Read Samo, Southern LWS 20 Bible Online

LWS 20 - Samo, Southern bible

LWS 20

¹Dɛnaa Lawa boo da ka Muizu ni á pɛ nɛ:

²N die n pɛ Izirayeli minin lɛn manɛ: min woo min, á n Izirayeli min lɛa, hinlaa á n gùli lɛa Izirayeli gána nɛ, bɛ kɔn baran a nɛ kɔ, mà ǹ wúlu bɔ nɛ, dì Molɛki kɛ ganaa wa. Bɛ̀ min mɛn bɛ zɛnaa, gána lɛ a minin nə kɔlɔ kaã bɔ a ganaa, ǹ dɛ a gã.

³Masɛ dinmaa n die n bɔyɛɛ, man yɔrɔ da bɛa dɛnaa kɛ lɛ la, ma bɔ ma bɔ Izirayeli tɔrɔn bii. A giala, a ná a nɛ kɔ Molɛki la. Bɛ̀ min mɛn dɔ́ bɛ zɛnaa, ǹ dɛnaa na á maa kion sonbore kɛ gɔgɔrɛ kɔ, á ma tɔ sonbore kɛ ziziɛ̃.

⁴Bɛ̀ gána lɛ a minin nə́ bɛ miã siin lɛn yɛ, ǹ nə́ n yii tã a ganaa, ǹ nə́ ǹ ba li ǹ nə ǹ dɛnaa dɛ wa,

⁵masɛ dinmaa á die n bɔyɛɛ man yɔrɔ da bɛa dɛnaa laanka a tanlɛ minin la, min mɛn tumaa bɛ́ re Molɛki lɛ guguru koe kun ni, ma ǹ waa, ma ǹ bɔ Izirayeli tɔrɔ bii.

⁶Bɛ̀ min mɛn woo gere nyín bíi boon kion, a n goon ka ǹ dɛnaa na á dì wúlu bɔ. Bɛ̀ min mɛn bɛ zɛnaa, masɛ á die n bɔyɛɛ man yɔrɔ da bɛ la, ma bɔ ma bɔ maa tɔrɔ minin bii.

⁷Ka ka dinin kũ Lawa wɔn lɛa, ka goã *yoreene. A giala, masɛ din Dɛnaa Lawa n kaa Lawa lɛa.

⁸Ka masɛ a landa boon kɛn tamaa, ǹ bɛ́ màn mɛn pii, ka bɛ zɛnaa. Ma din Dɛnaa Lawa n má ka bɔ, má ka baa ma din wɔn lɛa.

⁹ Bɛ lɛ nɛ, bɛ̀ min mɛn sɔ kɔ ǹ di hinlaa ǹ dan ganaa, ka ǹ dɛnaa dɛ a gã. Ǹ dɛnaa a gɛ̀ lɛ a dɔlɔ na a din mìi ni, a giala, a na á sɔ kɔ ǹ di laanka ǹ dan ganaa.

¹⁰ Bɛ̀ giĩ mɛn naarɛbaa zɛnaa kun ka ǹ miã kɔsɔ a lɔ nɛ, giĩ mɛn naarɛbaa lɛ zɛnaa, a zɛnaa kun ka lɔ mɛn dɔ nɛ, ka ǹ paanan dɛ ǹ gã.

¹¹ Bɛ̀ giĩ mɛn giã kun ka ǹ di a lɔ nɛ, a n goon ka a na á sìi da ǹ di ganaa. A din laanka lɔ lɛ nɛ, ka ǹ paanan dɛ ǹ gã. Ǹ gɛ̀ lɛ a dɔlɔ nə ǹ dinin mìi ni.

¹² Bɛ̀ giĩ mɛn giã kun ka ǹ manaa nɛ, a din laanka ǹ manaa lɛ nɛ, ǹ nə ǹ paanan dɛ ǹ gã. A giala, maǹ nə́ sii gɛsɛ zɛnaa. Ǹ gɛ̀ lɛ a dɔlɔ nə ǹ dinin mìi ni.

¹³ Bɛ̀ giĩ mɛn giã kun ka ǹ miã giĩ ni, ka ǹ bɛ́ giɛ̃ kun ka lɔ-n lɔn, sii bɔbɔnɛɛ nɛ, ǹ dinin paanan nə́ zɛnaa. Ǹ nə ǹ dɛ ǹ gã. Ǹ gɛ̀ lɛ a dɔlɔ nə ǹ dinin mìi ni.

¹⁴ Bɛ̀ giĩ lɔ saa, á wusoo á ǹ daãlɛ dɔ saa a lɔ lɛa, kɔrɔbaa nɛ. Ǹ bɛa giĩ lɛ laanka lɔ min paa lɛ kaa tɛ-n. Bɛ̀ ka zɛnaa miɛ̃, bɛa kɔrɔbaa kɛ miã ba n zɛnɛɛ ka bii doo wa.

¹⁵ Bɛ̀ giĩ mɛn giã kun ka tɔɔ nɛ, ǹ giĩ lɛ dɛ a gã, ǹ tɔɔ lɛ dɔ dɛ.

