Read Samo, Southern LWS 11 Bible Online

LWS 11 - Samo, Southern bible

LWS 11

¹Dɛnaa Lawa boo da Muizu laanka Aarɔn nɛ, á pɛ ǹ nɛ:

²Ka pɛ Izirayeli minin lɛn manɛ: màn yiikoonaa mɛn tumaa bɛ́ tán la, ǹ nə́ boe la ǹ ná a siĩ soɛ̃, bɛn man ka kɛn nɛ:

³ǹ mɛnɛn gòon tɔn bii bɛ́ diɛ nɛ, ǹ nə́ ǹ màn-bii baɛ̃ ǹ gɔ́ɔ̃ nɛ, bɛ̀ ǹ timəə la ǹ sɔ̃, ka tá boe la ka bɛn sɔ̃.

⁴Ǹ mɛnɛn lɛn bɛ́ ǹ màn-bii soɛ̃ bɛ̀ ǹ timəə la, sɛnɛ, ǹ gòon tɔ́n bii ná a diɛ-n wa, ǹ mɛnɛn dɔn gòon tɔ́n bii bɛ́ diɛ nɛ, ǹ nə́ ǹ ba ǹ màn-bii soɛ̃ bɛ̀ ǹ timəə la wa, ka doamaa bie ka bɛn sɔ̃ wa: nyɔɔmaa nɛ,

⁵daaman nɛ,

⁶ka fuiin ni. A giala, manə ǹ màn-bii soɛ̃ bɛ̀ ǹ timəə la, sɛnɛ, ǹ gòon tɔ́n bii na a diɛ-n wa. Ka ga bɛn ganaa màn gɔgɔrɛn lɛa.

⁷Ka doamaa bie ka birii dɔ sɔ̃ wa. A giala, a gòon tɔ́n bii á diɛ nɛ, sɛnɛ, a ba màn-bii soɛ̃ bɛ̀ a timəə la wa. Ka ga a ganaa màn gɔgɔrɛ lɛa.

⁸Ka doamaa bie ka bɛa mànan kɛn lɛn siĩ sɔ̃ wa. Ka ga ǹ ganaa màn gɔgɔrɛn lɛa.

⁹Mu li ǹ mànan bii, ka bɛ́ boe la ka ǹ mɛnɛn sɔ̃, bɛn man ka kɛn nɛ: mu li ǹ màn tumaa, kɔ̀ mu li ǹ wɔn laanka tà mu li ǹ wɔn nɛ, mubaa ǹ mànan laanka fɔrɔ bɛ́ ǹ mɛnɛn ganaa, ka á boe la ka bɛn sɔ̃.

¹⁰Sɛnɛ, mu li ǹ màn bisin tumaa, màn yiikoonaa lɛa kɔ̀ mu li, hinlaa pɛrɛ mu li, mubaa ǹ mànan hinlaa fɔrɔ bɛ́ a ba ǹ mɛn ganaa wa, ka baran toa ka bɛn wɔ ka lɛ-n wa.

¹¹Ka baran toa ka bɛn wɔ ka lɛ-n wa. Ka doamaa bie ka ǹ siĩ sɔ̃ wa, ka nyan toa min dɔ din gɔn mɛ ǹ gere-a wa.

¹²Mu li ǹ màn mɛn tumaa bɛ́ mubaa ǹ mànan laanka fɔrɔ ná a ba a ganaa wa, ka nyan toa ka bɛ wɔ ka lɛ-n wa.

¹³Bàanan bii, ka doamaa bɛ́ ka bie ka ǹ mɛnɛn sɔ̃ wa, ǹ mɛnɛn siĩ doamaa bɛ́ a bie a wɔ ka lɛ-n wa, bɛn man ka kɛn nɛ: giogialatã-a nɛ, dənsə ne, kɔ̀ mu la ǹ lòn ne,

¹⁴sía nyənkə́ ne, zèwo tɔrɔ tumaa nɛ,

¹⁵zankoo tɔrɔ tumaa,

¹⁶kɔnaason ne, kɔlɔ nɛ, mu li ǹ sɛ́wɔ nɛ, baafɔɔ tɔrɔ tumaa nɛ,

¹⁷kɔlɔkuun ni, biɛ̃ mà á gii diɛ nɛ,

¹⁸gere yala bàan nɛ, bɔlɔ pɔɔ̃naa nɛ, zèwo fu ni,

¹⁹taban nɛ ka gɔgɔrɔ tɔrɔ tumaa nɛ, bàanan koo san nɛ ka fòn ne.

