Read Samo, Southern Iza 64 Bible Online

Iza 64 - Samo, Southern bible

Iza 64

¹Bɛ̀ ma n die goɛ̃ ka tɛ bɛ́ lɔn, tewonən kuĩ, hinlaa mu diɛ pipii ganaa. Bɛa yɔrɔ lɛ la, n bɛ́ màn mɛn lɛa, n zɔ́ɔn tá re n tɔ doɛ̃, tɔrɔn tumaa á re bìn diɛ n nyɛɛnɛ!

²Ń sii kakan zɛnaa. Ń gisĩ, kelen nə bìn da n nyɛɛnɛ.

³Lawa kɔsɔ a boe la a sii zɛnaa ka n bɛ́ lɔn a golemali-wɔlen man wa! Min kɔn bin bɛ ma wa, min kɔn bin bɛ dɔ̃ wa min kɔn bin bɛ yɛ wa.

⁴ Min mɛnɛn bɛ́ koe peperebaa lɛ ka foo kɔɔ̃nbaa nɛ, ǹ nə́ n yiri koɛ li ǹ tá koe n ziin kɛn lɛ, maǹ die n diɛ bɛn lɛ. Bɛ̀ n foo yoo, wɔa siɛ̃n lɛa nɛ. Sɛnɛ, bɛ̀ wɔ kɔ lɛlɛ ǹ ziin[14] kɛn lɛ, wɔ á re kirisibiɛ.

⁵Wɔ tumaa n ka gɔ̀dɛnan manɛ. Wɔa sii peperen tumaa n ka mɔnaa bɛ́ lɔn mà kaa a ganaa. Wɔa siɛ̃n man wɔ biɛ, lɔnkɔsɔ á kɔnboe lɛa, piɛ̃ n woe ne.

⁶Min kɔn ba n tɔ bii doo wa, min kɔn yii á we a n mɔrɔ n ganaa wa, a giala, n ba li n wɔ yɛ doo wa, ń wɔ toa wɔa sii baraan gɔn.

⁷A da yaa Dɛnaa Lawa, n din ni wɔa díi lɛa. Wɔsɛn man gì lɛa, nsɛ n dɔn-bɔle lɛa. N din nə n wɔ tumaa zɛnaa.

⁸Dɛnaa Lawa, n nyan toa n foo yoo a la yii-n wa. N nyan toa n yiri gisĩ wɔa sãn nɛ biikoo tumaa li wa. Baalaa wɔ, n ga wɔ ganaa, wɔ tumaa nə n zaman lɛa.

⁹Minin ba n kiwi sonboren kɛn nɛ wa. *Siɔn nə diə gole baa, Zeruzalɛmu kɛbɔlɔ baa.

¹⁰Wɔ digolon nə goã n tɔ boe kion sonbore siĩn-siĩn mɛn lɛ nɛ, ǹ nə́ tɛ da bɛ ganaa. Màn mɛn tumaa goã kɔɔ̃n wɔ ganaa, bɛ tumaa basaã baa.

¹¹Dɛnaa Lawa, koen kɛn ba n yii li ǹ sii lɛa wa? Ma n die n lɛ tiɛ̃ n wɔ yii puusə kɔ a la yii ni?