Read Samo, Southern LWS 17 Bible Online

LWS 17 - Samo, Southern bible

LWS 17

¹Dɛnaa Lawa boo da ka Muizu ni, á pɛ nɛ:

²Boo da ka Aarɔn laanka a nɛgiĩn ni, ka Izirayeli minin lɛn tumaa nɛ, n pɛ ǹ nɛ: Dɛnaa Lawa dí mɛn pɛ, bɛ n ka kɛ nɛ:

³Bɛ̀ Izirayeli min lɛ mɛn tá dii dii, ta sère ne hinlaa bòe ne, á boe la a dɛ ǹ giã ǹ bǎã kɛ nɛ, hinlaa, ǹ giã ǹ bǎã lɛ kio dinin.

⁴Sɛnɛ, bɛ̀ a da ka tɔɔ lɛ nɛ, kɔn yɛ ǹ kion kɛa kiɛnlɛ-a bɔrɔ, á kɔ Dɛnaa Lawa la a gɔ ǹ *wúlu màn lɛa, a giã ǹ bǎã kɛ yɔrɔ-a wa, a mà mɛn kaa, bɛa dɔlɔ á re n boe a ganaa. Bɛa dɛnaa kɛ lɛ, ǹ loo ǹ bɔ Izirayeli minin bii.

⁵Bɛ á die toɛ Izirayeli minin lɛn ba re woe ka ǹ tɔɔn nɛ don, mà maǹ biɛ wúlu màn lɛa wa. Ǹ tá re die ǹ koe Lawa a wúlu-bɔle la, Dɛnaa Lawa wɔ lɛa, kɔn yɛ ǹ kion kɛa kiɛnlɛ-a. Ǹ tá re wúlu boe ǹ ne Dɛnaa Lawa wɔ lɛa, barka da Dɛnaa Lawa nɛ ǹ wúlu mànan lɛa.

⁶Wúlu-bɔle lɛ die a bɛa tɔɔ lɛ a mà pɛsɛ̃ Dɛnaa Lawa a *wúlu bɔ ǹ bǎã kɛ ganaa, kɔn yɛ ǹ kion kɛa kiɛnlɛ-a. A nyɔɔ ke, a die a bɛ tã wúlu màn lɛa, a tɛmaa gìĩ n kɔɔ̃n Dɛnaa Lawa ganaa.

⁷Bɛ̀ á n baa miɛ̃, ǹ ba re ǹ wúlu mànan dii butumu nyínin kɛn ganaa doo wa. Maǹ nə́ Lawa bɔlɔ tii, ǹ tá bɛa dìn kɛn lɛn miãn kio. Kɛ n landa lɛa ǹ mìi ni miɛ̃ duduu, ǹ tɔrɔn tumaa wɔ lɛa, a ná a ba n bɔyɛɛ wa.

⁸A pɛ ǹ nɛ dɔn, min woo min, á n Izirayeli tɔrɔ lɛa, hinlaa á n gùli lɛa giã nɛ ǹ bii, bɛ̀ a tá tɔɔ biɛ wúlu màn tiɛ̃ hinlaa wúlu màn tɔrɔ kɔsɔ lɛa,

⁹bɛ̀ ǹ dɛnaa da nɛ kɔn yɛ ǹ kion kɛa kiɛnlɛ-a á wúlu bɔ nɛ Dɛnaa Lawa wɔ lɛa wa, ǹ bɛa min lɛ loo ǹ bɔ Izirayeli tɔrɔn bii.

¹⁰ Min woo min, á n Izirayeli tɔrɔ lɛa, hinlaa á n gùli lɛa giã nɛ ǹ bii, bɛ̀ ǹ mɛn màn mà wɔ a lɛ-n, masɛ á die n bɔyɛɛ man yɔrɔ da bɛa dɛnaa la, ma loo ma bɔ Izirayeli tɔrɔn bii.

¹¹ A giala, màn yiikoonaa tumaa a yiikoonaabaa na a mà nɛ. Masɛ dɔ n má mà lɛ kɔ ǹ la, má ǹ nə ǹ dinin sii baraa sawaa ǹ wúlu bɔ nɛ, wúlu bɔ ǹ bǎã kɛ lalan. Mà lɛ n toɛ min a sii baraan nə n toa nɛ, a giala, yiikoonaabaa lɛ n mà nɛ.

¹²Bɛ lɛ na á toa má pɛ Izirayeli minin lɛn manɛ: Ka kɔn nyan toa ka màn mà wɔ ka lɛ-n wa. Gùli mɛn bɛ́ giã nɛ ka bii, bɛ dɔ nyan toa a màn mà wɔ a lɛ-n wa.

¹³Bɛ̀ Izirayeli min lɛ mɛn màn dɛ dɔ ganaa, hinlaa gùli mɛn bɛ́ giã nɛ ǹ bii, ta bɛ na á màn lɛ dɛ, siĩ gòã siinaa-n hinlaa bàan nɛ ǹ nə́ soɛ̃, ǹ dɛnaa doamaa nɛ, a na a mà kaa tán, a tii kɔ lɛ.

¹⁴A giala, bɛ̀ màn yii á koo ǹ mɛn waáraa, a yiikoonaabaa lɛ n ka a mà nɛ. Bɛ lɛ n ke má pɛ Izirayeli minin lɛn manɛ, máa ǹ nyan toa ǹ màn kɔn a mà wɔ ǹ lɛ-n wa. A giala, màn din tumaa a yiikoonaabaa, a mà nɛ. Bɛ̀ min mɛn wɔ a lɛ-n, ǹ doamaa nɛ ǹ bɛa dɛnaa loo.

¹⁵Min woo min, gána lɛ a min ni hinlaa gùli ni, bɛ̀ màn gã a din li, hinlaa don mànan man nə́ wɔ̃woɛ̃ kɔn, bɛ̀ ǹ mɛn bɛ sɔ̃, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃ a tɔn *yoreen koe.

¹⁶Bɛ̀ ǹ dɛnaa na a mɔnaan pii á n zoo wa, ǹ dɛnaa a sii baraa na a din mìi ni.