Read Samo, Southern LWS 12 Bible Online

LWS 12 - Samo, Southern bible

LWS 12

¹Dɛnaa Lawa boo da ka Muizu ni á pɛ nɛ:

²A pɛ Izirayeli minin lɛn manɛ: Bɛ̀ lɔ nɛginin yɛ, a n goɛ̃ gɔ̀dɛnaa lɛa lɛawaa sɔbaa gɔ́ɔ̃ nɛ, ka a bɛ́ a lɛa lɔn a lɔn lɛawaa biikoo li.

³ Lɛawaa kiwisibaa ǹ wɔ pinaa, ǹ nɛ lɛ kuru.

⁴Bɛ kio, a n yii da lɛawaa pɔsɔɔwensɔɔ gɔ́ɔ̃ nɛ, ǹ tɔn nɛ yɛ ǹ *gɔ̀ bɔ a ganaa. A ba n gɔn diɛ màn yoreen kɔn ganaa wa, a die Lawa a kion sonbore kɛ dɔ-n wa, yǎa a nɛ yɛ ǹ gɔ̀ bɔma-a ǹ lɛawaan lɛn lɛ piɛ̃.

⁵Bɛ̀ a na á nɛlɔ yɛ, a n goɛ̃ gɔ̀dɛnaa lɛa piizii paa gɔ́ɔ̃ nɛ, ka a bɛ́ a lɛa lɔn a lɔn lɛawaa biikoo li. Bɛ kio, a n yii da lɛawaa pɔsɔrɔwensɔrɔ gɔ́ɔ̃ nɛ, ǹ tɔn nɛ yɛ ǹ gɔ̀ bɔ a ganaa.

⁶Bɛ̀ a gɔ̀ bɔma-a ǹ lɛawaan lɛn lɛ pã, tà nɛginin hinlaa nɛlɔ na á yɛ, a da lɛ̀ goon sère nɛ kɔ Lawa a wúlu-bɔle la, *wúlu màn tiɛ̃ lɛa, ka zɛrɛkantoan hinlaa wuruun ni, a bɛ baa sii baraa sawaa ǹ wúlu màn lɛa, kɔn yɛ ka Lawa nɛ ǹ kion kɛ a kiɛnlɛ-a.

⁷Wúlu-bɔle lɛ bɛa mànan lɛn nyaa Lawa nɛ ǹ sii zɛnaa kɔn yɛ ka Lawa nɛ ǹ kion kɛ yɔrɔ-a. Bɛ̀ wúlu-bɔle lɛ gɔ̀ bɔma-a ǹ landa zɛnaa a lɛa, a nɛ yɛ ǹ gɔ̀ á die n boe a ganaa. Bɛ̀ lɔ nɛginin hinlaa nɛlɔ yɛ, landa mɛn bɛ́ a tan a wɔ paǹ li, a din lɛ n ka bɛ nɛ.

⁸ Bɛ̀ wɔrɔ ba lɔ lɛ gɔn á n doe sère nɛ ganaa wa, a wuruun màn paa hinlaa zɛrɛkantoan màn paa kũ, a goon baa wúlu màn tiɛ̃ lɛa, a goon baa sii baraa sawaa ǹ wúlu màn lɛa. Bɛ̀ wúlu-bɔle lɛ gɔ̀ bɔma-a ǹ landa zɛnaa a lɛa, a gɔ̀ na á n bɔ a ganaa.