Read Samo, Southern Iza 47 Bible Online

Iza 47 - Samo, Southern bible

Iza 47

¹ Dɛnaa Lawa pɛ: *Baabilonii kiwi, gisĩ n giã tán gusuũ li, *Kaldee minin kiwi, kii dankan bɛ́ a bǎã mɛn nɛ wa, giã tán furu-n walan. Baabilonii kiwi, giã tán furu-n sonbore! Kanna, ǹ ba re n bíi: "Baabilonii sonbore" doo wa, "Baabilonii siĩn" wa.

²Gii saa, n *belee lɔ a wùsu baa. Mɔnaa bɔ n mìi lɛ, n mɔnaa lɛ goa, n gisin kaa kanaa, n tà kuru.

³Minin tá re n tontoro yii. Màn mɛn bɛ́ sìi diɛ n ganaa, ǹ tá re bɛ yii. Man die gɛ̀ dòo boe. Min kɔn dɔ a boe la a ma kurəə a ganaa wa.

⁴Min mɛn bɛ́ wɔ si sii la wole lɛa, a tɔ n "Dɛnaa Lawa Pàãyiidɛnaa". Izirayeli a Lawa sonbore ne.

⁵Giã tán, n nə n lɛ tã kiĩni Baabilonii kiwi. N duru wɔlɔ tì li. A giala, ǹ ba re n bíi "gánan kii lɔ" doo wa.

⁶Ma foo goã á yoo maa zaman li. Màn mɛn bɛ́ maa wɔ lɛa, má n la bɔ bɛ ganaa, má ǹ wɔ n gɔn. N makara bɔ ǹ ganaa boɛɛn dinin wa. Ń nə́ n pàã a gugurubaa da ǹ min zizin kɔrɔn, ka zǔu bɛ́ lɔn.

⁷Ma nə n goã pii: «Man kii lɔ lɛa miɛ̃ yǎa duduu.» N nə n taasɛ kɛa siin kɛn nɛ wa. N nə n taasɛ ka biɛ̃ ǹ sii-n wa.

⁸ Kanna kəni, n too kɔ kɛ li, nsɛ mɛn bɛ́ n din foo sii n kɔɔ̃nɛ n ganaa. Ma n giã-n tán kiĩni, n nə́ pii n gɔ́ɔ̃ nɛ: «Ma miã banban, min kɔn ba ka ma bɛ́ lɔn wa. Ma a giɔɔrɔ biɛ duduu wa. Maa nɛnyaanan ba bɔ̀n biɛ wa.»

⁹A bɛ́ miɛ̃, koe màn paa kɛ n die n yii bǎã goon ne. Lɛawaa goon gɔ́ɔ̃ nɛ, n nɛnyaanan tá re bɔ̀n biɛ n nə n bɔyaa n giɔɔrɔ baa. Bɛa koen lɛn tá re die n la ka pàã nɛ, n wɔ-kũ kɛn tumaa ka n gɔn nɔɔn kɛn tumaa a re boe la ǹ nə ǹ sàabaa wa.

¹⁰Ma nə n goã n foo doɛ n sii bɔbɔnɛɛn kɛn ganaa. Ma nə n goã taasɛ: «Min kɔn yii ba ma ganaa wa.» N yiridɛnaabaa laanka n sii-doɛ̃n lɛn man nə́ n sã. Ma nə́ n goã taasɛ: «Ma miã banban, min kɔn ba ka ma bɛ́ lɔn wa.»

¹¹Á ke, koe n die boe n ganaa. N ba re boe la n na a lɛ goa wa. Koe gole n die miɛ n la. N ba re kanbiɛ a ganaa wa. Basaã gole mɛn bɛ́ n yiri ba a ganaa wa, bɛ n die n tɔwɛɛ bǎã goon ne.

¹²N gɔn doa wɔ-kũlin laanka bòon ganaa. A kũ n tenmaa waáraa ganaa, n nə n din nɔmaa ǹ ganaa. Kɔntan, a là á re goɛ̃ n ganaa, hinlaa n tá re boe la n nyɛ́ɛ da min kɔsɔn ganaa nɛ!

¹³Ń nɔmaa doroo damata gɔn. Min mɛnɛn bɛ́ giɛ lon gɔ̀nɔn ganaa, ǹ nə́ lieren siin yɔrɔ pii, siin mɛnɛn bɛ n zɛnɛɛ mui li mui li, bɛ̀ ǹ bɛ pɛ n nɛ, ǹ kiɛ̃ ǹ da n kirisibaa kəni!

¹⁴Á ke, maǹ die goɛ̃ ka buu gere bɛ́ lɔn, tɛ n die kuĩ. Ǹ ba re kanbiɛ tɛ ganaa wa. Nyɔɔ tɛ bie gɔ̀nɔn wɔ̃ ǹ wɔ lɛa wa, tɛn gɔn lɛ bie bɛ̀ ǹ giã tán a yɔrɔ-a wa!

¹⁵N nə́ n din nɔmaa ka gɔn nɔɔ nɛ bɛa minin lɛn li, a kũ n tenmaa waáraa ganaa. Ǹ bɛ́ màn mɛn lɛa n gɔn kanna kəni, bɛ n ke: Kanna, maǹ woe paǹ tumaa li, ǹ kɔn ba boe la a n kirisibaa wa.