Read Samo, Southern Iza 30 Bible Online

Iza 30 - Samo, Southern bible

Iza 30

¹Dɛnaa Lawa a da ǹ boo á ke: Nɛnyaan piã wolen lɛn, kaa wɔ n ka koe ne. Ka ǹ siin lɛ boe, ǹ nə́ ǹ ba boe masɛ li wa. Ka ǹ lɛ kɔ we, masɛ bɛ́ ma ba ǹ mɛn li wa. Ka ǹ sii baraan kiɛ kɔn la.

²Ká zii saa ka n woe Ezipti, sɛnɛ, ka nɔ̀n da ma la wa. Ka ǹ zoɛ̃ li mà Eziptin kii *Faarahɔn ka tamaa. Ka ǹ giɛ mìi susu ǹ bǎã li a gána nɛ!

³Sɛnɛ, Faarahɔn a tamaa kɛ á re foo ziziɛ̃ biɛ ka ganaa. Ka bɛ́ giɛ mìi susu ǹ bǎã mɛn li Ezipti gána nɛ, bɛ á re yii puusəbaa biɛ ka ganaa.

⁴Kaa kiãn nə́ dɔ Soan gɔrɔ. Kaa dia dí-a wolen nə́ dɔ Anɛsi gɔrɔ.

⁵Sɛnɛ, sìi á re n koe ka lɛ. Ezipti minin ba re boe la ǹ dɔmalɛ kɔn wɔ ka-n wa. Ǹ ba re bǐɛ̃ kɔn zɛnɛɛ ka-n wa, ka a re là goon yii ǹ ganaa wa. Maǹ die sìi dinsɔɔ̃ diɛ ka ganaa, ǹ ka yii puusə kɔ.

⁶Negɛvu gána a boo gii: Koe gána nɛ, a foo ziziɛ̃ n gɔ̀nɔn bìn diɛ. Yàra san nɛ ka yàra daanan nɛ, kɔrɔkanan nɛ ka tɔɔ babaraa piɛ̃ wolen giã ǹ bǎã nɛ. Kaa dia dí-a wolen manə ǹ naforon goɛ dudunun la, ǹ nə́ ǹ gɔn mànan kiɛ nyɔɔmaan dɔ́ɔ̃ nɛ. Bǐɛ̃baa ǹ mànan manɛ ǹ tá woe koe Ezipti minin la, a da yaa ǹ ba re boe sii kɔn dɔ la ǹ zɛnaa ǹ nɛ wa.

⁷Taãn nɛ, Ezipti a dɔmalɛ n piɛ̃ lɛa, a màn kɔn lɛa wa. Bɛ lɛ nɛ ma á pii gána kɛ nɛ: «Ma n Rahabu lɛa, don màn babaraa piɛ̃-wole ke, sɛnɛ n ba bìn diɛ wa.»

⁸Dɛnaa Lawa pɛ Izayii ni: «Kanna, boon kɛn kiɛ̃ goo la. Ǹ kiɛ̃ sɛ́wɔ dɔ nɛ Zeruzalɛmu minin yɔrɔ-a. Á re goɛ̃ siérebaa ǹ màn lɛa yǎa duduu.»

⁹Tɔrɔ piã wolen manɛ, maǹ soɛ-bɔlen lɛa. Minin manɛ ǹ nə́ n piɛ̃ ka Dɛnaa Lawa a daraa ǹ boo a too kɔ ma-a nɛ.

¹⁰Maǹ pii sii-nyaalin manɛ: «Ka nyan sii-nyaa yɛ doo wa.» Maǹ pii Lawa a boo gii-dalin manɛ: «Ka nyan Lawa a boo gii da wɔ-n doo wa. Boo mɛn bɛ́ sonbore lɛa, ka nyan bɛ pɛ wɔ-n doo wa. Boo mɛn bɛ́ kɔɔ̃n wɔ too ne, haalɛ ta a n soɛ lɛa, ka bɛ pɛ wɔ nɛ.»

