Read Samo, Southern LKK 5 Bible Online

LKK 5 - Samo, Southern bible

LKK 5

¹Haya le! Mianɛn, maa nɛniɛ, má daa wɔ maa dù gɔrɔ lɛ nɛ, man die maa *miíri nyɔɔ gìĩ kɔɔ̃nɔn sɔlɛɛ, man die maa zoo nyɔɔ kɔɔ̃n bii, man die maa duvɛ̃ laanka maa bɔ̀nyaa mii. Maa giaáran lɛn, ka màn bii, maa giaáran lɛn, ka màn mi, ka mi, a wɔ ka yii ni.

²Man má goã nyuù we, sɛnɛ, ma gɔ́ɔ̃ na á goã koo. Má ma din foo dùũ wɔ lɛ gɔn wuu ma kiɛnlɛ dii. Á pɛ: Miãnɛn, maa paa ǹ wɔ, maa kɔnbɔlɔn, maa yii màn, kiɛnlɛ bũ ma nɛ. A giala, ma mìi yii n pele lɛa, ma mìi ka n tèlò a mu bisin lɛa.

³Má saa lɛlɛ má maa dɔnkɛ sɔlɔ, man wusii ma bɛ wɔ lɔn? Ma din a gòãn piimaa lɛ n ke, man wusii ma bɛn tii lɔn?

⁴Ma din foo dùũ wɔ lɛ nə́ n gɔn wɔ kiɛnlɛ koo ne, á foo kɔɔ̃n kɔ gole kɔ ma la.

⁵Má yoo máa man kiɛnlɛ buĩ ma din foo dùũ wɔ lɛ nɛ. Ma bɛ́ kiɛnlɛ lɛ kuĩ a kũ ǹ bǎã ganaa, bɛ̀ ma gɔnɔn man *miíri nyɔɔ gìĩ kɔɔ̃n lɛa.

⁶Má kiɛnlɛ bũ ma din foo dùũ wɔ lɛ nɛ, sɛnɛ á woo, a bii-a doo wa. Ma gɔ̀nɔn yii nə́ n si ma la, má ga li, man na a-n wa. Má lɛ dia la, a ma lɛ si wa.

⁷Sɛnɛ, bǎã-lɛduə̃lin mɛnɛn bɛ́ kiwi lɛ lɛduĩ, bɛn nə́ kaa ma lɛ. Ǹ nə́ ma dɛ, ǹ nə́ busu da ma-a. Ǹ nə́ maa lankana na ǹ nə́ bɔ ma-a, bɛa kungɔn-lɛduə̃lin kɛn lɛn.

⁸Zeruzalɛmu nɛlɔn lɛn, ma gɛlɛɛ ka nɛ! Bɛ̀ ka n na ma din foo dùũ wɔ lɛ nɛ, ka die ka pɛ-n kaa, mà kɔn-narɛɛ na á busu baa ma ganaa.

⁹Ebe! Nsɛ kɛ lɛ siĩn lɔn tumaa bii, n bɛ́ min mɛn lɛ narɛ, wàa na a soɛ koe ǹ miã kɔsɔ nɛ? N bɛ́ min mɛn lɛ narɛ, wàa na a soɛ koe ǹ miã kɔsɔ nɛ, bɛ ń toɛ n tá n gɛlɛɛ diɛ wɔ-n kɛnɛn?

¹⁰Ma din foo dùũ wɔ lɛ n tã yoreen yoreen. Min duu fù bii, a ba n duri wa.

¹¹A mìi n sana yoreen lɛa. A mìi ka n pɔsiaã, tì biribiri, ka zankoo bɛ́ lɔn.

¹²A yii nànan man siĩni, ka zɛrɛkantoanan man tà lɛ-a, Maǹ ka maǹ nə n duwii bɔ̀nyaa li, maǹ ka maǹ nə n susui zoo ǹ bǎã nɛ.

¹³A pàãn man ka miíri nyɔɔ gìĩ kɔɔ̃n bǎã bɛ́ lɔn.

¹⁴A gɔnɔn man ka sana zan bɛ́ lɔn, kɔlɔ giɔ̀mɔ kakaa ná a ganaa. Don a díi sɔ mɛn bɛ́ ǹ nə́ zɔnɔ, kɔlɔ giɔ̀mɔ kakaa ná a ganaa, a gɔ̀nɔn nə ka bɛ bɛ́ lɔn.

¹⁵A gòãn man ka kɔlɔ fu sonbore bìbìn bɛ́ lɔn, doa-n tán sana yoreen la. A n siĩni ka Liban da bɛ́ lɔn. A miã banban Liban dan bii wa.

¹⁶A sɔɔ min ni n nɔnɔɔ, ka min na a dinmaa tumu saa n mui. Zeruzalɛmu nɛlɔn lɛn, ma din foo dùũ wɔ lɛ n ka bɛ nɛ, maa paa ǹ wɔ lɛ n ka bɛ nɛ.