Read Samo, Southern Iza 40 Bible Online

Iza 40 - Samo, Southern bible

Iza 40

¹Kaa Lawa pɛ: Ka maa zaman lɛ foo doa, hiĩ ka maa zaman lɛ foo doa.

²Ka Zeruzalɛmu foo taã, ka pɛ nɛ ka lɛn gole ne, mà a bɛ̀rɛbaa ǹ dí lɛ nya, mà a siɛ̃n lɛn dɔlɔ nya. A giala Dɛnaa Lawa da a sii baraan lɛn tumaa a dɔlɔ saraa ganaa.

³ Lɛ-dɛ n boe diə gole ne: Ka zii zɛnaa Dɛnaa Lawa wɔ lɛa. Bǎã gere ne, ka zii tele wɔa Dɛnaa Lawa wɔ lɛa.

⁴Ka tii kaa nyankɔrɔ basa kɛn nɛ, n yoo lon. Ka kelen laanka tentenen sɛlɛ, ǹ kɔnpɛ. Ka tenten mìin tumaa bɔyaa, ǹ wurun baa. Ka kelen tumaa baa nyankɔrɔ basa lɛa.

⁵Ka bɛ-n kəni, Dɛnaa Lawa a siĩnbaa á re n doɛ̃. Minbuiin nɛ tumaa á re yii, ǹ dɔ̃ mà Dɛnaa Lawa boo da.

⁶ Min goon pɛ: «N lɛ dɛ!» Min kɔsɔ nɔ̀n da: «Man lɛ dɛ ka wàa n nɛ?» Á ma lɛ si: «Minbuiin nɛn man ka buu bɛ́ lɔn. Ǹ ba kaka ǹ nə́ la wuru gɔ́ɔ̃ nɛ ǹ buu-n wa.

⁷Bɛ̀ Dɛnaa Lawa a piɛ̃ daa, buũ n laɛ, da buu n bɛbɛnɛ. Sonbore, minbuiin nɛn man ka buũ bɛ́ lɔn.

⁸Buu n laɛ, dà buu n bɛbɛnɛ. Sɛnɛ, wɔa Lawa a boo na a tan yǎa duduu.»

⁹*Siɔn boo tii kɔɔ̃n pɛle, dii kele sasa la, Zeruzalɛmu, boo tii kɔɔ̃n pɛle, n lɛn saa ka pàã nɛ, n lɛn saa lon, nyɛ́ɛ nyan nə n kũ wa. A pɛ Zudaa kiwin manɛ: «Kaa Lawa á ke!

¹⁰ Á ke, kaa Dɛnaa Lawa n die ka pàã gole ne. Pàã tá a lon, a giã minin mìi la. Á ke, a màn mɛn yɛ, a n die ka bɛ nɛ. A n die ka a dí a saraa nɛ.

¹¹ Ká tɔɔn-lɛduə̃li bɛ́ lɔn, a na a tɔɔn lɛduĩ. Bɛ̀ á n gɔn saa ǹ li, maǹ nə n lɛ soekɔn. A n sère nɛn guĩ a kolɔn. Sere daanan mɛnɛn bɛ́ nɛn nə́ ǹ kio, a n woe bɛn nɛ sɛlɛlɛ.»

¹²Die bin na á yìsi mu zɔɔ̃ a gɔn tìsì bii? Die bin na á lon a golebaa zɔɔ̃ ka a gòon yii ni? Die bin na á tán a gusuũ zɔɔ̃ ka sóo ne? Die bin na á kelen gugurubaa zɔɔ̃, á tentenen gugurubaa zɔɔ̃ ka kilo ne?

¹³ Die bin na á Dɛnaa Lawa Yiri a woo ǹ bǎã yɛ? Die bin na á doroo kɔ la?

¹⁴Dɛnaa na á n doa kɔn die ne á tɔn sii giala ma? Die na á peperebaa ǹ zii nyaa nɛ? Die na á doɛ̃ kɔ la? Die na á yiridɛnaabaa ǹ zii nyaa nɛ?

¹⁵Á ke, gánan man ka mu a dɔɔ bɛ́ lɔn doɛ sóo ne. Maǹ ka nyɔɔsɔ̃ nàn goon bɛ́ lɔn kilo la. Mu gánan mɛnɛn da bii, bɛn man puusə ka gusuũ bɛ́ lɔn.

¹⁶*Wúlu màn mɛn kɔnbɔ ka Dɛnaa Lawa nɛ, Liban a tɔɔn tumaa a kaa kun ba bɛ boe wa. Daã tumaa a gɔn a kaa kun ba a *wúlu bɔ ǹ bǎã a tɛ koa boe wa.

