Read Samo, Southern Iza 29 Bible Online

Iza 29 - Samo, Southern bible

Iza 29

¹Dɛnaa Lawa pɛ: Ebe, Zeruzalɛmu, Zeruzalɛmu, maa *wúlu bɔ ǹ bǎã bɛ́ kiwi mɛn lɛ nɛ kii Davida daa giã a nɛ. N tá boe la n nə n zɔ́nɔn kɛn tumaa zɛnaa lɛ̀ woo lɛ̀.

²Sɛnɛ, man die n ziziɛ̃ Zeruzalɛmu. N tá re gungunun sii, n yii mu pã a kaa, sɛnɛ ma n die goɛ̃ masɛ wɔ lɛa.

³Ma á re maa giã ǹ bǎã doe ma n lɛnpɛnɛ nɛ. Ma á re yui n gialaa ka ziabaa ǹ sanabolon ne. Ma á re yui n gialaa ka ziabaa ǹ mànan nɛ.

⁴N tá re mɛnɛɛ, n lɛn nə die goɛ̃ ka a n boe nyankɔrɔ zuzulu ni. Gusuũ a re toɛ n lɛn ma wa. A n ka a n boe tán giulun, ka nyín-biili lɛn bɛ́ lɔn, boo diɛ gusuũ li.

⁵N zɔ́ɔ damatan kɛn tá re n biɛ ka gusuũ bɛ́ lɔn. Zaman mɛn bɛ n yɔyɔrɛ, bɛn tá re n biɛ ka làpaa bɛ́ lɔn, piɛ̃ n goɛ. Sɛnɛ, bǎã goon ne,

⁶Dɛnaa Lawa Pàãyiidɛnaa á re sii zɛnɛɛ n wɔ a paǹ li, ka la a ginii ni, tán a bìn diɛ nɛ, ka bìn diɛ gole ne piɛ̃ gole giulun, la giulun ka la a tɛ-pɛ nɛ.

⁷Zeruzalɛmu, gána damata mɛn bɛ́ zia biɛ n ganaa, min mɛnɛn tumaa bɛ́ kungɔn doe n ganaa ǹ nə́ n gɛwɛɛ paǹ yii li, bɛn tumaa á re papaɛ̃ ka narɛɛ bɛ́ lɔn, ka sii-yɛ bɛ́ lɔn tèlò-n.

⁸Min mɛn bɛ́ bòo na a ganaa, bɛa dɛnaa nə n narɛ ka a n màn bii. Sɛnɛ bɛ̀ a yii kaa, a gɔ́ɔ̃ kooromaa nɛ. Mu boro bɛ́ min mɛn ganaa, bɛa dɛnaa nə n narɛ ka a n mu mii. Sɛnɛ bɛ̀ a yii kaa, a n nɔmaa nɛ, a bɔlɔ gɔ́ɔ̃ n laa nɛ. A n die n biɛ miɛ̃ gána damatan kɛn nɛ zia diɛ *Siɔn a kele ganaa.

⁹Ka n kaãbaa, tɔwaa ka kũ! Ka yii tere-an baa, ka goã miɛ̃! Ka yɔdɛnan baa, ka n ka duvɛ̃ mi dɔn wa! Ka tatalaa, ka n ka yɔ kakaarɛ mi wa!

¹⁰ A giala, Dɛnaa Lawa ka yiri tã, á kaa Lawa a boo gii-dalin sàabaa sii-yɛn ganaa, á màn kɔ kaa gɔn-nɔɔlin yɔrɔ lɛ.

¹¹Bɛa boon kɛn man nə́ goã ka sɛ́wɔ gɔ́ɔ̃ nɛ ǹ boo bɛ́ lɔn, ǹ ná a lɛ tã, ǹ nə́ tɔrɔ. Ǹ nə́ kɔ sɛ́wɔ-dɔ̃li la, ǹ nə́ pɛ nɛ: «Bǐɛ̃ kɔ n si n pɛ!» Sɛnɛ á ǹ lɛ si: «Ma a boe la wa. Sɛ́wɔ lɛ lɛ tiɛ̃maa nɛ.»

¹²Hinlaa ǹ nə́ kɔ sɛ́wɔ doɛ̃baã wole la ǹ nə́ pɛ nɛ: «Bǐɛ̃ kɔ n kɛ si n pɛ!» Sɛnɛ, á ǹ lɛ si: «Ma a sɛ́wɔ pii doɛ̃ wa.»

