Read Samo, Southern Iza 65 Bible Online

Iza 65 - Samo, Southern bible

Iza 65

¹ Min mɛnɛn bɛ́ ǹ ba ma nyankoe wa, má toa bɛn nə́ nɔ̀n da ma la. Min mɛnɛn bɛ́ ǹ ba giɛ ma li wa, má toa bɛn nɛ ma yɛ. Má pɛ tɔrɔ kɔn nɛ a ná a ba ma nyankoe wa: «Ma á ke! Ma á ke!»

² Duduu, má n gɔn dia tɔrɔ bɔlɔgoonbaã wole la. Sɛnɛ maǹ koe zii bɔnɛɛ lɛ ǹ nə́ ǹ dinin foo siin zɛnɛɛ.

³Bɛa tɔrɔ lɛ n giɛ ma lɛ li biikoo tumaa li. Maǹ wúlu boe dù gɔrɔn nɛ, maǹ da yon gìĩ kɔɔ̃n tiɛ̃ kɔlɔn la.

⁴Maǹ giɛ̃ tán gere yalan nɛ, ǹ nə́ giɛ̃ kele yalan nɛ. Maǹ birii siĩ soɛ̃. Ǹ bǎãn piɛ̃maa nɛ ka màn gɔ̀dɛnan nɛ.

⁵Maǹ pii minin manɛ: «Ka nyan nə n mɔrɔ ma ganaa wa, ka nyan nə n gɔn da ma ganaa wa. A giala, man Dɛnaa Lawa a bɔ a koa wole lɛa.» Ka bɛ sii mɛn tumaa zɛnɛɛ, a n ma foo yui, a n ma kuĩ baraabaraa ka tɛ bɛ́ lɔn.

⁶Sɛnɛ, má n yiri koa bɛ tumaa li. Ma a re n lɛ tiɛ̃ doo wa. Ma á re dɔlɔ gole diɛ ǹ mìi ni bɛ taman yii.

⁷Ǹ siɛ̃n nɛ, ka ǹ digolon wɔ nɛ, ma á re bɛa gɛ̀ dòo boe ǹ ganaa. A giala, ǹ digolon man nə́ da yon gìĩ kɔɔ̃n tã kelen la, ǹ nə́ sɔ kɔ ma ganaa tentenen la. Sisia kəni, ǹ sii mɛn tumaa zɛnaa lɛlɛ, man die bɛ tumaa a dɔlɔ boe ǹ ganaa. Ma din Dɛnaa Lawa n má pɛ.

⁸Dɛnaa Lawa n kɛ pii: Bɛ̀ minin nə́ rezɛ̃ nɛ mərə sonbore yɛ, maǹ pii: «Ka nyan ziziɛ̃ wa» a giala, sàabaa ba la wa, a n die duvɛ̃ kɔɔ̃n biɛ. A din goon ne. Ma dɔ n die zɛnɛɛ miɛ̃, maa dí-nyalin kɛn lɛa. Ma a re ǹ yii tumaa ziziɛ̃ wa.

⁹Sɛnɛ, ma á re nɛnyaanan koe Zakɔba a zaman la, maa kelen nə Zudaa tɔrɔn kíɛ̃ baa. Ma min mɛnɛn bɔ, gána lɛ á re bɛn wɔ biɛ, ǹ mɛnɛn bɛ́ dí nyɛɛ ma nɛ, bɛn tá re gɛnɛɛ a nɛ.

¹⁰ Maa zaman lɛ a min mɛnɛn bɛ́ re wusii ǹ da ma li, Saarɔn a nyankɔrɔ basa[15] kɛ á re wuru biɛ bɛn wɔ lɛa, sèren nə buu sɔ̃ a nɛ, Akɔɔrɔ a nyankɔrɔ basa kɛ diin zìã baa.

¹¹Sɛnɛ, kasɛn mɛnɛn bɛ́ ka n la bɔ masɛ Dɛnaa Lawa ganaa, ka yiri bɔ maa kele sonboren kɛn nɛ. Ka n màn-bii koe dì Gaadi la. Ka n duvɛ̃ lɔlɔkɔn-a koe dì Menii la.

¹²Sisia kəni, man die ka we kaa zɔ́ɔn gɔn. Ka tumaa n die n musin koɛ tán, ǹ ka bɔlɔ kuru. A giala, má lɛ dia, sɛnɛ ka n nyəə wa. Má boo da ka nɛ, sɛnɛ ka n too kɔ wa. Sii mɛn bɛ́ a kɔɔ̃n ma ganaa wa, ka n bɛ zɛnɛɛ. Sii mɛn bɛ́ a ma foo sii wa, ka n bɛ zɛnɛɛ.