¹⁶Bɛ̀ lɔ mɛn nə́ n mɔrɔ tɔɔ ganaa á giã kun ni, ǹ lɔ lɛ laanka tɔɔ lɛ dɛ. Ǹ nə ǹ dɛ, ǹ gɛ̀ lɛ a dɔlɔ nə ǹ dinin mìi ni.

¹⁷ Bɛ̀ giĩ nə́ ǹ miãnɛn saa lɔ lɛa, ta ǹ dinɛ nɛ, ta ǹ dannɛ nɛ, bɛ̀ ǹ nə́ kɔn dɔ̃, sìi gole ne. Ǹ na a dɔlɔ bɔ ǹ ganaa, ǹ tɔrɔ minin lɛn tumaa yii ni. Giĩ lɛ bɛ́ na á giã kun ka ǹ miãnɛn nɛ, a din tá re n toɛ̃ ka a sii baraa a guĩ ni.

¹⁸ Bɛ̀ giĩ mɛn giã kun ka lɔ nɛ, lɔ lɛ a mui dɔ ná a ganaa, bɛ̀ lɔ lɛ dɔ́ lɛ kɔ á n din kɔ la, giĩ lɛ ná a lɛawaa yɛ a ganaa, ǹ nə ǹ dinin paanan dɛ, ǹ bɔ Izirayeli tɔrɔn bii.

¹⁹ Giĩ kɔn baran toa a giã kun ka ǹ dan nə ǹ dɔɔ̃nlɔ-n wa, hinlaa ka ǹ dɛlan nɛ wa. A giala, bɛ̀ giĩ mɛn bɛ zɛnaa, ǹ dɛnaa na á giã kun ka a din tɔrɔ nɛ. A din laanka lɔ lɛ nɛ, ǹ dinin paanan tá re n toɛ̃ ka ǹ sii baraa a guĩ ni.

²⁰Bɛ̀ min mɛn giã kun ka ǹ di n dɔɔ̃n a lɔ nɛ, a n goon ka ǹ dɛnaa na á ǹ di n dɔɔ̃n lɛ tontoro da. A din laanka lɔ lɛ nɛ, ǹ dinin paanan tá re n toɛ̃ ka ǹ sii baraa a guĩ ni. Ǹ tá re giɛ̃, nɛ wɛɛ nɛ.

²¹ Bɛ̀ giĩ mɛn nə́ ǹ dɔɔ̃n a lɔ saa a wɔ lɛa, sii gɔgɔrɛ na á zɛnaa. A n goon ka ǹ dɛnaa na á ǹ dɔɔ̃n lɛ tontoro da. Ǹ tá re giɛ̃, nɛ wɛɛ nɛ.

²²Ka maa landa boon kɛn tumaa laanka maa sii yɔrɔ bɔ ǹ boon kɛn tumaa tamaa. Ǹ bɛ́ màn mɛn pii, ka bɛ zɛnaa. Bɛ̀ ka zɛnaa miɛ̃, ma bɛ́ woe giã ǹ bǎã koe ka la gána mɛn nɛ, bɛa gána lɛ a die n boe ka li wa.

²³Ma bɛ́ re tɔrɔn mɛnɛn lui ma ǹ bɔ ka nyɛɛnɛ, ka nyan toa ka n saa bɛn landa siin kɛn li wa. A giala, bɛa siin kɛn lɛn tumaa a zɛnaa na á toa, ǹ tìĩ bɔ ma nyin ni.

²⁴Bɛ lɛ na á toa má tɔ́n pɛ kɛnɛn: Ǹ tán lɛ n die ka dinin wɔ biɛ, ma din nə die ǹ tán lɛ koe ka la, gána kɛ lɛ tɔɔ too laanka tán-kɔsiɛ n bǐɛ̃ koe a nɛ. Ma din Dɛnaa Lawa n kaa Lawa lɛa, má ka na, má ka bɔ kɔn ka tɔrɔ kɔsɔn nɛ.

²⁵Siĩ gòã siinaan laanka bàanan nɛ, ǹ mɛn bɛ́ yoreene, ǹ mɛn bɛ́ gɔgɔrɛ, ka bɛ dɔ a bɔkɔnlɛ wɔ. Siĩ gòã siinaan nɛ, bàanan nɛ, ka màn baaran mɛn tumaa bɛ́ tɔ we a nɔ̀ la, ma bɛn mɛnɛn na má ǹ kaa ǹ gɔrɔn màn gɔgɔrɛn lɛa, ka baran n dinin zaãbaa ka bɛn nɛ wa.

²⁶Ka goã ma din wɔn lɛa yoreene. A giala, Dɛnaa Lawa dinmaa n yoreene. Ma din ni má ka na má ka bɔ kɔn ka tɔrɔ kɔsɔn nɛ, màn mɛn bɛ́ toɛ, ka maa wɔn baa.

²⁷Bɛ̀ giĩ hinlaa lɔ tá boobaa ǹ dí nyɛɛ minin manɛ, ka kɔlɔ kaã bɔ ǹ ganaa, ka ǹ dɛ ǹ gã. Ǹ gɛ̀ lɛ a dɔlɔ nə ǹ dinin mìi ni.