¹⁷Tɔrɔn tumaa a kaa kun ba màn kɔn lɛa Dɛnaa Lawa yɔrɔ-a wa. Ǹ ba màn kɔn lɛa a yii li wa. Maǹ piɛ̃ lɛa a yɔrɔ-a.

¹⁸ Wɔ n boe la wɔ Dɛnaa Lawa zɔɔ̃ kɔn ka die ne? Wɔ n boe la wɔ wàa mɛn baa a kɔnboe lɛa?

¹⁹Gɔn dí-nyali na á màn nyín lɛ zɛnaa, sana-yoli sana kaa la, á wɔrɔ giin kaa a ganaa.

²⁰Min mɛn bɛ́ doobaa lɛa á la yii ni, bɛa gɔn màn kɛ lɛ a zɛnaa ganaa, gɔn mɛn bɛ́ a bɔɔ̃ wa, asɛ n giɛ bɛ li, bɛ kio, a n giɛ gɔn dí-nyali sonbore li, boe nyín sɛlɛ la, boe la á n golee lon.

²¹Kaa tɔn bɛ doɛ̃ wa? Ka tɔn ma wa? Ǹ bɛa boon kɛn pɛ ka-n haalɛ bibi wa? Ka kanaa a giala daa ǹ gɔn giala ma wa?

²²Dɛnaa Lawa a kii dankan nə tán a buuriibaa lalan lon. Minbuiin nɛn man ka bisin bɛ́ lɔn a yii li. Á lon lɛ bɔ ka mɔnaa bɛ́ lɔn, A ná a lɛ bɔ ka mɔnaa zìã bɛ́ lɔn, a n die giɛ̃ a nɛ.

²³A n kanaa nyɛɛnaandɛnan ziziɛ̃. Min mɛnɛn bɛ́ kanaa mìilandɛnan lɛa, a n bɛn biɛ màn kooro lɛa.

²⁴Ǹ tɔn nə ǹ da tán bɔrɔ wa, ǹ tɔn nə ǹ zumu bɔrɔ wa, ǹ gòonən nə tɔn wɔ tán dinin bɔrɔ wa, Dɛnaa Lawa n piɛ̃ pii ǹ ganaa. Maǹ laɛ, piɛ̃ gole n woe ǹ ne, ka buu gere bɛ́ lɔn.

²⁵Lawa sonbore n nɔ̀n diɛ: Ka n boe la ka ma zɔɔ̃ kɔn ka die ne? Die n boe la a goã goon ka masɛ nɛ?

²⁶Ka n yii saa lon ka ga! Die na á leeren zɛnaa? Die nə ǹ diɛ tɔ wɔ ganaa kɔn kio ka sɔraasin bɛ́ lɔn? Min mɛn bɛ́ ǹ tumaa bíi ka ǹ tɔ nɛ, ǹ dɛnaa a kakabaa laanka a pàã la yii ni. Leere kɔn ba nyaabiɛ ǹ tɔ bíi ǹ bǎã-n wa.

²⁷Izirayeli, wàa na á baa n tá boo diɛ, Zakɔba wàa na á baa n tá gungunun sii, n nə́ pii: «Maa biɛ̃ ǹ ke, Dɛnaa Lawa yii ba bɛ ganaa wa. Ma kɔnbɔ ka sii mɛn nɛ, maa Lawa yii ba bɛ ganaa wa.»

²⁸N ba bɛ doɛ̃ wa? N bin ma wa? Lawa mɛn bɛ́ a tan haalɛ bibi yǎa duduu, Dɛnaa Lawa, a din na á tán tumaa zɛnaa. Pàã a nyaabiɛ a ganaa duduu wa. A nɔmɛɛ wa. Dan ba a sii-doɛ̃ la wa.

²⁹A n wusii a pàã kɔ pàãwɛɛnaa la. Min mɛn bɛ́ á nɔmaa, a n bɛa dɛnaa foo taɛ̃.

³⁰Tɔntɔraan dinin tá nɔmɛɛ, ǹ pàã nya. Min kakan dinin tá boe ǹ mɛnaa.

³¹Sɛnɛ, min mɛnɛn bɛ́ n foo doɛ Dɛnaa Lawa ganaa, bɛn man wusii ǹ pàã dii yɛ. Maǹ yui ka giogialatã-a bɛ́ lɔn, baa sii, ǹ ba nɔmɛɛ wa. Maǹ woe nyɛɛnɛ, ka pàã nɛ.