Read Samo, Southern LKK 1 Bible Online

LKK 1 - Samo, Southern bible

LKK 1

¹ Salomɔn a loe n ka kɛ nɛ. Salomɔn a loe kɔɔ̃n kɔɔ̃n nɛ.

²N sɔɔ ma nɛ, n sɔɔ ma-n kəni. A giala n kɔn-narɛɛ lɛ á soɛ duvɛ̃ nɛ,

³á soɛ n nyɔɔn kɛn gìĩ ni. N tɔ nə́ n da wɔlɔ la ka nyɔɔ gìĩ kɔɔ̃n bɛ́ lɔn. Bɛ lɛ din taãn nə ke toɛ, nɛnɛn yii á boe n li.

⁴Ma kũ n ma da n kio, wɔ baa si. Ma n maa kii lɛa, ma kũ n wo ma nɛ n waa ǹ kion, n wɔ dinin paanan kaa nyɛnyɛɛ li, n wɔ foo kɔɔ̃n kɔ. N kɔn-narɛɛ ke a soɛ duvɛ̃ nɛ. Sonbore tá nɛnɛn lɛn lon, ǹ nə n narɛ.

⁵Zeruzalɛmu nɛnɛn lɛn, masɛ gɔ̀nɔn nə tì birəəne, sɛnɛ ma á siĩni. Kedaara minin kionən kɛn, ma gɔnɔn lɛ n tì birəə miɛ̃. A laanka bɛ yii ni, masɛ n siĩni, ka Salomɔn a kion mɔnaa nyaǹ dɛnan kɛn bɛ́ lɔn.

⁶Ka baran ga maa tì birəəbaa kɛ-a wa, wasa na á ma dɛ. Ma dannɛn foo na á goã á yoo ma li, ǹ nə́ tɔ́n ma koa *rezɛ̃ da wurun li. Ma dinmaa gɔ̀nɔn kɛ sɛ, ma boo la má ga bɛ walan wa.

⁷Nsɛ mɛn lɛ bɛ́ ma tá n narɛ, a pɛ ma-n le, ma n die woe ǹ tɔɔn lɛn lɛduĩ maa kəni? Penleen ne, ma n die ǹ tɔɔn lɛn mìi susui maa kəni? A pɛ ma nɛ, màn mɛn bɛ́ toɛ n miã tɔɔn-lɛduə̃lin kɛn, bɛn baran ma baa giĩn-kuruli lɛa wa.

⁸Nsɛ mɛn bɛ́, n siĩnbaa miã ná a banban lɔn bii wa, bɛ̀ n ba bǎã lɛ doɛ̃ wa, n die n soo, n kɔ tɔɔn lɛn basa lɛ, n nə n bòe nɛn kɛn lɛduə̃, tɔɔn-lɛduə̃lin giã ǹ bǎãn genli.

⁹Maa paa ǹ wɔ, maa nyaǹ màn! Ń ke ka sùi dan kɛ nɛ, bɛ̀ ǹ da kii *Faarahɔn a wotoro-a.

¹⁰Too kaaranan kɛn nə́ na n ganaa, bɔlɔ ganaa ǹ giin kɛn nə́ n wìi si.

¹¹Wɔ n die too kaaranan zɛnɛɛ ka sana nɛ, wɔrɔ konkoron nə́ ǹ ganaa, wɔ ǹ kɔ n la.

¹²Kii lɛ laan bɛ̀ a n woe a susu ǹ bǎã nɛ, bɛ̀ maa nyɔɔ gìĩ kɔɔ̃n kɛ gìĩ nə́ n da wɔlɔ la.

¹³Ma din foo dùũ wɔ lɛ n ka *miíri nyɔɔ gìĩ kɔɔ̃n bɛ́ lɔn, a n lɛ̀ wɛɛ a yii n koo kun ma nɛ.

¹⁴Ma foo dùũ wɔ lɛ n gìbi lɛa ma yii li, Ɛn-Gedii[1] a *rezɛ̃ da wuru kɛ nɛ.

¹⁵N tá siĩn dɛ! Maa paa ǹ wɔ, n tá siĩni dɛ! N yii nànan gamaa á kɔɔ̃nɛ, maǹ siĩni ka zɛrɛkantoanan bɛ́ lɔn.

¹⁶N dɔ á siĩni dɛ, ma din foo dùũ wɔ, n tá siĩni á là da. Wɔa waa ǹ piì n buu buruu lɛa.

¹⁷Wɔa kion a mɛnɛn man ka da kakan kɛn nɛ. Wɔa kion gɔ̀nɔn man ka gɔn sonboren kɛn nɛ.