Read Samo, Southern Iza 6 Bible Online

Iza 6 - Samo, Southern bible

Iza 6

¹ Ǹ kɔn pinaa, kii Oziasi a gɛ̀ lɛ̀ ganaa, má sii-nyaa yɛ: Dɛnaa na á goã giã-n tán kii dankan la, ǹ mɛn la bɛ́ lon taãn-taãnɛ, a mɔnaan nə́ Lawa a kion pã.

²Lon màn yiikoonaa tɛ-pɛlen man nə́ goã a mìi la. Ǹ gogoonmaa nyàa n sɔrɔ: Maǹ nyàa màn paa koe ǹ yɔrɔ lɛ, ǹ màn paa kɔ ǹ gɔ̀nɔn lɛ, ǹ piɛ̃ ka a màn paa nɛ.

³ Maǹ nə́ goã parɛɛ, ǹ nə́ pii kɔn nɛ kɛnɛn: «N tá sonbore, n tá sonbore, n tá sonbore Dɛnaa Lawa Pàãyiidɛnaa! N tɔ golebaa tán tumaa pã.»

⁴ Ǹ lɛn nə bìn diɛ Lawa a kion a kiɛnlɛ-a ǹ goon ganaa. Lawa a kion lɛ gɔ́ɔ̃ piɛ̃maa-n ka tɛmaa nɛ.

⁵Má tɔ́n pɛ kəni: «Koe bɔ ma ganaa! Maa wɔ nya lenlen! A giala, man gɔ̀dɛnaa lɛa, ma bɛ́ giã-n tɔrɔn mɛnɛn dɔn bii, bɛn dɔn man gɔ̀dɛnan lɛa. A giala ma yii Kii gole yɛ, Dɛnaa Lawa Pàãyiidɛnaa lɛ!»

⁶Sɛnɛ, lon màn yiikoonaa tɛ-pɛle lɛ goon piɛ̃ á daa ma li, tɛ nàn ná a gɔn, á kũ ka giɔ nɛ boe-n Lawa a *wúlu bɔ ǹ bǎã nɛ.

⁷Á bɛa tɛ nàn lɛ naa ma lɛ ganaa, á pɛ ma-n kɛnɛn: «A saa sisia ganaa, tɛ nàn kɛ mɛ n lɛ ganaa lɔn, n sãn nə́ n toa n nɛ, n sii baraan nə́ n tuturu.»

⁸Má tɔn Dɛnaa lɛ ma nɔ̀n diɛ kɛnɛn: «Man die die diɛ? Die n die maa boo gii-dali biɛ?» Má a lɛ si: «Má á ke, masɛ dia.»

⁹Á tɔ́n pɛ ma nɛ: — Wo pɛ tɔrɔ kɛ-n kɛnɛn: «Ka nə n too koe sɔnbɔraa nɛ, sɛnɛ, ka a màn kɔn miɛ wa. Ka n giɛ sɔnbɔraa nɛ, sɛnɛ, ka yii á màn kɔn yii wa.»

¹⁰Ǹ yiri lɔlɔkɔn, n nə ǹ too tã, n nə ǹ yii tã màn mɛn bɛ́ toɛ, ǹ yii nyan wɔlɔ yɛ wa, ǹ too nyan boo ma wa, ǹ yiri tã. Ka bɛ-n kəni, ǹ ba re wusii ǹ da ma li wa, ǹ ba re kaka koe wa.

¹¹Má tɔ́n nɔ̀n da: «Yǎa biĩ kəni Dɛnaa?» Á ma lɛ si kɛnɛn: «Yǎa bɛ̀ ǹ nə́ ǹ kiwin lɛn yu lenlen, min goon ná a ba ǹ nɛ wa, bɛ̀ ǹ nə́ ǹ kionən gɔ́ɔ̃ duduu, ǹ wurun nə́ diə gole baa.»

¹²Sonbore, Dɛnaa Lawa á re kiwi kɛa minin pɛsɛ̃ bǎã sɔsɔɔn nɛ. Wuru gigiã á re goɛ̃ tán kooro.

¹³Ta zaman lɛ a talɛɛ fù na á goã gána lɛ nɛ, tɛ á re bɛn kuĩ, ka da mɛn nə́ ke ǹ nə́ kuru ǹ nə́ daa, a giala piri dinsɔɔ̃ goã. Sɛnɛ, bɛa giala piri lɛ n piɛ̃ dii lɛa, a da ten sonbore baa.