Read Samo, Southern Iza 43 Bible Online

Iza 43 - Samo, Southern bible

Iza 43

¹Kanna kəni Zakɔba, Dɛnaa Lawa n kɛ pii n ni, asɛ mɛn nə n zɛnaa, á n da kanaa, Izirayeli: N nyan nyɛ́ɛ baa wa, A giala, n si sii la wole n ka ma din ni. Má n bíi ka n tɔ nɛ, Ma n ma din wɔ lɛa.

²Ta ma n mu zuzulu kuri, ma tá kunun n ni. Ta ma n tà kuri, mu á re n kuĩ wa. Ta ma n tɔ we tɛ bii, a re n kuĩ wa. Tɛ buə̃ lɛwɔn ba re miɛ n-a wa.

³A giala, masɛ Dɛnaa Lawa nə n Lawa lɛa. Ma din Izirayeli a Lawa sonbore nə n kirisibaali lɛa. Má Ezipti kɔ n nyin giɔ̀mɔ lɛa, má Etiopii laanka Sabaa kɔ n dòo lɛa.

⁴Taãn nɛ, n sii n kaka ma gɔn. Ma n màn sonbore lɛa, ma tá n narɛ. Bɛ lɛ nɛ man minin koe n bǎã nɛ, ma á n nyin lon koe ka tɔrɔn nɛ.

⁵Nyɛ́ɛ nyan nə n kũ wa, ma á kunun n ni. Ma á re boe ka n nɛnyaanan nɛ lɛ̀giala-n ma da ǹ nɛ, ma á re boe ǹ ne lɛ̀nyɛɛnɛ ma ǹ sɔkɔn.

⁶Má pɛ gɔsɛ a lɛ̀gɔn nɛ: «Ǹ toa walan!» Má pɛ gusin a lɛ̀gɔn nɛ: «N nyan bìn da ǹ ganaa wa!» Ka maa nɛgiĩn kɛn kũ gána sɔsɔɔn kɛn nɛ, ka da ǹ nɛ, ka maa nɛlɔn kɛn kũ kanaa lɛ dan ganaa ka da ǹ nɛ.

⁷Ma tɔ bɛ́ min mɛnɛn tumaa ganaa, ma ǹ mɛnɛn tumaa da, má nyin kɔ ǹ la, ma ǹ mɛnɛn zɛnaa, ka wusoo ka da ǹ nɛ, ǹ gugurubaa da ma tɔ la.

⁸Ka tɔrɔ yii tere-a kɛ kũ, ka soo ne. A yiin tan, sɛnɛ, ǹ ba wɔlɔ yii wa. A toon tan, sɛnɛ ǹ ba boo miɛ wa.

⁹Zaman tumaa nə n lɛ sɔkɔn! Tɔrɔn tumaa nə n lɛ sɔkɔn! Sii mɛn bɛ́ n zɛnɛɛ, die n boe la a yɛ ǹ bii, a bɛ pɛ? Sii mɛn nə n zɛnaa lɛlɛ á kiɛ̃, die n boe la a bɛ pɛ wɔ nɛ? Bɛ̀ ǹ tá li ǹ nyaa mà sonbore tá ǹ lon, ǹ da ka ǹ siéren ne! Sieren lɛn nə pɛ mà «Taãn nɛ!»

¹⁰«Maa siéren man ka ka dinin ni. Kasɛn nɛ, ka maa dí-nyali kɛ nɛ má bɔ. Màn mɛn bɛ́ toɛ, ka golee masɛ li, ka dɔ̃, ka a giala ma, mà masɛ din nə Lawa lɛa. Lawa kɔsɔ goã ma nyɛɛn wa. Kɔsɔ dɔ a re yii ma kio wa. Dɛnaa Lawa a da ǹ boo ne.

¹¹Ma din, ma dinsɔɔ̃ n Dɛnaa Lawa lɛa. Bɛ̀ á n bɔ masɛ nɛ, kirisibaali kɔsɔ banban.

¹²Ma din ni má kirisibaa boo da, ma din ni má daa nɛ. Ma din ni má nyaa, lawa soree bie wa. Kasɛn man maa siéren lɛa, masɛ n Lawa lɛa. Dɛnaa Lawa a da ǹ boo ne.

¹³Man ma tan Lawa lɛa duduu, Min kɔn ba boe la a min si ma gɔn wa. Bɛ̀ má sii mɛn zɛnaa, min kɔn ba boe la a bɔyaa wa.»

