Read Samo, Southern Iza 44 Bible Online

Iza 44 - Samo, Southern bible

Iza 44

¹Kanna kəni, n too kɔ, maa dí-nyali Zakɔba, Izirayeli, nsɛ mɛn bɛ́ má n yii gɔgɔɔ̃.

²Dɛnaa Lawa n kɛ pii n ni, asɛ mɛn nə n zɛnaa, á n da n dan gɔ́ɔ̃ nɛ, asɛ mɛn bɛ́ die n gú ganaa: Nyɛ́ɛ nyan nə n kũ wa, Zakɔba a zaman, nsɛ Yesurumu ke má n yii gɔgɔɔ̃[12].

³Taãn nɛ, mu boro bɛ́ tán mɛn ganaa, ma á re toɛ mu baa si bɛ la, tà baa si tán gere la. Ma á re ma yiri gisĩ n nɛnyaanan la, ma barka da n nɔ̀ɔ fulupaa ganaa.

⁴Ǹ tá re yii, ǹ gole kɔ, ka wuru gɔ́ɔ̃ nɛ ǹ buu bɛ́ lɔn, ka da bɛ́ lɔn, mu lɛkoro lɛ-a.

⁵Goon tá re pii: "Dɛnaa Lawa wɔ n ka ma nɛ"; kɔsɔ á re n din tɔ koe "Zakɔba"; kɔsɔ á re kiɛ̃ a gɔn ganaa: "Man Dɛnaa Lawa wɔ lɛa", á re n din tɔ koe Izirayeli.

⁶Dɛnaa Lawa, Izirayeli a kii, Izirayeli a si sii la wole, Dɛnaa Lawa Pàãyiidɛnaa n kɛ pii: Ma din nə sii tumaa a giala-kɔ lɛa, ma din ni sii tumaa a giala-nyɔmɔɔ lɛa. Bɛ̀ á n bɔ ma din ni, Lawa kɔsɔ banban.

⁷Die n ka masɛ bɛ́ lɔn? A kiɛ̃ a boo saa, siin mɛnɛn bɛ́ re n zɛnɛɛ, a bɛn nyaa, a ǹ yɔrɔ pɛ! A saa maa minbuiin nɛ bibinaa zɛnaa ganaa, sii mɛn nə n zɛnaa, a bɛ pɛ!

⁸Kasɛn maa zaman, nyɛ́ɛ nyan ka kũ wa. Ka gɔ̀nɔn nyan bìn da wa. Má a boo da ka nɛ, má pɛ ka nɛ a biikoo ná a kànaa wa. Ka ǹ maa siéren lɛa. Lawa kɔsɔ tan masɛ kio? Haayii! Ma din ni kaa gɛ̀fu kaka lɛa. Ma a kɔsɔ doɛ̃ wa.

⁹Min mɛnɛn bɛ́ dì nyínin zɛnɛɛ, ǹ ba màn kɔn lɛa wa. Ǹ màn nyín siĩnin kɛn dɔn là banban. Bɛa nyínin kɛn lɛn manɛ ǹ dinin siéren lɛa. Siéren manɛ, ǹ yii na a màn kɔn yii wa, ǹ nə́ ǹ ba sii kɔn doɛ̃ wa. Maǹ sìi diɛ ǹ ganaa.

¹⁰Là ba dì zɛnaa ganaa ka màn nyín zɛnaa-n wa. Bɛ a die ka màn kɔn nɛ wa.

¹¹Á ke, min mɛnɛn bɛ́ n parɛɛ bɛ ganaa, bɛn wɔ n ka sìi ni. Ǹ zɛnaa wolen man minbuiin nɛn lɛa! Ǹ tumaa nə n sɔkɔn, ǹ daa, nyɛ́ɛ nə ǹ kuĩ, sìi nə n kɔ ǹ lɛ!

¹²Fuũ n kán lɛ boe tɛ nàn nɛ. A n dii ka yele ne ka a wù bii ǹ pàã nɛ. Sɛnɛ, bɛ̀ bòo tá a ganaa, pàã ba a lon doo wa. Yǎa a mu boɛɛn mii a tɔn pàã yii.

¹³Da-sɛlɛli n biɛ diɛ gɔn li, a zɔɔ̃, a dì nyín zɛnaa la ka ton fu ni. A n gɔn lɛ kuri ka sɛ̀miɛ̃ nɛ, a n zɔnɛ ka kàka nɛ. A n giɛ minbuiin nɛ ganaa, min siĩn-siĩni, a na a kɔnboe zɛnaa. Bɛa nyín kɛ lɛ n woe n koɛ kion.

¹⁴A na á *sɛdrə da kuru, á siprɛsi da laanka sɛ́ni da kuru á bɔ ǹ nɛ daã gòã li. A na á pɛ̃n da zumu, la mu n diɛ gole kɔ ganaa.

¹⁵Maǹ tɛ koɛ ka bɛa gɔn lɛ nɛ, ǹ nə n gɔ̀nɔn wɔ̃ a ganaa, hinlaa ǹ màn-bii zɛnaa nɛ, hinlaa ǹ dì kooro nyín zɛnaa nɛ ǹ na a nyankɔ, hinlaa, ǹ dì nyín zɛnaa nɛ, ǹ kaa tán a yɔrɔ-a ǹ na a guguru kɔ.

