Read Samo, Southern Iza 26 Bible Online

Iza 26 - Samo, Southern bible

Iza 26

¹Bɛa pinaa, Zudaa gána nɛ, zaman tá re loe loe, ǹ pɛ: Wɔa kiwi lɛ doemaa nɛ. Dɛnaa Lawa ná a lɛnpɛnɛ ka kungɔn nɛ, a ná a lɛnpɛnɛ ka kungɔn tamaa wole ne, màn mɛn bɛ́ toɛ, a wɔ tamaa.

²Ka kiɛnlɛn bũ! Tɔrɔ mɛn bɛ́ Lawa bɔlɔ sii, a n bɔlɔgoondɛnaa lɛa ka toa bɛ wɔ!

³Min mɛn bɛ́ n foo doɛ Dɛnaa Lawa ganaa bɛa dɛnaa n yii nyɛɛ taãn yii, a giala a foo n doa nɛ a din ganaa.

⁴Ka n foo doa Dɛnaa Lawa ganaa yǎa duduu. A giala, a din nə gɛ̀fu kaka lɛa, a na a tan duduu.

⁵Min mɛnɛn bɛ́ giã-n kele mìin ni a n bɛn boe ǹ kiɛ. Kiwi mɛn bɛ́ tamaa nɛ, a n bɛ ziziɛ̃. An noɛ̃ á zũ tán furu-n, a zũ gusuũ li.

⁶Ǹ tá re tɔrɛ la, doobaan tá re tɔ we la, din boɛɛn kɔ wolen tá re yɔyɔrɛ ǹ gòãn giulun.

⁷Dɛnaa Lawa, min mɛn bɛ́ n bɔlɔ sii, bɛa dɛnaa a zii n pepere. Ń zii pepere yɔrɔ bɔ a wɔ lɛa.

⁸Sonbore, Dɛnaa Lawa, n bɛ́ ń zii mɛn nyaa wɔ nɛ, wɔ n koe lɛ, wɔ foo n doa nɛ n din ganaa. Sii mɛn bɛ kɔɔ̃n wɔ ganaa, wɔ n tɔ bɔ, wɔ n taasɛ ka n din ni.

⁹Tèlò-n, man giɛ n li ka ma foo tumaa nɛ. Hiĩ, man giɛ n li ka ma parsii taãn nɛ. Bɛ̀ n tá dɔlɔ boe tán ganaa biikoo mɛn li, kanaa minin manə n darɛɛ peperebaa ganaa.

¹⁰Sɛnɛ, bɛ̀ makara nə́ n bɔ min baraa ganaa, a ba n darɛɛ peperebaa zɛnaa a wa. Peperebaa bɛ́ gána mɛn nɛ, a n sii baraa zɛnɛɛ walan dɔn. A yii ba Dɛnaa Lawa a golebaa kɛ ganaa wa.

¹¹ Dɛnaa Lawa, n gɔn-munii n lon, ǹ yii ba a ganaa wa. Sɛnɛ, ǹ tá re n miãgoã-bɔ kɛ yii n zaman kɛa paǹ li, sìi á re ǹ kuĩ. N tɛ mɛn yɔrɔ bɔ n zɔ́ɔn wɔ lɛa, bɛ á re ǹ kuĩ.

¹²Dɛnaa Lawa, n din nə là nyantoro koe wɔ la. Wɔ sii mɛn tumaa lɛ bɔ, n din nə ǹ tumaa lɛ piɛ̃.

¹³Dɛnaa Lawa, wɔa Lawa, mìinaa kɔsɔn nə́ goã wɔ mìi la. Sɛnɛ, wɔ nə n dinsɔɔ̃ guguru koe.

¹⁴Bɛa mìinaan lɛn nə́ gã, ǹ ba re yui doo wa. Maǹ nyínin lɛa sisia, ǹ ba yui doo wa. N nə́ ǹ bɔ̀n baa, yiri a goɛ̃ ǹ nɛ doo wa.

¹⁵Dɛnaa Lawa, ń wɔa zaman gigiã kɔ, n nə́ n gugurubaa nyaa. Ń wɔa zaman gigiã kɔ, n màn da gána lɛ gèlè tumaa li.

¹⁶Dɛnaa Lawa, koe biikoo li, manə n bɔyɛɛ die n din li. Bɛ̀ ń dɔlɔ bɔ ǹ ganaa, manə n nyankoe ka lɛn basiɛ̃ nɛ.

¹⁷Dɛnaa Lawa, wɔ n wɔ́ goã n yɔrɔ-a ka lɔ nɔɔrɔ-kɔle bɛ́ lɔn, n duwii, n lɛ dii la paparɛɛ gɔn.

¹⁸Wɔ dɔn nə́ nɛ yɛ, wɔ́ nɔmaa, sɛnɛ, wɔ n wɔ́ piɛ̃ dinsɔɔ̃ yɛ. Wɔ kirisibaa kɔ tán la wa, wɔ wɔ tɔrɔn yɛ wɔ́ ǹ kaa kanaa wa.

¹⁹Maa zaman, n geren yii á re kiɛ ǹ mɛnɛn bɛ́ yala-n, bɛn yii á re kiɛ. Ka yoo ka n bɔ geren li ka foo kɔɔ̃nbaa ǹ lɛ dɛ kasɛn mɛnɛn bɛ́ gusuũ li! Dɛnaa Lawa á re tɛ fúlu diɛ ka pele wɔ bɛ́ lɔn. Bɛ lɛ pàã ganaa, tán a geren yii á re kiɛ.

²⁰Maa zaman, wo piɛ, n nə n kiɛnlɛn tã n kio. N duru boɛɛnɛ, n toa Dɛnaa Lawa a foo-yoo kɛ kiɛ̃.

²¹A giala, á ke, Dɛnaa Lawa soo kion. A n die dɔlɔ boe minbuiin nɛn ganaa, ǹ sãn taman yii. Mà mɛn kaa, tán tá re toɛ bɛ yɛ. Ǹ min mɛnɛn dɛ, a re bɛn duri doo wa.