Read Samo, Southern Iza 53 Bible Online

Iza 53 - Samo, Southern bible

Iza 53

¹ Wɔ boo mɛn ma, die na á golee li? Die na á Dɛnaa Lawa a boo sii la dɔ̃?

²Dɛnaa Lawa yɔrɔ-a, a dí-nyali gole kɔ ka da ten bɛ́ lɔn, ka da gòon bɛ́ lɔn soe tán gere la. Siĩnbaa a paǹ ba a ganaa màn mɛn bɛ́ toɛ yii bɔ li wa. A gama-a sii a min kuĩ wa.

³Ǹ nə́ n la bɔ a ganaa, ǹ nə́ da ǹ gɔn dɔ̀ɔ̃ nɛ. Nɔmaa wole ne, a lɛ mui ka fuu ni. A n ka min mɛn bɛ́ min kɔn ba li mà a ga a ganaa wa. Ǹ nə́ n la bɔ a ganaa, a màn kɔn lɛa wɔ yii li wa.

⁴ A da yaa, wɔ dinin busun man nə́ goã a mìi ni. A na á wɔa fuu si a din ganaa. Wɔsɛn dɔn man ke taasɛ, wáa Lawa n dɔlɔ boe a ganaa, a n nɔmaa diɛ a mìi ni, a ná a yii puusə koe.

⁵ Sɛnɛ, wɔ dinin siɛ̃n taman yii ni, ǹ nə́ dɛ ǹ nə́ busu da a ganaa. Wɔa sii baraan taman yii, ǹ nə́ yɔyɔrɛ. Dɔlɔ mɛn bɛ́ là nyantoro koe wɔ la bɛ na á mɛ asɛ la. A busulɛn taman yii, wɔsɛn man kakabaa yii.

⁶ Wɔ tumaa n wɔ goã ka sère papaã wolen bɛ́ lɔn, didie n woe a din mìi gialaa, Dɛnaa Lawa wɔ tumaa a siɛ̃n da a mìi ni.

⁷ Ǹ nə́ fuu nyaa nɛ, ǹ ná a yii puusə kɔ sɛnɛ, á lɛ kɔ bɛ ganaa a lɛ n tumu, ka sère nɛ mɛn bɛ́ ǹ nə́ woe ne a dɛ ǹ bǎã nɛ, ka sère mɛn bɛ́ ǹ tá a ka kuri a lɛ n tumu.

⁸Ǹ nə́ kũ, ǹ nə́ kiri wɔ a ganaa, ǹ nə́ dɛ. Sɛnɛ, a din a waáraa minin bii, die na á n yiri kɔ bɛ li. Sonbore, maǹ nə́ dɛ ǹ nə́ bɔ yiikoonaan bii. Ǹ nə́ dɛ á gã, a zaman a sii baraan taman yii.

⁹ Ǹ nə́ bĩ kun ka min baraan nɛ, a yala n kun ka pàãman nɛ. A da yaa dɔn, a kakaarɛbaa sii kɔ́n zɛnaa wa, boo kɔkɔrɔ kɔ́n bɔ a lɛ-n wa.

¹⁰Dɛnaa Lawa na á goã li a yɔyɔrɛ ka fuu ni. A bɛ́ á n din kɔ zɛ̀rɛ si Lawa la ǹ *wúlu màn lɛa, á re tɔrɔn yii, a yii á re goɛ̃ koo a belebɔ. Sii mɛn bɛ́ kɔɔ̃n Dɛnaa Lawa-a, bɛ lɛ n die n zɛnɛɛ.

¹¹Fuun kɛn lɛa á ǹ si a ganaa, á re wɔlɔ fúlu yii. Á re piɛ̃ ka là nyantoro ne. A sii-doɛ̃ taman yii, maa dí-nyali, min pepere taãn-taãn kɛ á re min gigiã darɛɛ peperebaa ganaa, a giala, á n toɛ̃ ka ǹ sii baraan nɛ.

¹² Bɛ lɛ nɛ, man bǎã koe la min dadaran bii. Á re zɔ́ɔn gɔn màn gii kɔn ka pàãdɛnan nɛ. A giala á n din kɔ gɛ̀ la, ǹ nə́ da kun ka min baraan nɛ. Taãn nɛ, á n toɛ̃ ka min gigiã a sii baraan nɛ, á daa sii baraa-zɛnaalin gú ganaa.