Read Samo, Southern Iza 32 Bible Online

Iza 32 - Samo, Southern bible

Iza 32

¹Á ke kii á re yii, a kiibaa zɛnaa ka peperebaa nɛ, kiãn tá re nyɛɛnaan boe ka sonborebaa nɛ.

²Didie n die goɛ̃, ka duru ǹ bǎã bɛ́ lɔn piɛ̃ giulun, ka kion bɛ́ lɔn la giulun, ka mu bɛ́ lɔn diə ne, ka gɛ̀fu gole wúlu bɛ́ lɔn, sɛ̀fuu gána nɛ.

³Min mɛnɛn yii bɛ́ á kɔnbɔ ka wɔlɔ yɛ nɛ, bɛn yii á tiɛ̃ doo wa. Min mɛnɛn too bɛ́ á kɔnbɔ ka boo ma nɛ, bɛn tá re n too koe sɔnbɔraa nɛ.

⁴Foo fuunaan tá re sii giala miɛ. Bobo-pɛlen tá re boo diɛ fufuu, foaã nɛ.

⁵Ǹ ba re pii baãnaan man doo mà ǹ yii á guguru wa. Ǹ ba re pii wurumunun man doo mà ǹ tá min sonboren lɛa wa.

⁶A giala, baãnaa n baãnaabaa ǹ boo diɛ. A nə n taasɛ sii baraa zɛnaa dinsɔɔ̃ ganaa. A n sii bɔbɔnɛɛn zɛnɛɛ. A n sɔ koe Dɛnaa Lawa ganaa. A ba màn-bii koe bòonaa la wa, A ba mu koe mu borodɛnaa la wa.

⁷Min mɛnɛn bɛ́ ǹ miãn yiri siɛ̃, ǹ sii baraa zɛnaa la yii ni. Maǹ tán dù bose ǹ nə́ doobaan laadoo ziziɛ̃ ka soɛn nɛ, ta sonbore nə ǹ lon.

⁸Sɛnɛ min mɛnɛn gɔ́ɔ̃ bɛ́ fu, bɛn man taasiɛ sonboren woe, ǹ nə́ sii bǐɛ̃ zɛnɛɛ.

⁹Lɔ din narɛɛ wolen lɛn, ka yoo ka n too kɔ ma lɛn li! Nɛlɔ din koa wolen lɛn, ka n too kɔ maa boo li!

¹⁰Kànaa ka lɛ̀ goon ka boɛɛn nɛ, kasɛn din koa wolen kɛn, ka yɔrɔ á re kɔsɛ. Nɛ a re yii *rezɛ̃ da la min na wa, kaa-piɛ a re yii wa.

¹¹Lɔ din narɛɛ wolen lɛn, ka gɔ̀nɔn tá re bìn diɛ, kasɛn mɛnɛn bɛ́ n dinin koɛ ka yɔrɔ á re kɔsɛ! Ka n sɔlɔ, ka n gɔ̀nɔn kooro da, ka gɛ̀ koa ǹ mɔnaan wɔ.

¹²Ka wuu pɛ ka gini kaa wuru sonboren kɛn la, ka kaa rezɛ̃ da nɛ-kɔlen kɛn nɛ.

¹³Ka wuu pɛ maa zaman a tán la, ǹ mɛn bɛ́ nyan da si á n kɔ lɛ. Ka wuu pɛ kiwi zɔ́n-zɛnaali kɛa kionən la, foo kɔɔ̃n bɛ́ ǹ mɛnɛn nɛ.

¹⁴A giala kii a kion gɔ́ɔ̃ kooromaa nɛ. Min kɔn ba kiwi bìn dale kɛ-n doo wa. Ofɛli dala laanka wɔlɔ lɛduə̃ ǹ sanabolo ke, ǹ nə́ n la bɔ bɛn ganaa duduu. Ǹ nə́ don dundunun susu ǹ bǎã baa, tɔɔn buu sɔ̃ ǹ bǎã lɛa.

¹⁵Sɛnɛ ǹ kɔn pinaa, Dɛnaa Lawa á re a yiri gisĩ wɔ la. Bɛa biikoo li kəni, diə gole á re n bɔyɛɛ a da nɛ-kɔle wuru baa, da nɛ-kɔle wuru á re n bɔyɛɛ a daã baa.

¹⁶Bɛa biikoo li, sonborebaa á re yii diə gole ne, peperebaa á re giɛ̃ da nɛ-kɔle wuru-n.

¹⁷Peperebaa a dí n die goɛ̃ ka là nyantoro ne. A din nə die ka yiri-giã nɛ ka yii nyɛɛ nɛ.

¹⁸Dɛnaa Lawa a zaman tá re giɛ̃ là nyantoro bǎã nɛ, kionən ne, foo n doa nɛ ǹ ganaa, ka susu ǹ bǎã nɛ.

¹⁹La gii n die kiɛ daã lɛ la, kiwi lɛ á re wurii.

²⁰Sɛnɛ, ka foo á re kɔɔ̃n koe: Mu bɛ́ bǎã mɛn tumaa nɛ, ka á re màn diɛ walan. Ka á re kaa diin laanka kaa dundunun kiɛ ǹ nə n bibiə̃ ǹ dinin gɔn wii á lɛa.