Read Samo, Southern Iza 41 Bible Online

Iza 41 - Samo, Southern bible

Iza 41

¹Dɛnaa Lawa pɛ: Kasɛn, gánan kɛn mu ka da bii, ka giã kiĩni ma yɔrɔ-a, ka n too kɔ ma lon Kasɛn, tɔrɔn tumaa, ka n we yii. Ka n zɔ̃ ka dɔ ka boo da. Ka wɔ n ta kiri wɔ ǹ bǎã-n kun.

²Die na á min kɛ da zii la boe lɛ̀giala-n die[10], a n kiri pepere we a bɔ ǹ bǎã tumaa nɛ? Die na á da zii la? Die n tɔrɔn we a gɔn? Die n kiin kiɛ a pàã giulun? A gɔya sa nə ǹ bɔyɛɛ a ǹ baa gusuũ lɛa, A sa nə ǹ kio lui ka piɛ̃ bɛ́ woe buu gere-n lɔn.

³A nə ǹ kio lui. A n woe fufuu a yiri n waa nɛ, a gòã bin mɛ zii kɛ la a tá la wa.

⁴Die na á bɛ tumaa zɛnaa? Min mɛn bɛ́ kanaa a tɔrɔn koɛ, bɛ nɛ. Ma din Dɛnaa Lawa nɛ. Ma din ni sii tumaa giala kɔ lɛa. A wo kaa ǹ giala-nyɔmɔɔ lɛ, ma din Dɛnaa Lawa-n doo.

⁵Gánan mɛnɛn bɛ́ mu nə́ ǹ da bii, sii mɛn nə n zɛnaa, ǹ nə́ yɛ. Nyɛ́ɛ nə́ ǹ kũ Kanaa lɛ dan gánan nə́ bìn da, ǹ nə́ daa, ǹ gɔ̀nɔn nə́ bìn diɛ.

⁶Didie nə n doe ǹ miã lɛ. Didie n pii ǹ dɔɔ̃n nɛ: «N foo taã.»

⁷Gɔn-sɛlɛli n sana-yole foo taɛ̃. Gɔn dí-nyali mɛn bɛ́ fɔlɔ dí nyɛɛ ka yele ne, bɛ n fuũ foo taɛ̃. A n pii a dí wɔ paǹ li: «Á bǐɛ̃ kɔ.» Bɛ kio, a n dì nyín lɛ dere ka kiɛ nɛ, màn mɛn bɛ́ toɛ a nyan bìn da wa.

⁸ Nsɛ Izirayeli, maa dí-nyali, nsɛ Zakɔba, ma zaman mɛn yii gɔgɔɔ̃, ma n maa giaára Abrahamu tɔrɔ lɛa.

⁹Man má woo ga n li kanaa lɛ dan ganaa, má lɛ dia n la gána sɔsɔɔn nɛ. Má pɛ n nɛ: Ma n maa dí-nyali lɛa, má n yii gɔgɔɔ̃, ma n toa walan wa.

¹⁰Nyɛ́ɛ nyan nə n kũ wa, a giala, ma á kunun n ni. N nyan ga n para li ka foo ziziɛ̃-n wa. Masɛ din ni n Lawa lɛa. Man pàã koe n la, man die n gú ganaa, man kirisibaa ka maa bɔlɔgoondɛnaabaa nɛ.

¹¹Á ke, min mɛnɛn tumaa lɛ bɛ́ n li, bɛn wɔ n ka sìi ni ka tɔ ziziɛ̃ nɛ. Min mɛnɛn bɛ́ kɔn-a n nɛ ka zia nɛ bɛn tá re màn kooro biɛ, ǹ tá re papaɛ̃.

¹²Ń tá re giɛ n zɔ́ɔn lɛn basa li n fɔ̃, min mɛnɛn bɛ́ kɔn-a n nɛ ka zia nɛ, ǹ tá re màn kooro biɛ, ǹ ba re goɛ̃ ǹ tan doo wa.

¹³A giala, masɛ Dɛnaa Lawa nə n Lawa lɛa. Má n gusin-a gɔn kũ kaka. Man wusii pii n ni: «Nyɛ́ɛ nyan nə n kũ wa, man die n gú ganaa.»

¹⁴Nyɛ́ɛ nyan ka kũ wa Zakɔba a zaman, kasɛn kɛn ǹ nə́ ka biɛ ka nyuun bɛ́ lɔn, kasɛn Izirayeli a zaman; ma dinmaa n die kaa gú ganaa, Dɛnaa Lawa a da ǹ boo ne, kaa si sii la wole Izirayeli a Lawa sonbore ne.

¹⁵Á ke man die n biɛ dí nya ǹ màn dii lɛa, a sɔn nə́ sosolo, a n tii nyui, a sɔn nə màn papaa kɔn la. N tá re kelen yɔyɔrɛ, n nə ǹ bɔyaa n nə ǹ baa gusuũ lɛa. Tentenən kɛn, n tá re bɛn biɛ buu gere lɛa.