¹¹Ka n wɔlɔ lui zii sonbore ganaa, ka n bɔ zii sonbore la. Ka nyan Izirayeli a Lawa sonbore kɛ boo da wɔ-n doo wa.

¹²Bɛ lɛ nɛ, Izirayeli a Lawa sonbore á pii: «Ká n piã ka maa boon ne. Min mɛnɛn bɛ́ ka yiri siɛ̃, ǹ nə́ soɛ boe ka nɛ, ka nə n foo doɛ bɛn ganaa.

¹³Sisia kəni, bɛa sã kɛn die n biɛ ka ganaa ka kungɔn bɛ ke á yu lɔn. Kungɔn lɛ n kolo boe, a bɔ a kaa bǎã goon ne.

¹⁴Kungɔn lɛ n die yɔyɔrɛ, a lɛkara mɔnaa ka gì-bɔle a tàan bɛ́ lɔn. Á yɔyɔrɛ á la yii ni, lɛkara golon ba yii a bii min boo la a tɛ bɔ nɛ, hinlaa a mu si-n tù lɛ-a wa.»

¹⁵Dɛnaa Lawa, Izirayeli a Lawa sonbore n kɛ pii: Bɛ̀ ka n bɔyaa ka daa masɛ li, ka giã kiĩn ni, ka á re kirisibaa yii. Bɛ̀ ka n foo doa masɛ ganaa, ka giã kiĩn ni, bɛ lɛ n die pàã koe ka la. Sɛnɛ, ka lɛ kɔ bɛ ganaa wa.

¹⁶Ka ǹ pii: «Haayii, wɔ n die baa sii ka sùin ni.» Sonbore, ka á re baa sii. Ka n pii dɔn: «Wɔa sùin lɛn tá boe baa la.» Taãn nɛ. Min mɛnɛn bɛ́ ka kialan lui, bɛn dɔn yii á re fuu koe ǹ la ka nɛ.

¹⁷Zɔ́ɔ goon dinsɔɔ̃ n die nyɛ́ɛ diɛ ka ganaa, a kaa min duu goon gɔ̀nɔn da bìn diɛ ganaa. Zɔ́ɔ sooro n die nyɛ́ɛ diɛ ka ganaa, ka tumaa baa si. A giala nyɔmɔɔ li, kaa min mɛnɛn bɛ́ re goɛ̃, bɛn man die n biɛ ka sii giala pɛ ǹ màn bɛ́ lɔn kele mìi ni, ka zanzan bɛ́ lɔn tenten la.

¹⁸A da yaa, Dɛnaa Lawa á re yui, a na a bǐɛ̃ nyaa ka nɛ, á re a foo basiɛ̃baa nyɛɛ ka nɛ. Sonbore, Dɛnaa Lawa n Lawa pepere lɛa. Min mɛnɛn foo bɛ́ doa nɛ a ganaa, bɛn foo á re kɔɔ̃n koe.

¹⁹Nsɛ *Siɔn a zaman, nsɛ mɛn bɛ́ giã-n Zeruzalɛmu, n ba re wuu pii doo wa. Bɛ̀ n nə n lɛ dɛ Dɛnaa Lawa ganaa á re a bǐɛ̃baa nyɛɛ n nɛ. Bɛ̀ á n lɛ ma lɔn gɔrɔ, á re n lɛ sii.

²⁰Dɛnaa á re nɔmaa ka foo ziziɛ̃ koe n la n mu laanka n màn-bii lɛa. Sɛnɛ min mɛn bɛ́ n darɛɛ, a re n duri n la doo wa, n tá re yii ka n yii ni.

²¹N tá re boon kɛn miɛ n kio: «N bɛ́ n kɔnbɔ n zii mɛn saa, n wo n gusin hinlaa n gɔsɛ, á ke.»