¹⁴Dɛnaa Lawa, kaa si sii la wole, Izirayeli a Lawa sonbore n kɛ pii: «Ka dinin taman yii, man die min diɛ *Baabilonii. Kiɛnlɛ-a ǹ goon mɛnɛn bɛ́ kiwi lɛ tamɛɛ, man die bɛn woɛ̃. Baabilonii minin li, foo kɔɔ̃n lɛ-dɛ á re n bɔyɛɛ a gɛ̀ loe baa.

¹⁵Ma din ni Dɛnaa Lawa lɛa, kaa Lawa sonbore lɛa, Izirayeli a diɛ wole lɛa, kaa kii lɛa.»

¹⁶Dɛnaa Lawa n kɛ pii asɛ mɛn bɛ́ á zii bɔ yìsi mu la, á zii bɔ á mu pàã gole kɛ wɔsɔ kɔn nɛ.

¹⁷Á soo ziabaa ǹ wotoron laanka sùin ni a nɛ, ka sɔraasin ni ka ziabaali zanbian nɛ. Ǹ nə́ mɛnaa, ǹ yoo duduu wa. Ǹ nə́ nimi, ka bolon tɛ bɛ́ lɔn.

¹⁸Sisia kəni, Dɛnaa Lawa n pii: Ka nyan nə n yiri kɔ ka lɛlɛ ǹ siin kɛn nɛ wa. Sii mɛn bɛ́ á n zɛnaa lɛlɛ, ka nyan nə n taasɛ ka bɛ-n wa.

¹⁹A giala á ke, man die sii soree zɛnɛɛ, a n gole koe goon lɛa. Ka yii tá a ganaa ya? Sonbore, man die zii boe diə ne, ma mu da baa si ganaa bɛa bǎã gere kɛ lɛ nɛ.

²⁰Don siĩn ni, tolokan nɛ ka bɛndan nɛ, bɛn tá re gugurubaa diɛ ma tɔ la, a giala mà ma mu da baa si ganaa diə gole ne, ma tàn bɔ tán gere la. Sonbore, ma á re mu koe maa tɔrɔ kɛ la, má a yii gɔgɔɔ̃.

²¹Ma tɔrɔ mɛn lɛ yii gɔgɔɔ̃ maa wɔ lɛa, bɛ á re ma tɔ boe.

²²Dɛnaa Lawa pɛ: Zakɔba, n lɛ dia ma la wa. Izirayeli, ma nə n nɔmaa ka ma nɛ.

²³A da yaa n bie n goã tɔɔ bisin koe masɛ la *wúlu màn tiɛ̃ lɛa wa. N masɛ guguru kɔ ka wúlu mànan nɛ wa. Ma n baa bɛ̀rɛ lɛa má gɔn màn liɛ n la wa. Ma n nɔmaa má màn gìĩ kɔɔ̃n sii n la wa.

²⁴Masɛ a lɛa bie, ń wɔrɔ ziziɛ̃ ń da yon gìĩ kɔɔ̃n pii wa. N ma kã ka n wúlu màn siĩ nyɔɔn-an kɛn nɛ wa. Sɛnɛ, n sãn taman yii, ń ma baa bɛ̀rɛ lɛa. Ń ma nɔmaa ka n sii baraan nɛ.

²⁵Ma bɛ́ màn mɛn lɛa, bɛ lɛ taman yii, ma dinsɔɔ̃ nə n sii baraan toɛ n nɛ, ma a re n yiri koɛ ǹ nɛ doo wa.

²⁶N bɛ́ zɛ̀rɛ koɛ ma ganaa ka sii mɛn nɛ, ma yiri gisĩ bɛ nɛ. Wɔ n ta kiri wɔ ǹ bǎã-n kun, siin mɛnɛn bɛ́ sonbore koe n la, kɔ ǹ lɛ n nə ǹ pɛ.

²⁷N digolo bibinaa sii baraa zɛnaa, n boo gii-dalin nə́ n gòãn dii ma ganaa.

²⁸Bɛ lɛ nɛ, má bǎã sonbore kɛa kiãn nɔɔ má ǹ kaa, má Zakɔba tɔrɔ lɛ wɔ a ziziɛ̃ wolen gɔn, má Izirayeli toa a sɔ kaa ma la wolen gɔn.