Read Samo, Southern Iza 8 Bible Online

Iza 8 - Samo, Southern bible

Iza 8

¹Dɛnaa Lawa pɛ ma nɛ: «Sɛ́wɔ kiɛ̃ ǹ goo gole saa, n kɛ kiɛ̃ la foaã nɛ: Wo naforo ganaa fufuu, n mìi fɔ̃ a ganaa, n kokoo.»

²Má sɛ́wɔ kiɛ̃ ǹ goo lɛ nyaa min paa nɛ, foo n doa nɛ ǹ ganaa parsiini: Lawa a wúlu-bɔle Uria nɛ ka Yeberekia a nɛgiĩ Zakarii ni.

³Bɛ kio, tèlò-n má giã kun ka maa lɔ Lawa a boo gii-dali ni. Á nɔ̀ si, á nɛginin yɛ. Dɛnaa Lawa tɔ́n pɛ mà ma a tɔ kɔ "Wo naforo ganaa fufuu, n mìi fɔ̃ a ganaa, n kokoo".

⁴A giala, nɛ lɛ laan bɛ̀ a n pii doɛ̃ mà "díi" hinlaa "náa", ǹ tá re Damaasi a naforon laanka Samarii gɔn mànan sii ǹ da ǹ kɔ Asiiriin kii la.

⁵Dɛnaa Lawa wusoo á pɛ ma-n doo:

⁶Silowee mu ke baa sii sɛlɛlɛ, Zudaa zaman nə́ n piã ka bɛ nɛ, a giala, ǹ foo n kɔɔ̃nɛ kii màn paa kɛ taman yii: Resini laanka Pekaa.

⁷Bɛ lɛ nɛ, masɛ Dɛnaa n die Efrati tà mu gole kɛ diɛ ǹ la, bɛ giala mà Asiiriin kii laanka a pàã. Efrati tà lɛ n die piɛ̃, a toɛ̃, a n da bǎã yii la.

⁸A n die piɛ̃ a toɛ̃, a Zudaa gána kũ yǎa a bɔlɔ-a. Á re n daɛ n bǎã tumaa la, a n gána tumaa si a n kɔ lɛ, Emanuwɛli.

⁹Tɔrɔn lɛn, ka gɔ̀nɔn bìn da, nyɛ́ɛ ka kũ! Gána sɔsɔɔ tɔrɔn lɛn, ka n too kɔ! Ta ka n yɔrɔ bɔ zia taman yii lɔn, kaa wɔ n ka foo biɛ na nɛ! Taãn nɛ, ta ka n yɔrɔ bɔ lɔn, kaa wɔ n ka foo biɛ na nɛ!

¹⁰Tɔrɔn lɛn, ka siin yɔrɔ bɔ, sɛnɛ, ǹ ba re yɔrɔ yii wa! Ka n taasɛ siin ganaa, sɛnɛ, ǹ ba re boe wa! A giala, Dɛnaa Lawa n kun ka wɔsɛn nɛ.

¹¹Dɛnaa Lawa nə́ n gɔn waa ma nɛ ka pàã nɛ, mà ma baran n saa Zudaa gána minin giã ǹ gɔn li wa. A boo mɛn pɛ ma nɛ, bɛ á ke:

¹² Zaman bɛ́ sii mɛn bíi sii wɔ kɔn, kasɛn nyan bɛ bíi sii wɔ kɔn wa. Ǹ bɛ́ nyɛ́ɛ biɛ màn mɛn nɛ, ka nyan nyɛ́ɛ baa bɛ-n wa. Ka nyan nyɛ́ɛ baa ǹ nɛ wa.

¹³Ka doamaa-n ka dɔ̃, mà Dɛnaa Lawa Pàãyiidɛnaa din nə sonbore. Ka doamaa-n ka nyɛ́ɛ baa a din yii ni, ka doamaa-n ka a din guguru kɔ.

¹⁴ Dɛnaa Lawa n duru ǹ bǎã lɛa, a n kɔlɔ lɛa Izirayeli gána màn paa kɛ nə n gòã niɛ̃ a ganaa, a n minin boe ǹ daɛ. A n die kan biɛ Zeruzalɛmu minin ganaa.

¹⁵Min gigiã á re n gòã niɛ̃ a ganaa, ǹ tatalaa, ǹ bɔ ǹ mɛnaa ǹ nə n gù yiyiɛ. Kan tá re ǹ kuĩ, ǹ nə́ ǹ ba n sii la doɛ̃ wa.

¹⁶Lɛ dia kɛ koa n gɔ̀ɔ̃ nɛ, maa kialandɛnan daraa maa doroo ǹ boon kɛn ganaa sɔnbɔraa nɛ.

¹⁷ Ma nə n yii diɛ Dɛnaa Lawa la. Á n yɔrɔ bɔyaa bɔrɔ á bɔ Zakɔba tɔrɔn la. Sɛnɛ, masɛ yii n doa-n a din la.

¹⁸Á ke, masɛ laanka Dɛnaa Lawa nɛnyaanan mɛnɛn kɔ ma la, wɔ ǹ sii a kɔnboe laanka gɔn waa lɛa Izirayeli gána nɛ ka Dɛnaa Lawa Pàãyiidɛnaa tɔ nɛ, asɛ mɛn bɛ́ giã-n *Siɔn kele la.

¹⁹Min tɛnɛn man pii: «Ka wo nyín-bíilin li, ka wɔ-kũlin ni, ǹ mɛnɛn bɛ́ biɛ̃ ǹ sii nyɛɛ bɛ̀ ǹ boo bisin da ǹ lɛ giulun.» Bɛ̀ ǹ nə́ pɛ ka nɛ mà minin doamaa nɛ ǹ dìn gɔ, ǹ nyínin bíi yiikoonaan lɛa,

²⁰ka die ka ǹ lɛ si kɛnɛn: «Wɔ doamaa nɛ, wɔ kɔ Dɛnaa Lawa a boon laanka a doroon lɛ.» Min mɛn bɛ́ a zɛnɛɛ miɛ̃ wa, bɛa re baayɛlɛ a wɔlɔ fúlu yii wa.

²¹Zaman tá re n bibiĩ gána lɛ nɛ, ǹ nə́ nɔmaa nɛ, bòo nə́ ǹ ganaa. Bɛ lɛ taman yii, ǹ foo á re yui, ǹ lɛn baraa bíi ǹ kii laanka ǹ Lawa li. Ǹ tá re n yɔrɔ diɛ lon,

²²bɛ kio, ǹ tá re n yɔrɔ diɛ tán: Sɛnɛ á ke, maǹ die koe dinsɔɔ̃ yii, wɔlɔ tì biribiri ni, nyɛ́ɛ gole ne ka tèlò tì biribiri ni, ǹ bɛ́ re ǹ noɛ̃ ǹ nə ǹ zũ bǎã mɛn nɛ.

²³ Sɛnɛ wɔlɔ tì biribiri lɛ a re goɛ̃ gána lɛ la duduu wa, gána ke piɛ̃-n ka nyɛ́ɛ nɛ. Lɛlɛ, Dɛnaa Lawa goã á sìi da Zabulɔn laanka Nɛfutalii gána ganaa. Sɛnɛ ǹ kɔn pinaa, á re gugurubaa koe yìsi mu lɛ-a ǹ zii kɛ la, Zurdɛ̃ paǹ goon kɛ nɛ, ka Galilee gána kɛ nɛ tiin wɔ lɛa.