Read Samo, Southern Iza 13 Bible Online

Iza 13 - Samo, Southern bible

Iza 13

¹ *Baabilonii minin boo gii, Amɔsi a nɛgiĩ Izayii nə ǹ mɛn lɛ yɛ sii-nyaa nɛ:

²Ka màn zumu sii a kɔnboe lɛa, kele mìi kooro-a la. Ka n lɛ dɛ, ka gòon yiɛ zia-baalin ganaa, ka n gɔn yiɛ ǹ li, mà ǹ nə n bɔyaa ǹ daa, ǹ wɔ ka "kiãn kiɛnlɛ" kɛ nɛ!

³Ǹ min mɛnɛn bɔ ǹ nə́ ǹ koa maa wɔn lɛa, má dí-pɛn kɔ ǹ la. Maa sɔraasi zanbian kɛn, n nyɛnyɛɛ maa gɔ̀lɔ̀baa li, ma bɛn bíi, máa ǹ maa foo-yoo nyaa.

⁴Ka n too kɔ màn wuu kɛ li boe kelen la: A n ka zaman gole gòã wuu ni. Ka n too kɔ tɔrɔn kɛn lɛ dɛ li, tɔrɔn sɔkɔn ke. Sɔraasin mɛnɛn bɛ́ re woe zia biɛ, Dɛnaa Lawa Pàãyiidɛnaa n giɛ bɛn ganaa.

⁵Dɛnaa Lawa laanka min mɛnɛn bɛ́ re a foo-yoo kɛa dɔlɔ boe, maǹ boe bǎã sɔsɔɔ nɛ, tán lɛ dan ganaa. Maǹ die gána lɛ tumaa yui.

⁶ Ka gɛ̀ koa ǹ loe lɔ! A giala, Dɛnaa Lawa a lɛawaa gole kɛ dɔ á nya. Ka koe bɛ́ lɔn, a n màn tumaa ziziɛ̃, Pàãyiidɛnaa na á dia.

⁷Bɛ lɛ nɛ, min tumaa gù gã, ǹ foo ziziɛ̃.

⁸Nyɛ́ɛ nə ǹ ganaa. Busii tɔrɔ tumaa nə ǹ ganaa. Maǹ nə n birikəĩ tán, ka lɔ nɔɔrɔ-kɔle bɛ́ lɔn. Maǹ giɛ kɔn-a, ǹ gɔ́ɔ̃ n wɛɛ̃ nɛ, ǹ yɔrɔ n tɛ lɛa.

⁹Dɛnaa Lawa a lɛawaa á ke die, bɛa pinaa, makara-doɛ̃ banban. Foo-yoo gole lɛawaa nɛ. A n die gána lɛ biɛ kɛbɔlɔ lɛa, á re zɛ̀rɛdɛnan bɔ̀n biɛ.

¹⁰ Leeren laanka leere kurun kɛn ba re folon kiɛ doo wa. Wasa n die tii a bɔ tán waáraa. Mui a re folon kiɛ doo wa.

¹¹Dɛnaa Lawa pɛ: «Man die dɔlɔ boe kanaa ganaa a baraabaa kɛa lɛa, ma dɔlɔ bɔ min baraan ganaa ǹ gɛ̀ dɛ a lɛa. Din koa wolen dankarabaa ke, ma á re bɛ papaɛ̃, ma pàã-zɛnaalin din gole kɔ kɛ nya.

¹²Giĩn yɛ á re kaka koe a la sana yoreen yɛ nɛ, minbuiin nɛ yɛ á re kaka koe a la Ofiiri sana yɛ nɛ.»

¹³Bɛ lɛ nɛ, Dɛnaa Lawa Pàãyiidɛnaa a foo-yoo kɛa pinaa, a foo-yoo gole kɛa pinaa, lon laanka tán tá re bìn diɛ.

¹⁴Bɛa waáraa kəni, tiin man die ǹ piɛ zii siɛ, didie nə n mìi fɔ̃ a gána ganaa, kɛnɛn ka yuùn bɛ́ baa sii lɔn, bɛ̀ ǹ tá lui, ka sèren mɛnɛn nə́ ke ǹ lɛduə̃li banban.

¹⁵Bɛ̀ ǹ nə́ min woo min yɛ, maǹ bɛ piɛ̃ ka kiɛ nɛ. Bɛ̀ ǹ gɔn dɔ min mɛn ganaa ǹ nə́ kũ, bɛ n gɔya sa gɛ̀ we.

¹⁶Ǹ tá re ǹ nɛnyaan tiɛɛ̃nɛn tɔtɔrɛ ǹ dinin yii ni, ǹ nə ǹ kion gɔ̀ɔ̃ mànan kokoo, ǹ giã kun ǹ lɔn nɛ ka pàã nɛ.

¹⁷«Á ke, Mɛdi gána minin kɛn, ǹ laadoo ná a sana laanka wɔrɔ ganaa wa, ma á re bɛn kiɛ Baabilonii minin ganaa.

¹⁸Ǹ kiɛn man nɛ tenən dii, Ǹ ba nɛnyaan tiɛɛ̃nɛn makara doɛ̃ wa. Ǹ ba ǹ nɛgiĩn makara doɛ̃ wa.»

¹⁹ Lawa Sodɔmu laanka Gomɔɔrɔ yu lɔn lɛlɛ, a n die Baabilonii dɔ yui miɛ̃, asɛ kɛ lɛ gánan kiwi sonbore lɛa, a minin nə́ n dinin gole koe a paǹ li.

²⁰Min kɔn ba re giɛ̃ a-n doo duduu wa, a gɔ́ɔ̃ kooro n die goɛ̃ miɛ̃. Mu gòo-kɔlen dinin ba re golee a nɛ wa, tɔɔ-lɛduə̃lin ba re woe ǹ tɔɔn nɛ a-n wa.

²¹ Sɛnɛ, a n die don nɔ̀ɔnɔn giã ǹ bǎã biɛ. Kɔlɔn tá re nyii a kionən ne. A n die bɛndan giã ǹ bǎã biɛ, a butumun sàn kɔ ǹ bǎã baa.

²²Kuruun tá re lɛ biɛ a sanabolon kɛn nɛ, tolokan nə lɛ baa a kion sonboren kɛn nɛ. Baabilonii a lɛawaa giala nyɔmɔɔ dɔ á nya, a lɛawaa giala nyɔmɔɔ lɛ diri foɛɛ̃ nɛ.