Read Samo, Southern Iza 14 Bible Online

Iza 14 - Samo, Southern bible

Iza 14

¹Dɛnaa Lawa á re makara boe Zakɔba tɔrɔn ganaa. Sonbore, á re nyɛɛ mà asɛ din na á Izirayeli tɔrɔn yii gɔgɔɔ̃, á re woe ǹ ne ǹ tán la. Tiin tá re kiɛ kunun ǹ ni, ǹ dɔn nə Zakɔba tɔrɔn baa.

²Tɔrɔ kɔsɔn tá re Izirayeli minin kuĩ ǹ wo ǹ koa ǹ gána nɛ. Dɛnaa Lawa a tán la walan, Izirayeli minin lɛn tá re n bɔyɛɛ ǹ bɛa minin lɛn baa bɛ̀rɛn lɛa, giĩn laanka lɔn nɛ. Min mɛnɛn nə ǹ baa bɛ̀rɛn lɛa lɛlɛ, ǹ dɔn tá re bɛn biɛ bɛ̀rɛn lɛa. Min mɛnɛn nə nɔmaa da ǹ mii-n lɛlɛ, ǹ dɔn tá re bɛn kiãn biɛ sisia.

³Izirayeli, ǹ kɔn pinaa, Dɛnaa Lawa á re susui koe n la n nɔmaa damata kɛ laanka n bɛ̀rɛbaa kɛ kio.

⁴Bɛa waáraa kəni, n die n loe kɛ lɔ n Baabiloniin kii foo saa nɛ: Min mɛn goã pàã nyɛɛ wɔ-n lɛlɛ, bɛa dɛnaa wɔ nya. A kakaarɛbaa lɛ nya. Asɛ wɔ nya!

⁵Dɛnaa Lawa min baraan pàã nya, ǹ pàã zɛnaa ǹ bàlà ke, á bɛ yiɛ.

⁶Bàlà kɛ lɛ na á goã tɔrɔn dii biikoo tumaa li, ka foo-yoo gole ne, ǹ yɔyɔrɛ, nɔmaa diɛ ǹ mìi ni.

⁷Sisia kəni, tán tumaa golee kiĩni, a nə n susui. Min tumaa n foo kɔɔ̃nbaa ǹ lɛ dii.

⁸Sii mɛn bɛ́ n zɛnɛɛ, dan dinin manə n nyɛnyɛɛ bɛ taman yii. Siprɛsi dan laanka Liban dan man pii: «Ǹ nə n da yala kɛ-n lɔn, min kɔn bin tɔn da wɔ kuru doo wa.»

⁹Geren piɛ, geren man bìn diɛ, maǹ nə n yɔrɔ boe die n diɛ n lɛ n daa waáraa. N din na a lɛa, maǹ kanaa a min dadaran yii kiɛ. Tɔrɔn tumaa a kiin man yui lon, ǹ nə́ n diɛ n lɛ.

¹⁰Ǹ tumaa boo saa kun, ǹ nə́ pii: «N dɔ pàãwɛɛnaa baa ka wɔ dɔn bɛ́ lɔn! Kanna, ma n wɔ dɔn kɔnboe lɛa!»

¹¹N kiibaa lɛ gisĩ tán geren piɛ, kɔnkoɛɛ̃nɛn wuu li, Bǎã bɔnɛɛ nə n waa ǹ wɔlɔ lɛa, nyuunun manə n kɔmalɛ lɛa.

¹² Sɔ̀ tɛ-pɛle, nsɛ baayɛlɛ a nɛ, a n siɛ lɔn kəni n tá niɛ̃ lon mɛnɛɛ? Ń bɔ lon ń mɛnaa! Ǹ nə́ n zũ tán, nsɛ mɛn goã tɔrɔn bɔyɛɛ ǹ kiɛ.

¹³ Ma nə n goã pii n din gɔ́ɔ̃ nɛ: «Ma á re dii lon, ma maa kii dankan kɛ koa Lawa a leeren kɛn lalan. Kele mɛn bɛ́ gɔsɛ a lɛ̀gɔn la, lawan lɛsɔkɔn bǎã lɛa, man die giɛ̃ bɛ la.

¹⁴Ma á re dii labaran lalan, ma goã ka lon a Lawa bɛ́ lɔn.»

¹⁵Sɛnɛ, n woo n din yaa geren piɛ, nyankɔrɔ gole kɛ gɔ́ɔ̃ nɛ.

¹⁶Min mɛnɛn bɛ́ walan, ǹ yii bɛ n ganaa die, ǹ nə́ n yiin doa n la, ǹ nə́ pii: «Giĩ kɛ lɛ yii die, a din kɛ lɛ bie á goã bìn diɛ tán ganaa, a n bɔ̀n diɛ tɔrɔn ganaa wa ya?

