Read Samo, Southern Iza 35 Bible Online

Iza 35 - Samo, Southern bible

Iza 35

¹Diə gole ka tán gere, ka n nyɛnyɛɛ! Bǎã mɛn bɛ́ mu ba a-n wa n nyɛnyɛɛ, n buũ kɔ ka kɔnbɔlɔn bɛ́ lɔn!

²Buũ kɔ! N nyɛnyɛɛ, n bɛ̀ baa n nə n lɛ dɛ ka foo kɔɔ̃n nɛ! Dɛnaa Lawa á re n siĩn koe ka Liban a kelen kɛn bɛ́ lɔn. Á re Karmɛli kele laanka Saron a bɔmɔn siĩnbaa kɛ koe n la. Bɛa biikoo li, min tumaa á re Dɛnaa Lawa a gugurubaa yii, a wɔa Lawa a siĩnbaa yɛ.

³ Ka pàã kɔ nyàa busulən la, ka kakabaa kɔ musi busulən la.

⁴Foo ziziɛ̃ bɛ́ min mɛnɛn ganaa, ka pɛ bɛn manɛ: «Ka n foo taã, nyɛ́ɛ nyan ka kũ wa. Kaa Lawa á ke. A n die kaa gɛ̀ dòo boe, kaa zɔ́ɔn nə sii baraa mɛn zɛnaa ka nɛ, a n bɛ dòo sarɛɛ ǹ la. A dinmaa n die ka kirisibiɛ.»

⁵ Ka bɛ-n kəni, yii tere-an yii á re wɔlɔ yii foaã nɛ, too tere-an too á re boo miɛ.

⁶Bɔlɔkan tá re parɛ ka tiã bɛ́ lɔn. Lɛ tere-an lɛ á re n buĩ, ǹ nə ǹ foo kɔɔ̃nbaa ǹ lɛ dɛ. Mu á re pìã woɛ̃ diə ne. Tà mu á re baa sii tán gere la.

⁷Nyɔɔsɔ̃ fuu kɛ á re n bɔyɛɛ a pɛrɛ baa, tán gere á re bɔyɛɛ, a mu yala bǎã baa. Tolokan nə goã giã ǹ bǎã mɛn nɛ, bùruu laanka sawɛɛ á re boe walan.

⁸Zii gole á re yii walan ǹ bíi "sonborebaa ǹ zii". Gɔ̀dɛnaa kɔn ba re boe walan wa, a n die goɛ̃ Lawa a zaman dinsɔɔ̃ wɔ lɛa. Baãnaan ba re die n dinin daɛ walan wa.

⁹Yàra laanka don siĩn ba re yii walan wa. Ǹ kɔn ba re die walan wa. Dɛnaa Lawa bɛ́ re min mɛnɛn sii a ǹ kaa, bɛn dininsɔɔ̃nɔn man die zii kɛ siɛ.

¹⁰Dɛnaa Lawa min mɛnɛn kirisibaa, bɛn man die wusii ǹ daa. Maǹ die woe *Siɔn ka foo kɔɔ̃nbaa ǹ lɛ-dɛ nɛ. Ǹ yɔrɔ koa ǹ gɔn nə foo kɔɔ̃n lɛa, foo kɔɔ̃nbaa mɛn bɛ́ a nyɛɛ wa. Foo kɔɔ̃nbaa gole n die goɛ̃ ǹ li. Nɔmaa laanka ginii á re papaɛ̃.