Read Samo, Southern Iza 59 Bible Online

Iza 59 - Samo, Southern bible

Iza 59

¹Taãn nɛ, Dɛnaa Lawa gɔn ba kunu á la yii ni kirisibaa ganaa wa, a too dɔ bie á tã á la yii ni boo miɛ ganaa wa!

²Sɛnɛ, kaa sii baraan man ka niɛ̃ kɔn ka kaa Dɛnaa Lawa nɛ. Bɛ̀ n yaa á n bɔ á n bɔ ka li, a ná a ba li a kaa boo ma wa, kaa sii baraan lɛn lɛa nɛ.

³Ka gɔnɔn man mà lɛa, kaa siɛ̃n nə́ ka gòonən tii. Soɛ boon man ka lɛ-n, ka lɛwɔn nə́ boo baraa diɛ.

⁴Min kɔn ba woe kiri wɔ ǹ bǎã nɛ peperebaa a lɛa wa. Min kɔn ba kiri kuri ka sonborebaa-n wa, ka nə n foo doɛ sii kooron ganaa, ka n soɛ boe, Ka nə n taasɛ sii baraa zɛnaa ganaa, ka n koe yii nɛ lɛa.

⁵Kaa zɛnaa ǹ siin man ka kɔrɔkan gìi bɛ́ lɔn: Bɛ̀ min sɔ̃, a n giɛ̃. Bɛ̀ n gìi lɛ a goon yu, kɔrɔkan nə soe a nɛ.

⁶Ka bɛ mɔnaa mɛn tiɛ̃, a boe la a mɔnaa baa wa. Kaa dí a là a mɔnaa biɛ doɛ̃ ka wɔ ka ganaa wa, kaa sii zɛnaan man ka baraabaa nɛ. Ka gɔnɔn man kakaarɛbaa ǹ dí dinsɔɔ̃ nyɛɛ.

⁷ Ka gòã yii n fuu sii baraa zɛnaa ganaa. Ka nə n nanaɛ̃ woe yii tì-an mà kiɛ. Ka ǹ sii baraa zɛnaa dinsɔɔ̃ taasɛ. Ka bɛ boe bǎã mɛn tumaa nɛ, kakaarɛbaa laanka basaã nɛ.

⁸Kaa là nyantoro zii doɛ̃ wa. Ka bɛ́ koe zii mɛn lɛ, sonborebaa goon din ba la wa. Ka n kaa ziin kɔkɔrɔ koe. Bɛ̀ min woo min kɔ ǹ lɛ, bɛa là nyantoro yii duduu wa.

⁹Bɛ lɛ nɛ, sonborebaa wɔlɔ á lui-n wɔ ganaa, peperebaa a doe wɔ li wa. Wɔ nə n yii diɛ wɔlɔ fúlu la, sɛnɛ, wɔ n wɔlɔ tì li. Wɔ nə n yii die lɛ̀ a waa la, sɛnɛ, wɔ ǹ tɔ we wɔlɔ tì li.

¹⁰Wɔ ǹ tɔ we ka yii tere-an bɛ́ lɔn, wɔ nə n gɔnɔn tatalɛɛ kigiala gɔ̀nɔn ganaa. Wɔ ǹ woe wɔ mìi gialaa ka min mɛn bɛ́ a yii ná a banban. Penleen, wɔ nə n gòã niniɛ̃ ka tèlò bɛ́ lɔn. Wɔ ǹ kakabaa la, sɛnɛ, wɔ ǹ wɔ kɔnbɔ ka geren ne.

¹¹Wɔ tumaa n lɛ biɛ ka don màn babaraa bɛ́ lɔn. Wɔ n gini ka zɛrɛkatoãnən bɛ́ lɔn. Wɔ nə n yii diɛ sonborebaa la, sɛnɛ, màn kɔn. Wɔ nə n yii diɛ kirisibaa la sɛnɛ, a nə n wɔlɔ lui wɔ ganaa.

¹²Taãn nɛ, wɔa siɛ̃n nə́ mɔnaa n yɔrɔ-a. Wɔa sii baraan man wɔ zɛ̀rɛ biɛ. Wɔ nə n taasɛ ka wɔa sã ǹ siin kɛn nɛ biikoo yii li. Taãn nɛ, wɔ á wɔa siɛ̃n doɛ̃.

¹³Dɛnaa Lawa, wɔ n bɔlɔ tii. Wɔ n yiri sã. Wɔ n wɔlɔ lui n ganaa, wɔa Lawa. Mɛnaa minin la boo na á goã wɔ lɛ-n, ka gòãn dii boo ne. Soɛ boon dininsɔɔ̃nɔn man wɔ foo ne.

¹⁴Bɛ lɛ na á toa, sonborebaa nə́ n zɔ̃, peperebaa nə́ n wɔlɔ lui wɔ ganaa. Zaman bǎã nɛ, sonbore nya. Bɔlɔgoondɛnaabaa á woe walan wa.

¹⁵Taãn nɛ, sonbore nya. Min mɛn bɛ n nyɛnɛɛ sii baraa nɛ, maǹ bɛa dɛnaa kokoe. Dɛnaa Lawa bɛ tumaa yɛ. Peperebaa baã kɛ n sii bɔnɛɛ lɛa a yii li.

¹⁶ Á yɛ mà min kɔn banban, mà min kɔn ba gòã kũ diɛ wa, bɛ́ tɔwaa baa a ganaa. Bɛ lɛ nɛ, a din tá re sii zɛnɛɛ. A peperebaa lɛ na á pàã kɔ la.

¹⁷ A na á peperebaa wɔ a din ganaa ziabaa ǹ dɔnkɛ lɛa. Á kirisibaa ǹ kòlo fu wɔ a mìi ganaa. Á gɛ̀ dòo bɔ ǹ dɔnkɛ wɔ a din ganaa. Mɔnaa mɛn bɛ́ a ganaa pipiãbaa ǹ mɔnaa nɛ.

¹⁸Minin nə kɔnbɔ ka màn mɛn nɛ, a n die bɛ sarɛɛ ǹ la. A foo-yoo kɛ na a zia baa kɔn wolen wɔ lɛa, a dɔlɔ na a zɔ́ɔn wɔ lɛa, mu gánan mɛnɛn da bii, bɛn nə kɔnbɔ ka màn mɛn nɛ a n die bɛ sarɛɛ ǹ la.

¹⁹A kũ lɛ̀nyɛɛn ganaa min tumaa á re Dɛnaa Lawa tɔ guguru koe, a wo lɛ̀giala yaa, ǹ tumaa á re a tɔ a gugurubaa doɛ̃. Dɛnaa Lawa n die die ka mu tii bɛ́ lɔn nyankɔrɔ basa nɛ, piɛ̃ n noɛ̃ die ne.

²⁰ Si sii la wole á re die *Siɔn, Zakɔba a minin kɛn lɛa, ǹ nə́ ǹ sii baraan kaa. Dɛnaa Lawa a da ǹ boo ne.

²¹Sɛnɛ masɛ a paǹ li, ma bɛ́ lɛ kɔ kɔn la mɛn we ǹ nɛ, á ke, Dɛnaa Lawa na á pɛ: Ma yiri n ka la. Má maa boo wɔ ka lɛ-n. A n ka dinin wɔ lɛa, kaa nɛnyaanan nɛ, ka kaa nɔ̀ɔnɔn nɛ, sisia yǎa duduu. Ma a re ǹ sii ka la duduu wa. Ma din Dɛnaa Lawa n má pɛ.