaa li wa. Min mɛnɛn bɛ́ ǹ doɛ̃ miã banban wa, sii lɛ bie koo bɛn gɔn biikoo tumaa li wa. A giala, biikoo laanka sii tá parɛɛ ǹ tumaa ganaa.

¹²Sonbore, minbuiin nɛ ba gɛ̀ a daa biikoo doɛ̃ wa. Zɔ̀ kũ ǹ zɔ̀ɔ bɛ́ zɔ̀ kuĩ lɔn, biɛ bɛ́ bàan kuĩ lɔn, gɛ̀ lɛ dɔ n die minbuiin nɛ tɔwɛɛ miɛ̃. A n die n diɛ la bǎã goon ne, a yiri ná a ba li wa.

¹³Sii-doɛ̃ wɔ paǹ li, má n yiri kɔ sii kɔn li kanaa kɛ nɛ, á sii gole lɛa ma yii li.

¹⁴Kiwi boɛɛn goon na á goã, a zaman ba tɛ wa. Kii gole goon na á daa kɔ lɛ á kũ, á bǎãn tã a ganaa.

¹⁵Sɛnɛ, giĩ goon goã kiwi lɛ nɛ, doobaa nɛ, sii-doɛ̃ ná a lon. Bɛa giĩ lɛ kiwi lɛ si á da, ka a sii-doɛ̃ nɛ. Sɛnɛ, min kɔn nə n yiri koa ka bɛa giĩ doobaa kɛ lɛ-n wa.

¹⁶Má tɔ́n pɛ, máa sii-doɛ̃ tá soɛ pàã nɛ. Sɛnɛ, maǹ pàã boe doobaa a sii-doɛ̃ nɛ, ǹ ba n too koe a lon wa.

¹⁷Ǹ tá n too koe sii-dɔ̃lin boo basiɛ̃n ganaa, á la baãnaan nyɛɛnaandɛnaa a lɛ-dɛn manɛ.

¹⁸Sii-doɛ̃ tá soɛ ziabaa ǹ mànan manɛ. Sɛnɛ baãnaa goon nə sii bǐɛ̃ gigiã ziziɛ̃.