¹⁷A din lɛ bie á goã tán bɔyɛɛ biɛ diə gole lɛa, kiwin yui, n piɛ̃ ka kòso nɛn kaa-n wa ya.»

¹⁸Tɔrɔn tumaa a kiin, hiĩ ǹ tumaa nə n susui ka gugurubaa nɛ ǹ yalan nɛ.

¹⁹Sɛnɛ, nsɛ, ǹ nə́ n zũ tán kànaa, sɔsɔɔ n yala ganaa, ka nɛnyaan mɛn nə́ ke á yɛ gere lɛa, nyɛ́ɛ diɛ, ka gere mɛn nə́ ke, ǹ nə́ yɔyɔrɛ. Ǹ min mɛnɛn fɔ̃ ka gɔya nɛ, ǹ nə́ ǹ geren kaa kɔlɔn lalan yala gole kɛ nɛ, bɛn man koe ne n gere lɛ.

²⁰Sɛnɛ, ǹ ba re n biĩ kun ka bɛn nɛ wa. A giala, ma n nə́ n gána lɛ ziziɛ̃, n nə́ n tɔrɔn papaã. Ǹ ba re gɛ̀-dɛle tɔrɔ babaraa kɛ tɔ bíi doo wa.

²¹Ka n yɔrɔ bɔ ka a nɛnyaanan dɛ, ǹ díi a sii baraan kɛn tumaa taman yii. Màn mɛn bɛ́ toɛ, ǹ baran n kɔ tán tumaa lɛ ǹ kiwi dadaran dɔ la wa.

²²Dɛnaa Lawa Pàãyiidɛnaa a da ǹ boo á ke: «Ma á re yui *Baabilonii minin gialaa, ma ǹ tɔ tuturu. Ǹ min mɛnɛn yii bɛ́ re goɛ̃ koo ka ǹ nɛnyaanan nɛ, ka min mɛn tumaa bɛ́ re yii ǹ kio.» Dɛnaa Lawa a da ǹ boo ne.

²³«Baabilonii á re kɔlɔn giã ǹ bǎã biɛ. Á re bɛrɛɛ bǎã biɛ. Man die ziziɛ̃ lenlen ka ǹ bɛ́ wɔlɔ wɔrɛɛ lɔn.» Dɛnaa Lawa a da ǹ boo ne.

²⁴ Dɛnaa Lawa Pàãyiidɛnaa liɛ wɔ á pɛ: «Ma boo mɛn da, bɛ lɛ n die n zɛnɛɛ, ma màn mɛn yɔrɔ bɔ, bɛ lɛ n die giala yii!

²⁵Ma á re Asiirii minin pàã nyɛɛ maa gána nɛ. Ma á re ǹ yɔyɔrɛ maa kelen kɛn la. Ǹ pàã ke maa zaman wìi li ka zǔu bɛ́ lɔn, ma á re bɛ siɛ ma bɔ ǹ la. Ǹ guĩ guguru ke maa zaman kɔrɔn, ma á re bɛ gisĩ.»

²⁶Kɛ n gɔn waa ǹ boo lɛa kanaa tumaa wɔ lɛa, a gɔn munii n lon, tɔrɔn tumaa wɔ lɛa.

²⁷Bɛ̀ Dɛnaa Lawa Pàãyiidɛnaa golee sii li, die n boe la a kurəə a zɛnaa ganaa? Bɛ̀ á n gɔn munii saa lon, die n boe la a gisĩ?

²⁸ Kii Ahaazi a gɛ̀ lɛ̀ nɛ, boon kɛn nə́ n da:

²⁹ Filisiti minin lɛn, bàlà mɛn bɛ́ ka dii, ta bɛ yiɛ, ka nyan nə n nyɛnyɛɛ wa. A giala, kɔrɔkan nə die soe miɛ̃ gere ne, tɔɔ babaraa piɛ̃ wole bɔ a dɔ nɛ.

³⁰Doobaan tá re màn-bii yii, nɔmaa wolen tá re wɛɛ tán n yiri ǹ bǎã goon ne. Sɛnɛ kasɛn Filisiti minin kɛn, bòo á re ka dii. Kaa min mɛnɛn yii goã koo, ǹ tá re bɛn dii.

³¹Ka wuu pɛ ka n lɛ dɛ kaa kiwi a kiɛnlɛn bii! Filisiti gána tumaa foo n ziziɛ̃ nɛ. A giala, tɛmaa bara n boe gɔsɛ a lɛ̀gɔn la die. Zɔ́ɔn bii, min kɔn ba n wɔlɔ lui zia-baalin ganaa wa.

³²Wɔ n die Filisiti minin dia dí-a wolen kɛn lɛ sii lɔn? Wɔ n die pii: Dɛnaa Lawa din na á *Siɔn kiwi koa, a zaman lɛ a doobaan tá re mìi duru ǹ bǎã yii walan.