Read Samo, Southern Iza 15 Bible Online

Iza 15 - Samo, Southern bible

Iza 15

¹ Moabu minin boo gii: Tèlò goon ne, Aara-Moabu gána kɛ bɔ̀n baa. Tèlò goon toto ne, á papaã. Tèlò goon ne, Kiiri-Moabu gána kɛ bɔ̀n baa. Tèlò goon toto ne, á papaã.

²Wúlu bɔ ǹ bǎãn nɛ, Dibɔn minin nə woo wuu pɛ. Neboo kele la ka Medebaa kiwi ni, Moabu minin nə́ woo gɛ̀ wuu pɛ. Ǹ tumaa mìi n kɔɔ̃ nɛ, ǹ tumaa lɛtoro ka n kɔɔ̃ nɛ.

³Ziin la, gɛ̀ koa ǹ mɔnaan man minin ganaa. Banbaranan la ka zaman bǎãn nɛ, maǹ gɛ̀ loe loe, min tumaa n wuu pii.

⁴Ɛsibɔn laanka Elaalee kiwi, minin man gú diɛ. Ma nə n toɛ Yaasi n tá ǹ lɛ miɛ. Haalɛ Moabu sɔraasin tá n lɛ dii, ǹ foo n ziziɛ̃ nɛ.

⁵Man gú diɛ Moabu minin lɛa. A zaman nə baa sii yǎa Sowara, yǎa Eglati-Selesia. Maǹ wuu pii bɛ̀ ǹ tá dii Luhiti kele kɛ la. Oronayimu zii la, maǹ foo ziziɛ̃ ǹ lɛ dɛ we!

⁶Nimirimu a pɛrɛ kɛ piɛ̃. Da tumaa gã, buu banban. Màn buruu kɔn banban.

⁷Bɛ lɛ taman yii, ǹ gɔn mànan mɛnɛn nə goã, minin man bɛn goɛ ǹ wo ǹ ne wɔlɔ sɔsɔɔ nɛ, tà lɛ-a ǹ dan kɛn kio.

⁸Gú diɛ lɛ n boe Moabu gána paǹ tumaa li. A gɛ̀ wuu pɛ n boe yǎa Eglayimu, a gɛ̀ wuu pɛ n boe yǎa Elimu tù lɛ-a.

⁹Tà ke kiɛ̃ Dimɔn kiwi, bɛ taã ka mà nɛ. Man die koe soree diɛ Dimɔn kiwi la: Moabu minin mɛnɛn yii goã koo, màn mɛn tumaa bɛ́ re goɛ̃ gána lɛ nɛ, yàra á re bɛn kuĩ!