Read Samo, Southern Iza 52 Bible Online

Iza 52 - Samo, Southern bible

Iza 52

¹ N yii kaa, n yii kaa, n pàã nyaa *Siɔn. N mɔnaa sonboren wɔ Zeruzalɛmu, nsɛ kiwi sonbore. A giala, tiin ni ka min mɛnɛn bɛ́ gɔ̀dɛnan lɛa, bɛn gòã á re miɛ n li doo wa.

²Gusuũ mɛn nə n kɔ n lɛ, bɛ duduu n bɔ n ganaa. Zeruzalɛmu, yoo, n giã tán! Siɔn, kòso nɛ, zɔrɔka bɔ n bɔ n bɔlɔ-a!

³Dɛnaa Lawa bɛ́ boo mɛn diɛ, á ke: «Maǹ nə́ goã ǹ nə́ ka sã bɛ̀rɛn lɛa kooro. Ǹ tá re wusii ǹ ka mìi bɔ wɔrɔ ná a ba a-n wa.»

⁴Dɛnaa Lawa bɛ́ boo mɛn diɛ doo, á ke: «A giala kɔ li, maa zaman lɛ na á woo gùli kɔ Ezipti. Sɛnɛ, a giala nyɔmɔɔ, Asiirii minin man nə́ bɔ ǹ yii ni.

⁵ Bɛ gɔ́ɔ̃-n sisia, bɛa là n ka wáa nɛ masɛ ganaa? Dɛnaa Lawa a da ǹ boo ne. Ǹ nə́ woo maa zaman lɛ nɛ kòso nɛn lɛa kooro. Min mɛnɛn bɛ́ ǹ mìi la, maǹ nə n lɛ dii, ǹ nə́ sɔ kiɛ ma la duduu, Dɛnaa Lawa a da ǹ boo ne.

⁶Bɛ lɛ nɛ, maa zaman tá re ma tɔ doɛ̃. Sonbore, ǹ kɔn pinaa ǹ tá re doɛ̃ mà ma din ni pii kɛnɛn: Ma á die!»

⁷ Kɛ n foo kɔɔ̃n lɛa, dia dí-a wole mɛn bɛ́ boe kelen mìi ni, a n là nyantoro boo diɛ, a n boo tii kɔɔ̃n pii, a n kirisibaa boo diɛ. A n pii Siɔn nɛ: «N Lawa lɛ n kii lɛa.»

⁸N too kɔ n bǎã-lɛduə̃lin lon, Ǹ tumaa n foo kɔɔ̃nbaa ǹ lɛ-dɛ we kun. A giala, ǹ yii na a ganaa Dɛnaa Lawa n wusii die Siɔn.

⁹Zeruzalɛmu a kɛbɔlɔn lɛn, ka foo kɔɔ̃nbaa ǹ lɛ dɛ, ka loe lɔ kun! A giala Dɛnaa Lawa n wusii a zaman foo taɛ̃. A n Zeruzalɛmu sii diɛ.

¹⁰Dɛnaa Lawa na a pàã sonbore kɛ tumaa nyɛɛ tɔrɔn tumaa yɔrɔ-a. Dɛnaa Lawa bɛ́ wɔ kirisibiɛ lɔn, min tumaa á re bɛ yii yǎa kanaa lɛ dan ganaa.

¹¹ Kasɛn mɛnɛn bɛ́ Dɛnaa Lawa a wúlu bɔ ǹ mànan guĩ, ka woo, ka wo fufuu! Ka soo ka n bɔ *Baabilonii, ka nyan nə n gɔn da màn gɔ̀dɛnaa kɔn ganaa wa. Ka soo kiwi lɛ nɛ ka n dinin *yoreen kɔ.

¹²Sɛnɛ ka nyan soo kiwi lɛ nɛ ká baafuubaa nɛ ká maǹ ka lui wa. A giala, Dɛnaa Lawa din nə tɔ we ka nyɛɛnɛ, Izirayeli a Lawa n tɔ we ka kio.

¹³Dɛnaa Lawa pɛ: Á ke, maa dí-nyali n die bǐɛ̃ koe. Ǹ tá re a guguru koe, ǹ na a laakalaa gugurubaa n die n koe la.

¹⁴Min mɛn tumaa yɛ, nyɛ́ɛ nə́ ǹ tumaa kũ. A giala, a yɔrɔ nə́ n bɔyaa á la yii ni. A minbuiin nɛ a kɔnboe lɛa doo wa.

¹⁵ Sisia kəni, tɔrɔ gigiã á re n kaã biɛ a ganaa. Boo ba kiin lɛ-n a yɔrɔ-a wa. A giala, ǹ bɛ́ ǹ màn mɛn pɛ ǹ nɛ wa, ǹ tá re bɛ yii, ǹ bin bɛ́ ǹ tɔn boo mɛn ma wa, ǹ tá re bɛ giala miɛ.