²⁰Màn baaran nyàa kadɛnaa mɛn tumaa bɛ́ tɔ we a gòon sii la, ka nyan toa ka bɛ sɔ̃ wa.

²¹Sɛnɛ, ǹ mɛnɛn bɛ́ tɔ we ǹ gòon sii la, ǹ pasan dɔn nə́ ǹ tan, ǹ nə́ parɛ ǹ nɛ tán, ka tá boe la ka bɛn sɔ̃:

²²mɔntɔn nɛ, kondoon ne, bìn ni ka kɔsɔ tɔrɔ tumaa nɛ.

²³Sɛnɛ, màn baaran kadɛnaa mɛn tumaa bɛ́, gòon sii dinsɔɔ̃ nə́ ǹ lon, ka nyan toa ka bɛn sɔ̃ wa.

²⁴Màn yiikoonaan tɛnɛn tan, bɛ̀ min gɔn mɛ ǹ ganaa, maǹ *gɔ̀ diɛ ǹ dɛnaa ganaa. Bɛ̀ min sã á n gɔn da ǹ gere ganaa, a n goɛ̃ gɔ̀dɛnaa lɛa yǎa wasa woe miɛ̃.

²⁵Bɛ̀ min dɔ nə́ ǹ gere saa, ǹ dɛnaa doamaa nɛ a na a mɔnaa pii. Sɛnɛ, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃.

²⁶Tɔɔn mɛnɛn tumaa gòon tɔ́n bɛ́ a tan, sɛnɛ, ǹ gòon biin ná a ba diɛ-n wa, ǹ nə́ ǹ ba ǹ màn-bii dɔ wɛɛ ǹ gɔ́ɔ̃ nɛ, bɛ̀ ǹ timəə la ǹ sɔ̃ wa, ka ga bɛn ganaa màn gɔgɔrɛn lɛa. Bɛ̀ min mɛn sã á n gɔn da ǹ ganaa, ǹ dɛnaa na á gɔ̀dɛnaa baa.

²⁷Màn gòã siinaan mɛnɛn tumaa bɛ́ tɔ we ǹ gòã sii la, a din goon ne. Ka ga bɛn ganaa màn gɔgɔrɛn lɛa. Bɛ̀ min mɛn sã á n gɔn da ǹ mɛn gere ganaa, ǹ dɛnaa n goɛ̃ gɔdɛnaa lɛa yǎa wasa woe miɛ̃.

²⁸Bɛ̀ min mɛn dɔ nə́ ǹ mɛn gere saa, ǹ dɛnaa doamaa nɛ a na a mɔnaan pii, sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃. Ka ga bɛa mànan lɛn ganaa màn gɔgɔrɛn lɛa.

²⁹Màn baaran mɛn tumaa bɛ́ tɔ we tán la, ka doamaa nɛ ka ga kɛn ganaa màn gɔgɔrɛn lɛa: sulu ni, kɛ́n nɛ,

³⁰gǐɔ̃mɔsooro ne, bìã tɔrɔ tumaa nɛ, ka kɔnkandamɔɔ nɛ.

³¹Màn baaran tumaa bii, ka ga bɛn lɛn ganaa màn gɔgɔrɛn lɛa. Bɛ̀ ǹ mɛn gã, yǎa min nə n gɔn da a ganaa, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃.

³²Bɛ̀ bɛa màn baaran lɛ mɛn gã, yǎa a gere mɛnaa màn woo màn la, bɛa màn lɛ n gɔgɔrɛ koe. Ta gɔn màn nɛ, ta mɔnaa nɛ, ta ki ni, ta takoo ne, ka ga bɛ ganaa màn gɔgɔrɛ lɛa, yǎa wasa woe miɛ̃. Ta maǹ dí woo dí nyɛɛ nɛ, yǎa ǹ diɛ mu li bɔrɔ a tɔn *yoreen koe.

³³Gì màn woo gì màn, bɛ̀ màn baaran mɛn nə́ n dɔ a nɛ, a gɔ́ɔ̃gɔ́ɔ̃ ǹ màn tumaa n gɔgɔrɛ koe. Yǎa ka bɛa gì màn lɛ yui.

³⁴Bɛ̀ ka bɛa gì màn lɛ a mu kaa màn-bii mɛn ganaa, bɛ dɔ nə n bɔyɛɛ a gɔgɔrɛ kɔ. Ta a mànan dan nə mu lɛa, min nə́ boe la á n mii, a dɔ nə n bɔyɛɛ a màn gɔgɔrɛ baa, haalɛ ta a n màn woo màn nɛ.