¹³Dɛnaa Lawa n kɛ pii: Á ke, min mɛnɛn bɛ́ maa dí-nyalin lɛa, bɛn tá re màn bii. Sɛnɛ, bòo á re kasɛn kuĩ. Min mɛnɛn bɛ́ maa dí nyɛɛ, bɛn tá re màn mii. Sɛnɛ mu boro á re kasɛn kuĩ. Min mɛnɛn bɛ́ maa dí-nyalin lɛa, bɛn foo á re kɔɔ̃n koe. Sɛnɛ, sìi n die n koe kasɛn lɛ.

¹⁴Min mɛnɛn bɛ́ dí nyɛɛ ma nɛ, bɛn tá re n lɛ dii ka foo kɔɔ̃n nɛ, ǹ nə́ yii-nyɛɛ la. Sɛnɛ kasɛn, ka ǹ die n lɛ dii ka là paparɛɛ nɛ, ka gɔ́ɔ̃ n piɛ̃ nɛ ka busii ni. Ka ǹ die gini, ka yiri n lɔloɛ-n kɔn.

¹⁵Ma min mɛnɛn bɔ má ǹ koa, ka tɔ n die goɛ̃ lɛn baraa bíi ǹ màn lɛa bɛn gɔn: «Dɛnaa Lawa toa n gã ka min kɛ bɛ́ lɔn!» Sɛnɛ, min mɛnɛn bɛ́ dí nyɛɛ ma nɛ, tɔ kɔsɔ n die n koe bɛn ganaa.

¹⁶Gána lɛ gɔ́ɔ̃ nɛ, min woo min tá li a Lawa bǐɛ̃ bíi a din li, ǹ dɛnaa n bíi ka Lawa bɔlɔgoondɛnaa tɔ nɛ. Min woo min a n lɛ kɔ we tán la, a n die n liɛ ka Lawa bɔlɔgoondɛnaa tɔ nɛ. Dɛnaa Lawa pɛ: «Yiri á re boe ka lɛlɛ ǹ koen kɛn nɛ. Ǹ tá re papaɛ̃, ǹ nə n bɔ ma yɔrɔ-a.»

¹⁷ A giala, á ke, man die lon dii laanka tán dii zɛnɛɛ. Min kɔn yiri a re goɛ̃ ka lɛlɛ ǹ nɛ duduu wa, haalɛ kɛnɛn dinin wa.

¹⁸Ka n nyɛnyɛɛ, ka foo n kɔɔ̃n biikoo tumaa li, sii kɛ taman yii ma á re zɛnɛɛ. A giala, á ke, man die Zeruzalɛmu biɛ kiwi lɛa, piɛ̃-n ka foo kɔɔ̃n nɛ. A zaman tá re goɛ̃ nyɛnyɛɛ la.

¹⁹ Ma foo á re kɔɔ̃n koe Zeruzalɛmu taman yii, Man die n nyɛnyɛɛ maa zaman a lɛa. Wuu laanka gú diɛ lɛ a re boe doo wa.

²⁰Nɛnyaan tiɛɛ̃n ba re yii, a ná a beleboe wa. Min zizin ba re giɛ̃, bɛ̀ ǹ nə́ ǹ zizi kɔ wa. Min mɛn bɛ́ re giɛ̃ ten, bɛ n die goɛ̃ lɛ̀ paabiɛ. Bɛ̀ min mɛn gã a ná a dɔ lɛ̀ paabiɛ wa, bɛ n goon ka lɛn baraa bíi ni.

²¹Ǹ tá re kionən doe, ǹ giã ǹ nɛ. Ǹ tá re *rezɛ̃ dan zumi, ǹ nà a nɛ bii.

²²Ǹ ba re kion doe, min kɔsɔn nə giã ǹ nɛ ǹ bǎã-n wa. Ǹ ba re rezɛ̃ dan zumi, min kɔsɔn na a nɛ bii wa. A giala, maa zaman lɛ a minin tá re zizi koe ka dan bɛ́ lɔn. Ma min mɛnɛn bɔ ma ǹ koa, bɛn tá re ǹ dí a là yii.

²³Ǹ ba re nɔmaa we kooro wa. Ǹ ba re nɛnyaanan yii ǹ nə ǹ kaa kanaa, ǹ nə́ giɛ ǹ ganaa giɛ̃ wa. A giala, ǹ dinin laanka ǹ nɛnyaanan man tɔrɔn lɛa má barka da ǹ ganaa.

²⁴Ǹ laan bɛ̀ ǹ ma bíi, ma á re ǹ lɛ sii. Ǹ laan bɛ̀ ǹ nya boo diɛ ganaa, bɛ̀ má n too kɔ ǹ lon.

²⁵ Don gin laanka sère nɛ á re buu soɛ̃ kun. Yàra á re buu gere soɛ̃ ka dii bɛ́ lɔn. Miɛ̃ á re n din toe ka gusuũ ni. Maa kele sonbore kɛ la, sii baraa hinlaa kakaarɛbaa a re n zɛnɛɛ doo wa. Dɛnaa Lawa na á pɛ.