²²N dìn kɛn n wɔrɔ kaa ǹ la n dì kooron kɛn n sana kaa ǹ la, n tá re giɛ bɛn ganaa *gɔ̀ dama-a ǹ mànan lɛa. N tá re ǹ zuĩ ka màn gɔgɔrɛn bɛ́ lɔn, n pɛ ǹ nɛ: «Ka n tá ka n bɔ kànaa!»

²³Ka bɛ-n kəni, Dɛnaa Lawa á re la kiɛ màn nàn kɛ la, n da. N bɛ́ re màn-bii mɛn boe tán nɛ, á re goɛ̃ mɔnaa nɛ, a n kɔɔ̃n dɔn. Bɛa pinaa kɛ nɛ, n tɔɔn tá re woe buu soɛ̃ tɔɔn buu sɔ̃ ǹ bǎã gole kɛ nɛ.

²⁴N diin laanka n dundunun mɛnɛn bɛ́ tán kɔsɛ, ǹ tá re buu sonbore soɛ̃, ǹ buu mɛn lɛ nyoã tán ka pɛli laanka fursi ni.

²⁵Bɔ̀n gole pinaa ke, bɛ̀ kiwi tamaa ǹ kungɔnɔn kɛn nə́ kaa, mu á re baa sii kele sɔsɔrɔn tumaa la ka tenten dadaran nɛ.

²⁶Ǹ kɔn pinaa, Dɛnaa Lawa na a zaman lɛ a bayɛrɛn pii. Bɛ̀ a ná a busulɛn nya, mui á re tɛ pii ka wasa bɛ́ lɔn, wasa á re a lɛawaa sɔbaa fúlu kiɛ pinin goon.

²⁷Dɛnaa Lawa á ke, a n boe tìãlɛa die. A foo-yoo n tɛ lɛa ka kurukuru. Foo-yoo nə n daa a lɛ la. A da ǹ boo n ka tɛ bɛ́ lɔn màn kuĩ.

²⁸A lɛ gɔ́ɔ̃ ǹ piɛ̃-n ka mu tii bɛ́ lɔn, á pã á toɛ̃ á dii yǎa bɔlɔ ganaa. A n die bìn diɛ tɔrɔn ganaa, a ǹ ziziɛ̃, a karfɔ wɔ ǹ lɛ-n, a ǹ baã a wo ǹ ne bǎã mɛn bɛ́ ǹ ba li ǹ wo a-n wa.

²⁹Kasɛn Zeruzalɛmu minin, ka á re loe loe ka zɔ́n pinaa tèlò wɔ bɛ́ lɔn. Ka foo á re kɔɔ̃n koe ka min mɛnɛn bɛ́ tɔ we pìi wuu li woe Dɛnaa Lawa a kele la, woe Lawa, Izirayeli a gɛ̀fu li.

³⁰Dɛnaa Lawa lɛn tá re boe ka paraa gole ne. Á re n pàã nyɛɛ, ka a foo-yoo ne ka kurukuru, á re nyɛɛ tɛ bii la gole li kiɛ ka la gii ni.

³¹Bɛ̀ Asiirii Dɛnaa Lawa lɛ ma, bɛ̀ a bàlà wuu bɔ a ganaa, a gɔ̀nɔn tá re bìn diɛ nyɛ́ɛ gunun,

³²Dɛnaa Lawa bɛ́ re ǹ dii ka bàbàla mɛn nɛ maà laanka tùtun wuu n die koɛ kɔn la ka bàlà wuu gogoonmaa nɛ. Dɛnaa Lawa n die n gɔn pepere Asiirii li, a zia baa a ganaa.

³³Tɛ kɔn yɔrɔ boemaa nɛ haalɛ bibi, a n Asiiriin kii wɔ lɛa. Yala zuzulu pəmə goon gɔ́ɔ̃ nɛ, maǹ nə́ gɔn da kɔn la buurii ni tɛ lɛ wɔ lɛa. Dɛnaa Lawa lɛ gɔ́ɔ̃ ǹ piɛ̃ ke ka kiribi tɛdɛnaa bɛ́ lɔn, bɛ n die tɛ lɛ diɛ.