³⁵Bɛ̀ bɛa màn baaran lɛ mɛn gere mɛnaa màn woo màn la, a n gɔgɔrɛ koe. Ta kùsì mɛn tɔrɔ nɛ, yǎa ǹ wurii. A giala, màn gɔgɔrɛn manɛ, ka doamaa nɛ ka ga ǹ ganaa màn gɔgɔrɛn lɛa.

³⁶Sɛnɛ, bɛ̀ ǹ mɛn gere mɛnaa mu a pìã woɛ̃ ǹ bǎã nɛ, hinlaa tù ni, bɛn mu tumaa n goɛ̃ yoreen ne. Sɛnɛ, bɛ̀ min mɛn nə́ n gɔn da a gere ganaa mà a n boe, bɛa dɛnaa n gɔ̀dɛnaa biɛ.

³⁷Màn tɔrɔ mɛn dɔ á ke ka n woe diɛ, ta ǹ mɛn gere na á n dɔ bɛ li, màn tɔrɔ lɛ n goɛ̃ yoreen ne.

³⁸Sɛnɛ, bɛ̀ ka saalɛlɛ ka mu lɔlɔ màn tɔrɔ mɛn ganaa, ka n die biɛ màn-bii lɛa, yǎa bɛa mànan kɛn lɛn mɛn gere nə n dɔ li, ka ga a ganaa màn gɔgɔrɛ lɛa.

³⁹Tɔɔn mɛnɛn bɛ́ ǹ tá boe la ǹ nə ǹ siĩ sɔ̃, bɛ̀ bɛ mɛn gã, yǎa min nə n gɔn da a gere ganaa, bɛa dɛnaa n goɛ̃ gɔ̀dɛnaa lɛa yǎa wasa woe miɛ̃.

⁴⁰Bɛ̀ min mɛn bɛa màn gere lɛ sɔ̃, ǹ dɛnaa doamaa nɛ a na a mɔnaan pii. Sɛnɛ, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃.

⁴¹Màn baaran mɛn tumaa bɛ́ tɔ we tán la, ka nyan toa ka bɛn wɔ ka lɛ-n wa. Ka baran bɛn sɔ̃ wa.

⁴²Màn baaran mɛn tumaa bɛ́ tɔ we tán, ta ǹ mɛnɛn manə n giɛrɛɛ ǹ nɔ̀ la, ta ǹ mɛnɛn man tɔ we ǹ gòã sii hinlaa gòã gigiã la, ka baran ǹ sɔ̃ wa, a giala, ǹ doamaa bie ǹ wɔ ka lɛ-n wa.

⁴³Bɛa màn baaran kɛ lɛ tumaa tɔ we tán, ka baran ka dinin zaãbaa ka bɛ kɔn nɛ wa, ka baran toa ǹ mɛ ka ganaa, ka gɔ̀ da ka dinin ganaa wa.

⁴⁴ A giala, masɛ Dɛnaa Lawa din nə kaa Lawa lɛa. A bɛ́ miɛ̃, ka ka dinin kũ Lawa wɔn lɛa, ka goã yoreene, a giala, masɛ n yoreene. Bɛa màn baaran kɛ lɛ tumaa, tɔ we tán ǹ nɔ̀ la, ka baran gɔ̀ da ka dinin ganaa ka bɛ kɔn nɛ wa.

⁴⁵A giala, ma din Dɛnaa Lawa n ma ka waa má ka bɔ Ezipti gána nɛ, màn mɛn bɛ́ toɛ, ma kaa Lawa baa. Bɛ lɛ taman yii, ka doamaa nɛ ka goã masɛ wɔbaa nɛ, a giala, man yoreene.

⁴⁶Tɔɔ mànan laanka don mànan wɔ paǹ li, bàanan nɛ, màn yiikoonaa mɛn tumaa bɛ́ mu li ka ǹ mɛnɛn bɛ́ n giɛrɛɛ tán ǹ nɔ̀ la, landa mɛn bɛ́ a tan, a din lɛ n ka bɛ nɛ.

⁴⁷Màn gɔgɔrɛ laanka a yoreen ne, siĩ mɛn bɛ́ n soɛ̃, ka ǹ mɛn bɛ́ a ba n soɛ̃ wa, a n toɛ min nə bɛn bɔkɔnlɛ dɔ̃.