¹⁶N tá re ǹ sui, piɛ̃ nə ǹ goa a wo ǹ ne. Piɛ̃ gole á re ǹ pɛsɛ̃ paǹ tumaa li. Sɛnɛ nsɛ, n tá re n lɛ dii ka foo kɔɔ̃n nɛ, Dɛnaa Lawa taman yii. Izirayeli a Lawa sonbore kɛ á re n foo kɔɔ̃n koe.

¹⁷Nɔmaa wolen laanka doobaan man giɛ mu li. Sɛnɛ, ǹ ba yii wa. Mu boro nə́ ǹ lɛwɔn laa. Á bǐɛ̃ kɔ, á ke! Masɛ Dɛnaa Lawa n die ǹ lɛ sii. Masɛ Izirayeli a Lawa, ma a re n la boe ǹ ganaa wa.

¹⁸Man die tà mu diɛ baa si ganaa kele mìi kooro-an la, ma mu yalan bũ nyankɔrɔ basa nɛ. Man die diə gole bɔyɛɛ ma baa pɛrɛ gole lɛa, ma tán gere baa mu bǎã lɛa.

¹⁹Diə gole ne, man die *sɛdrə da zumi, ka kasia da nɛ, mirti da nɛ, ka *olivie da nɛ. Gánan mɛnɛn bɛ́ mu ba ǹ nɛ wa, ma á re da tɔrɔ gigiã kiɛ kun ma zumu walan.

²⁰Ka bɛ nɛ, min tumaa á re yii, min tumaa á re doɛ̃, min tumaa á re n yiri koɛ li, ǹ na a giala ma, mà Dɛnaa Lawa na á siin kɛn lɛn zɛnaa, mà Izirayeli a Lawa sonbore na á ǹ zɛnaa.

²¹Kasɛn tɔrɔ kɔsɔn dìn lɛn, ka da kaa siin yɔrɔ pɛ, Dɛnaa Lawa a da ǹ boo ne; ka kaa zɛnaa ǹ siin nyaa, Zakɔba a kii na á pɛ.

²²Ka da ǹ nɛ, siin mɛnɛn bɛ́ die, ka bɛn pɛ wɔ nɛ. Lɛlɛ siin kɛn nə goã lɔn, ka bɛ pɛ wɔ nɛ. Ka ǹ nyaa wɔ nɛ, wɔ n taasɛ ǹ ganaa. Wɔ á re bɛn kio siin doɛ̃. Biɛ̃ ǹ siin kɛn, ka ǹ pɛ wɔ nɛ, wɔ dɔ̃ sii mɛn bɛ́ re n zɛnɛɛ.

²³Sii mɛn bɛ́ re n zɛnɛɛ biɛ̃, ka bɛ pɛ wɔ nɛ. Wɔ á re doɛ̃ ka bɛ nɛ, wáa ka ǹ lawan lɛa. Ka sii bǐɛ̃ hinlaa sii baraa zɛnaa, laa ka sii kɔn zɛnaa wɔ yii yɛ, wɔ boo la wɔ ga a ganaa kun.

²⁴Sɛnɛ, kaa màn kɔn din lɛa wa. Ka bɛ́ siin mɛnɛn zɛnɛɛ, kooro ne. Min mɛn bɛ́ ka biɛ lawa lɛa, bɛ n min bɔbɔnɛɛ lɛa.

²⁵Má min da zii la gɔsɛ a lɛ̀gɔn la, a n boe wasa a bɔ ǹ bǎã-n die. A n ma tɔ guguru koe. A n tɔrɛ gánadɛnan la, ka ǹ bɛ́ tɔrɛ bɛrɛɛ la lɔn, ka dɔn-bɔle bɛ́ gì tɔrɛ a gòã-n lɔn.

²⁶Die na á bɛ pɛ wɔ nɛ a giala-kɔ li, mà wɔ dɔ̃? Die na á n gɔn waa wɔ-n lɛlɛ, mà wɔ pɛ mà sonbore ne? Ka bii min kɔn màn kɔn pɛ wa. Min kɔn nə n lɛ bũ wa. Min boo kɔn din ma ka lɛ-n wa.

²⁷Ma din Dɛnaa Lawa n má a boo da *Siɔn bibinaa nɛ, má maa dia dí-a wole dia Zeruzalɛmu máa a wo boo tii kɔɔ̃n pɛ.

²⁸Má ga tɛrɛɛ nɛ, ma min kɔn yɛ wa. Ǹ bii, ǹ kɔn banban a na a taasiɛn nyaa wa. Min banban, nɔ̀n nə́ boe la a n da la wa. Min kɔn banban a boo binyəə kɔ ma la wa.

²⁹Á ke, ǹ ba màn kɔn lɛa wa, ǹ ba màn kɔn zɛnɛɛ wa. Ǹ dìn kɛn man piɛ̃ lɛa, màn kooron lɛa.