¹⁶A n gɔn lɛ a talɛɛ siɛ, a tɛ koa nɛ. A n siĩ tiɛ̃ nɛ a sɔ̃, a bòo nya. Hinlaa, a nə n gɔ̀nɔn wɛɛ̃ a ganaa, bɛ̀ á n pii: «Gɔn kɛa kuĩ dɛ, a tɛbaa miã banban!»

¹⁷Gɔn lɛ a gialakun ke, a n dì zɛnɛɛ nɛ, màn nyin lɛa. A kaa tán a yɔrɔ-a a na a guguru kɔ, a ná a nyankoe kɛnɛn: «Ma n maa lawa lɛa, ma kirisibaa!»

¹⁸Bɛa minin kɛn ba màn kɔn doɛ̃ wa. Ǹ ba sii kɔn giala miɛ wa. A giala, ǹ yii na á tã màn mɛn bɛ́ toɛ ǹ baran wɔlɔ yɛ wa, ǹ yiri na á tã màn mɛn bɛ́ toɛ ǹ baran boo giala ma wa.

¹⁹Min kɔn ba n taasɛ, a bɔ a din ni, min kɔn ba yiri yii ka sii-doɛ̃ nɛ a pɛ: «Má tɛ koa ka gɔn lɛ a talɛɛ nɛ, má màn-bii zɛnaa a tɛ nàn la, má siĩ tã la má sɔ̃. Ma á re màn nyín bɔbɔnɛɛ zɛnɛɛ ká a gialakun kɛ-n doo? Ma a re kiɛ tán gɔn lɛkoro yɔrɔ-a wa!»

²⁰Màn mɛn bɛ́ ton lɛa, minin kɛn manə n parɛɛ bɛ ganaa. Maǹ sã gɔ́ɔ̃ nɛ, ǹ ba taasiɛ sonbore we wa. Ǹ ba re kanbiɛ wa. Ǹ kɔn ba re pii: «Màn ke ma gɔn, Lawa taãn bie wa.»

²¹«Nsɛ Zakɔba n yiri kɔ ka kɛ nɛ, nsɛ Izirayeli, a giala ma n maa dí-nyali lɛa. Man má n zɛnaa máa n maa dí nya. Izirayeli, ma yiri a boe n ne wa.

²²Má n sãn kɛn tuturu ka labara bɛ́ lɔn. Má n sii baraan kɛn loo ka furuməə bɛ́ lɔn. Wusoo n da ma li, ma nə n si sii la wole lɛa.»

²³Nsɛ, lon, loe lɔ ka foo kɔɔ̃n nɛ. Nsɛ, tán giulun, n lɛn saa lon, a giala, Dɛnaa Lawa na á sii zɛnaa. Kasɛn kelen laanka dan kɛn nɛ daã nɛ, ka n lɛ dɛ ka foo kɔɔ̃n nɛ. A giala, Dɛnaa Lawa ná a zaman kirisibaa, a ná a tɔ golebaa nyaa Izirayeli gána nɛ.

²⁴Dɛnaa Lawa n kɛ pii n ni, asɛ mɛn bɛ́ n si sii la wole lɛa, asɛ mɛn nə n zɛnaa n dan gɔ́ɔ̃ nɛ: Ma din ni Dɛnaa Lawa lɛa. Màn mɛn tumaa bɛ́ á tan, ma din ni má ǹ zɛnaa. Ma dinsɔɔ̃ n má lon lɛ bɔ, má kanaa nyɔmaa, min kɔn goɛ̃ yɛ a-n wa.

²⁵ Kanna kəni, man wɔ-kulin sii nyaan kɛn sàabiɛ; min mɛnɛn bɛ́ biɛ̃ ǹ pii, man boo kooro we bɛn lɛ-n. Man sii-dɔ̃li lɛ tiɛ̃, ma ǹ doɛ̃ lɛ bɔyaa ma baa yiriwɛɛnaabaa lɛa.

²⁶Sɛnɛ, man toɛ maa dí-nyalin boon nə yɔrɔ yɛ. Maa dia dí-a wolen nə boo mɛn da, man toɛ bɛ yɔrɔ yɛ. Man kɛ pii Zeruzalɛmu a paǹ li: «Ǹ tá re wusii ǹ giã n nɛ doo.» Man kɛ pii Zudaa kiwin wɔ paǹ li: «Ǹ tá re wusii ǹ ka dɔ.» Hiĩ, ǹ tá re wusii ǹ kaa kɛbɔlɔn dɔ doo.

²⁷Man pii mu zuzulu ni: «Piɛ̃ ka daɛ̃. Ma á re n mu diɛ piɛ̃ ganaa»

²⁸ Man kɛ pii kii Siirusu a paǹ li: «Maa zaman-lɛduə̃li ni.» Sii mɛn tumaa bɛ́ kɔɔ̃n ma ganaa, a n bɛ zɛnɛɛ. Á re pii mà ǹ wusoo ǹ Zeruzalɛmu kiwi dɔ, ǹ wusoo ǹ Lawa a kion lɛ dɔ.