¹³ Dɛnaa n kɛ pii: «Tɔrɔ kɛ n mɔrɛ-n ma ganaa ka a lɛ gɔ́ɔ̃ ǹ boo dinsɔɔ̃ nɛ. Maǹ ma guguru koe ka ǹ lɛ nɛ, sɛnɛ, ǹ foo wɔlɔ á lui-n ma ganaa. Ǹ bɛ́ gugurubaa mɛn koe ma la, a n minbuiin nɛn daraan boon dininsɔɔ̃nɔn lɛa.

¹⁴ Bɛ lɛ nɛ, á ke, man die kaãbaa ǹ siin zɛnɛɛ, ma maa zaman tɔwaa nɛ. Ta ǹ tá sii-dɔ̃lin lɛa, ǹ ba re màn kɔn giala miɛ ǹ nɛ wa. Ta ǹ tá yiridɛnan lɛa, ǹ doɛ̃ wolen ba re boe la ǹ sii kɔn giala pɛ wa.»

¹⁵Min mɛnɛn bɛ́ sii zɛnɛɛ ka durii ni, ǹ nə́ ǹ taasiɛn duri Dɛnaa Lawa la, ǹ nə́ ǹ siin yɔrɔ boe tèlò basa li, bɔ̀n nə bɛn wɔ lɛa. Maǹ pii: «Die yii n wɔa sii zɛnaan ganaa, die n wɔ doɛ̃?»

¹⁶ A da yaa ka nə n dinin yiri siɛ̃. Min tá boe la n dɔn-bɔle zɔɔ̃ kɔn ka gì ni? Màn zɛnaa lɛ á boe la a pɛ a zɛnaali ni: «Nsɛ bie n ma zɛnaa wa?» Dɔn lɛ á boe la a pɛ gì-bɔle lɛ nɛ: «N ba dí nyɛɛ doɛ̃ wa?»

¹⁷Kànaa ka boɛɛnɛ, Liban daã lɛ á re n bɔyɛɛ, a da nɛ-kɔle wuru baa, dù gɔrɔ lɛ dɔ á re n bɔyɛɛ a daã baa.

¹⁸Bɛa pinaa boo mɛn bɛ́ kiɛ̃-n sɛ́wɔ kɛ nɛ, too tere-an tá re bɛ miɛ. Yii tere-an tá re soe tèlò-n wɔlɔ tì li, ǹ yii n wɔlɔ yii foaã nɛ.

¹⁹Min mɛnɛn foo bɛ́ ziziɛ̃ nɛ, bɛn tá re foo kɔɔ̃nbaa gole yii Dɛnaa Lawa li. Ǹ mɛnɛn tumaa bɛ́ doobaa taãn-taãnan lɛa, bɛn tá re n nyɛnyɛɛ Izirayeli a Lawa sonbore kɛ taman yii.

²⁰Bɛ n die pàã-zɛnaalin pàã a nya giala biɛ. Din-koalin tá re papaɛ̃. Min mɛnɛn bɛ́ zoɛ̃ li mà ǹ sii baraa zɛnaa ǹ miãn nɛ,

²¹ǹ nə́ soɛ diɛ ǹ miãn la, ǹ nə́ kan koe kiri-kuruli ni, ǹ nə́ toɛ ǹ nə́ yii tì-a kuĩ, bɛn wɔ n die goɛ̃ ka gɛ̀ nɛ.

²²Bɛ lɛ nɛ, Dɛnaa Lawa mɛn Abrahamu kirisibaa, bɛa boo á ke á diɛ Zakɔba tɔrɔn manɛ: «Kanna, Zakɔba tɔrɔn foo a re ziziɛ̃ doo wa, sìi ba re ǹ kuĩ doo wa.»

²³A giala, ma bɛ́ re sii mɛn zɛnɛɛ ǹ bii, ǹ dinin laanka ǹ nɛnyaanan tá re bɛ yii. Ka bɛ-n kəni, ǹ tá re ma tɔ boe. Ǹ tá re doɛ̃ mà Zakɔba a Lawa kɛ á sonbore, ǹ tá re nyɛ́ɛ biɛ Izirayeli a Lawa kɛ yii ni.

²⁴Yiriwɛɛnaan tá re yiri yii, boo bisin dalin tá re n too koe doroo li.