Read Samo, Southern Iza 31 Bible Online

Iza 31 - Samo, Southern bible

Iza 31

¹Min mɛnɛn bɛ́ woe giɛ dɔmalɛ li Ezipti gána nɛ, bɛn wɔ n ka koe ne. Ǹ yiri nə ǹ sùin ganaa, ǹ foo n doa nɛ ǹ ziabaa ǹ wotoro damatan kɛn ganaa, ka ǹ sùi dabaa wolen ne a giala maǹ tá kaka. Sɛnɛ, ǹ nə n yɔrɔ bɔyaa ǹ nə́ dia Izirayeli a Lawa sonbore kɛ la wa, ǹ ba giɛ Dɛnaa Lawa li wa!

²A da yaa, a dɔ á sii doɛ̃. Á boe la a da ka koe ne, a wusii a da ǹ boo kio wa. A n yui min baraan lɛ sɔkɔn gialaa, ka sii baraa-zɛnaalin dɔmalɛ nɛ.

³Ezipti minin man minbuiin nɛn lɛa, ǹ bie Lawa lɛa wa. Ǹ sùin man tɔɔ kooron lɛa, ǹ bie màn kɔsɔn lɛa wa. Bɛ̀ Dɛnaa Lawa nə́ n gɔn saa ǹ li lɔn, min mɛn bɛ́ dɔmalɛ we, bɛ n mɛnɛɛ. Min mɛn bɛ́ nɔ̀n diɛ ka dɔmalɛ nɛ, bɛ n yalɛɛ. Ǹ dinin tumaa n giɛ̃ kun.

⁴Dɛnaa Lawa boo mɛn da ma nɛ, á ke: Bɛ̀ yàra hinlaa yàra nɛ á wɔɔsaa we siĩ la, haalɛ ta ǹ nə́ tɔɔ-lɛduə̃li gigiã bii ǹ nə́ ǹ kaa a ganaa, a nyɛ́ɛbiɛ ǹ gigiãbaa-n wa, ǹ bɛ́ lɛ-dɛ mɛn we, bɛa nyɛ́ɛ diɛ a ganaa wa. A din yɔrɔ goon la masɛ Dɛnaa Lawa Pàãyiidɛnaa á re gisĩ *Siɔn kele la, ma ziabaa ǹ ganaa.

⁵Ka bàan bɛ́ n nyàa nyoɛ̃ a nɛnyaanan la lɔn, Dɛnaa Lawa Pàãyiidɛnaa n die Zeruzalɛmu tamɛɛ miɛ̃. Á re a zia gii diɛ, a na a kanbaa. Á re tamɛɛ, a na a kirisibaa.

⁶Izirayeli minin lɛn, ká n dɔ̀ɔ̃ wɔ Dɛnaa Lawa nɛ taãn-taãnɛ. Ka wusoo ka da a li.

⁷Ǹ kɔn pinaa, ka gogoonmaa á re kaa dìn kɛn zuĩ, kɛn lɛn wɔrɔ lɛa ka ǹ mɛnɛn bɛ́ sana lɛa, ka ǹ mɛnɛn lɛn zɛnaa ka dinin wɔ lɛa ka ka gɔn gɔgɔrɛn kɛn nɛ.

⁸Gɔya sa mɛn bɛ́ re Asiirii dii, minbuiin nɛn wɔ bie wa. Gɔya sa ke die dii, minbuiin nɛ a màn zɛnaa bie wa. Asiirii minin tá re baa sii ǹ nyɛɛnɛ, ǹ tá re ǹ sɔraasi tenən kuĩ, ǹ wo ǹ kaa pàã dí ganaa.

⁹Ǹ kii gɔ̀nɔn tá re bìn diɛ nyɛ́ɛ gɔn a baa si. Ǹ kiãn foo á re ziziɛ̃, ǹ nə ǹ zanzan daa, Dɛnaa Lawa a da ǹ boo ne, asɛ mɛn a tɛ buə̃ bɛ́ Siɔn, a tɛ koa-n Zeruzalɛmu.