Read Samo, Southern Iza 25 Bible Online

Iza 25 - Samo, Southern bible

Iza 25

¹Dɛnaa Lawa, n din ni maa Lawa lɛa. Ma nə n guguru koe, máa n tɔ boe. Ń sii dadaran zɛnaa, n nə ǹ mɛnɛn taasɛ haalɛ bibi. N nə́ ǹ zɛnaa ka peperebaa laanka bɔlɔgoondɛnaabaa nɛ.

²Ń kiwi lɛ baa kɛbɔlɔ lɛa, bɛa kiwi tamaa wole lɛ, ń wuru lenlen. Tiin kiwi tamaa wole lɛ, bɛa kiwi biɛ doo wa. A re wusii a n dɔ doo duduu wa.

³Bɛ lɛ nɛ, tɔrɔ barkadɛnaa kɛ á gugurubaa diɛ n la, tɔrɔ kakarɛn kiwi tá nyɛ́ɛ biɛ n yii ni

⁴a giala, ń pàãwɛɛnaan mìi duru ǹ bàã baa, ma n doobaan tamɛɛ fuu biikoo li, ma n mìi duru ǹ bǎã lɛa la giulun, ma n wúlu lɛa wasa li. Taãn nɛ, min kakarɛn foo yoo n ka la bɛ́ lɔn kungɔn ganaa,

⁵ká wasa bɛ́ lɔn tán gere ganaa. Sɛnɛ ma n tiin bìn diɛ lɛ kuri. Ká la wúlu bɛ́ màn boe tɛfuu lɛ lɔn, ma n min kakaarɛn gɔ̀lɔ̀baa ǹ lɛ dɛ lɛ kuri miɛ̃.

⁶*Siɔn kele la, Dɛnaa Lawa Pàãyiidɛnaa á re màn-bii zɛnɛɛ tɔrɔn tumaa wɔ lɛa, siĩ nyɔɔnaa n la, ka duvɛ̃ kɔɔ̃n nɛ. Siĩ nyɔɔnaa basiɛ̃ n la ka duvɛ̃ sonbore ne.

⁷Bɛa kele lɛ la, foo-ziziɛ̃ mɛn bɛ́ koe-n tɔrɔn tumaa lɛ, yɔrɔ-kɔsiɛ mɛn bɛ́ koe-n gánan tumaa lɛ, á re bɛ boe a bɔ ǹ lɛ.

⁸ Dɛnaa Lawa á re gɛ̀ papaɛ̃ duduu. Á re min tumaa yii mu tuturi. Á re a zaman tumaa a sìi nyɛɛ a bɔ ǹ ganaa. Dɛnaa Lawa na á pɛ.

⁹Bɛa pinaa, wɔ á re pii: «Á ke, a din ni wɔa Lawa lɛa, wɔ foo n doa nɛ a din ganaa. A n wɔ kirisibiɛ. Taãn nɛ, wɔ foo n doa nɛ Dɛnaa Lawa ganaa. Wɔ ǹ bɛ̀ biɛ ka foo kɔɔ̃n nɛ, wɔ nə n nyɛnyɛɛ, a giala, á wɔ kirisibaa!

¹⁰ Dɛnaa Lawa gɔn nə Siɔn kele tamaɛ.» Sɛnɛ, a n Moabu gána yɔyɔrɛ ka ǹ bɛ́ làpaa yɔyɔrɛ lɔn tonton bɔlɔ la.

¹¹Moabu n bìn diɛ a nyàan ganaa ka mu-baali bɛ́ mu biɛ lɔn. Sɛnɛ, a laan bɛ yii ni, Dɛnaa Lawa ná a din koa kɛ gisĩ.

¹²Moabu, n kungɔn kakan kɛn n tamaɛ taãn-taãnɛ, Dɛnaa Lawa nə ǹ wuru, á ǹ nyɛɛnaa á ǹ kaa.